Den Bybel met groter neersticheyt ghecorrigeert (Liesveltbijbel 1542)

Die Philistinen worden gram om dat Dauid haer hooftman soude sijn, Die Coninck seyndet hem weder thuys

Dat .xxix. Capittel.

1

⁺DIe Philisteen vergaderden alle haer heyr tot Aphek, Ende Israel legherde tot Ay, in Iesreel,

+ A vers 1

2

Ende die princen der Philisteen gingen daer henen met honderden ende met duysenden, Mer Dauid ende sine mannen ginghen achter na bi Achis,

3

doen spraken die princen der Philisteen, Wat sullen dese Ebreen? Achis sprack tot hen, En is dat niet Dauid Sauls knecht des conincx Israhel? die ons bi gheweest is iaer ende dach, ende en hebbe niet aen hem geuonden, sint der tijt dat hi af geuallen is tot nv toe.

4

⁺Mer die princen der Philisteen worden toornich op hem, ende seyden tot hem, Laet den man wederom keeren ende in sine plaetse blijuen daer ghi hem ghestelt hebt, op dat hi niet met ons af en trec ten strijde, ende onse wederpartijder werde inden strijde, Wandt waer aen

+ B vers 4

[p. *]

mocht hi sinen heer bet behagen doen, dan aenden hoofden deser mannen?

5

En is hi niet die Dauid van dien si aen die reyen songen, ⁺ Saul heefter duysent gheslaghen, mer Dauid thien dusent

+ C vers 5

6

Doen riep Achis Dauiden ende sprac tot hem, so warachtelic als die HERE leeft, Ic houde v voor oprecht, ende uwen wtganc ende inganck met mi int heyr behaecht mi wel, ende en hebbe niet archs aen v ghespuert, sint ter tijt dat ghi tot mi ghecomen sijt, tot nv toe, Mer ghi en beualt den princen niet,

7

Dus keert nv wederomme, ende gaet henen met vrede, op dat ghy niet qualic en doet voor den ooghen der princen der Philisteen,

8

Dauid sprac, Wat heb ic ghedaen, ende wat hebdy aen uwen knecht ghespuert, sint der tijt dat ic voor v gheweest ben tot nv toe, dat ic niet en soude comen, ende strijden teghen die vianden mijns heren des Conincx.

9

Achis antwoorde ende sprac tot Dauid, ⁺ ic weet wel dat ghi mijnen oogen behaghet als een enghel Gods, Mer der Philisteen princen hebben geseyt En laet hem niet met ons optrecken inden strijt,

+ D vers 9

10

dus maect v nv morghen vroech op, ende die knechten dijns heren die met v sijn gecomen, ende als ghi v morghen vroech op gemaect hebt, dattet licht is, so gaet henen.

11

Also maeckte hem Dauid ende sine mannen vroech op, dat si tsmorghens wech souden gaen, ende weder inder Philisteen landt souden comen, Maer die Philisteen trocken op tot Iesreel