Den Bybel met groter neersticheyt ghecorrigeert (Liesveltbijbel 1542)

¶ Dauid wort een hooftman van Achis ghesedt, Saul die vraecht om raet vanden waerseggers. Samuel openbaert hem ende straft hem

Dat .xxviij. Capittel.

1

⁺ENde het gesciede ter seluer tijt dat die Philisteen haer heyr vergaderden inden strijt te trecken tegen Israel. Ende Achis sprack tot Dauid, Ghi sult weten dat ghi ende v mannen met mi wt sult trecken int heyr,

+ A vers 1

2

Dauid sprack tot Achis, Wel aen, ghy sult beuinden wat v knecht doen sal, Achis sprac tot Dauid, Daeromme wil ic v tot eenen bewaerdere mijns hoofs setten mijn leefdage lanck

3

Samuel was gestoruen, ende alle Israel had rouwe om hem gedraghen, ende begrauen in sijnder stadt Rama, Soo had Saul wt den lande verdreuen, dye waerseggers ende teekenbedieders.

4

Doen nv die Philisteen hen vergaderden, ende quamen ende legerden hen te Sunem, so vergaderde Saul ooc dat geheele Israel, ende legerden hen tot Gilbea.

5

Mer doen Saul der Philisteen heyr sach, vreesde hi, ende sijn herte versaechde seer,

6

Ende vraechde raet den HERE, Maer dye HERE en antwoorde hem niet, noch door droomen noch door tlicht, noch door propheten.

7

⁺Doen sprac Saul tot sinen knechten, soect mi een wijf, die eenen waerseggenden gheest heeft, op dat ic tot haer gae, ende haer vrage, Sine knechten spraken tot hem, Siet tot Endor is een wijf, die heeft eenen waersegghenden gheest.

+ B vers 7

8

Ende Saul veranderde sine cleederen, ende troc andere aen, ende ginc henen, ende twee mannen met hem, ende quamen bider nacht totten wijue ende sprac, Lieue propheteert mi door den waerseggenden geest, ende brengt mi hier om den ghenen die ick v segge.

9

Dat wijf sprack tot hem, siet ghi weet wel wat Saul gedaen heeft, hoe hi die waerseggers ende teekenbedieders wtgeroeyt heeft vanden lande. Waerom wildy dan mijne siele in dat nette leyden, dat ic gedoodet werde?

10

Mer Saul swoer haer byden HERE, ende seyde, so warachtelijc als die HERE leeft Dit en sal v tot geender misdaet comen.

11

Doen sprac dat wijf, Wien sal ic v dan op brengen? Hi sprac, Brengt mi Samuel hier op

12

⁺Als nv dat wijf Samuel sach, so riep si luyde ende sprac tot Saul, Waerom hebdi mi bedrogen? ghy sijt Saul,

+ C vers 12

13

ende die coninc sprac tot haer, en vreest niet, wat siet ghi? dat wijf sprac tot Saul, Ic sie die goden op climmen wt der aerden,

14

Hi sprac, hoe is hi gestelt Si sprac daer comt een out man op, ende is gecleet met eenen siden roc, Ende Saul verstont dat Samuel was, ende neychde hem met sinen aensichte ter aerden, ende aenbede hem

15

Samuel sprack tot Saul waerom hebdy mi onrustich gemaect, dat ghi mi hier op dedet bringhen? Saul sprac, ic ben seer benaut, die Philisteen strijden tegen mi, ende God is van mi geweken, ende en antwoort mi niedt noch door propheten noch door droomen Daerom heb ick v doen roepen, dat ghi mi wijsen sout, wat ic doen sal

16

⁺Samuel sprac. Wat wildi mi vragen, als die HERE van v geweken is, ende v viant geworden is?

+ D vers 16

17

die HERE sal v doen, so hi door mi gesproken heeft, ende sal dat rijc van uwer hant scoren, ende Dauiden uwen naesten gheuen,

18

om dat ghi die stemme des HEREN niet gehoort en hebt, ende die verbolghentheyt sijnder gramschappen niet volbracht en hebt tegen Amalek daerom heeft v die HERE nv sulc gedaen,

19

daer toe sal die HERE Israel met v ooc geuen inder Philisteen hant, morgen sult ghi ende v sone met mi sijn, Ooc sal die HERE dat heyr Israel inder Philisteen hant geuen

20

Doen viel Saul terstont ter aerden, want hi en conste niet gestaen, ende hi verscricte seer voor die woorden Samuel, Also dat geen cracht in hem meer en was, want hi en hadde van allen dien dage, ende van alle der nacht geen broot geten.

21

Ende dat wijf ginc in tot Saul, ende sach dat hi seer veruaert was ende seyde tot hem, Siet v maerte heeft v stemme gehoort, ende heb mijn siele in mijn hant geset, dat ic uwe woorden hoorde die ghi tot mi seyt,

22

so hoort nv uwer maerten stemme, Ic wil v een bete broots voor setten dat ghi etet, op dat ghi tot crachten coemt ende uwer straten gaet,

23

mer hi weygerdet ende sprac, ic en wil niet eten. Doen dwonghen hem sine knechten ende dat wijf, dat hi haerder stemmen gehoor gaf

24

Ende hi stont op vander aerden, ende hi stelde hem opt bedde, dat wijf hadde thuys een gemest calf, si haeste ende sloecht, ende si nam meel ende knedet, ende biect ongesuert,

25

ende brachtet voor Saul, ende voor sine knechten. Ende doen si gheten hadden, stonden si op, ende ghinghen alle den nacht