Den Bybel met groter neersticheyt ghecorrigeert (Liesveltbijbel 1542)

¶ Dauid wort door sijn ghesicht in onbehoorlicker liefden ontsteken teghen BarSeba Vrias huysurouwe. Hy breect sinen houwelicken staet met haer, ende haren ghetrouden man laet hi dooden.

Dat .xi. Capittel.

[p. *]

[afbeelding]

1

⁺ENde doen dat iaer om quam, inder tijdt als die coningen pleghen wt te trecken, so seynde Dauid Ioab ende sine knechten met hem, ende alle die kinderen Israel dat si die kinderen Ammon verderuen souden, ende beleggen souden, Rabba, maer Dauid bleef te Ierusalem.

+ A vers 1

2

Het geschiede dat Dauid ontrent den auont op stont van sinen leger, ende ginc op den solder des conincs huys, ende sach vanden solder een vrouwe haer wasscen Ende dat wijf was van seer schoonder gedaenten.

3

Ende Dauid seynde ende dede na dat wijf vragen ende seggen, en is dat niet BathSeba, die dochter Eliam dat wijf Vria des Hethiters?

4

Ende Dauid seynde boden henen ende dedese halen, ende doe si tot hem in quam, doe sliep hi bi haer. Si heylichde haer van haerder onreynicheydt ende keerde weder tot haren huyse.

5

⁺Ende dat wijf werdt beurucht, ende si seynde ende liet Dauiden vercondigen ende seggen, Ick ben beurucht,

+ B vers 5

6

Dauid seynde tot Ioab, Seynt my Vriam den Hethiter, Ende Ioab seynde Vriam tot Dauid,

7

Ende doen Vria tot hem quam vraechde Dauid, oft met Ioab, ende metten volcke, ende metten strijt wel stonde,

8

Ende Dauid sprack tot Vriam, Gaet neder in v huys, ende wascht dijn voeten. Doe Vrias wt des conincx huys wt ghinc, so volchden hem na des conincx geschencke,

9

Ende Vria leyde hem slapen voor die duere des conincx huys, daer al die knechten sijns heeren laghen, ende en ginc niet neder in sijn huys.

10

⁺Doemen Dauiden bootschapte. Vria en is niet neder in sijn huys gegaen, so sprac Dauid tot hem, En sidy niet ouer tvelt gecomen? Waerom en sidy niedt af in v huys gegaen?

+ C vers 10

11

Vria sprac tot Dauid, die Arcke ende Israel blijuen in tenten, Ende Ioab mijn here ende mijns heren knechten liggen te velde, ende ic soude in mijn huys gaen, dat ic ate ende droncke, ende bi mijn wijf lage, also warachtelic als ghi leeft, ende v siele leeft, ic en doe dat niet.

12

Dauid sprac tot Vria, so blijft heden oock hier, morghen wil ic v laten gaen. Dus bleef Vria te Ierusalem dien dach, ende des anderen daechs daer toe,

13

ende Dauid noode hem dat hi voor hem soude eten ende drincken, ende maecte hem droncken. Ende tsauents ginc hi wt dat hi op sinen legher slapen soude met sijns Heren knechten, ende en ginc niet neder in zijn huis

14

Des morgens screef Dauid eenen brief tot Ioab, ende santen door Vriam,

15

Hi screef aldus inden brief, Stellet Vriam inden strijdt daer hi alder hartste is, ende keert v achter hem af, dat hy verslagen worde,

16

Als nv Ioab om die stadt lach, so stelde hi Vriam aen die plaetse daer hi wist dat strijtbare mannen waren,

17

Ende doe dye mannen wt der stadt vielen, ende streden tegen Ioab, so vielen sommige des volcx vanden knechten Dauid,

18

⁺Ende Vria de Hethiter sterf ooc. Doe seinde Ioab henen ende dede Dauiden bootscappen, alde handelinge des strijts

+ D vers 18

19

ende geboot den bode ende sprac. Als ghi alle handelinge des strijts wtghesproken hebt metten coninc,

20

ende siet dat hi toornich daerom is, ende dye coninc tot v spreect. Waerom sidy soo nae der stadt ghegaen met den strijdt? En wist ghi niet hoemen vanden mueren plach te schieten?

21

Wie sloech Abimelech den soon Ierubaal? En wierp niet een wijf, een stuc van eenen molensteen op hem vander mueren, also dat hi sterf tot Thebez, waerom hebt ghi v so na der mueren gemaect, so segt dijn knecht Vria de Hetiter is ooc doot

22

Die bode ginc henen ende bootscaptet Dauiden al, daer hem Ioab om gheseynt hadde.

23

Ende dye bode sprac tot Dauid. Die mannen namen douerhant tegen ons, ende vielen tot ons wt opt velt, ⁺ ende wi waren aen hen tot voor die dore der poorten.

+ iudi. ix

24

Ende dye scutters scoten vander mueren op uwe knechten, ende dooden sommighe van des conincx knechten, daer toe soo is Vria v knecht die Hethiter ooc doot.

[afbeelding]

25

Dauid sprac totten bode. Dus suldi tot Ioab seggen, En laet v dat niet qualick beuallen, want dat sweert verslint nv desen, nv den ghenen, Hout aen metten strijt tegen die stadt dat ghise breeckt, ende weest getroost.

26

Ende doen Vrias wijf hoorde dat Vria haer man doot was, droech si rouwe om haren huysweert.

27

Mer doen si dat roudraghen volbracht hadde, so seinde Dauid henen, ende dedese in sijn huys halen ende si wert zijn wijf, ende baerde hem eenen soon, mer die handelinge behaechde den HERE qualic die Dauid dede