Den Bybel met groter neersticheyt ghecorrigeert (Liesveltbijbel 1542)

Daer werden mannen wtghesonden vanden seuen stammen, om dat lant te besien, ende wt te deelen. Het deel BenIamin wort bescreuen.

Dat .xviij. Capittel

1

⁺ENde dye gheheele ghemeynte der kinderen Israel, vergaderden hen tot Silo, ende rechten aldaer den Tabernakele des getuychnis op, ende dat lant was hen onderworpen,

+ A vers 1

2

ende daer waren noch seuen gheslachten der kinderen Israel, dyen si haer erfdeel nyet wtghedeelt en hadden.

3

Ende Iosua sprack totten kinderen Israel, Hoe langhe sijt ghi soo luy, dat ghy nyet henen en gaet, om dat lant inne te nemen, dat v die HERE uwer vaderen God gegeuen heeft?

4

Kiest wt elcken stamme drie mannen, dat icse seynde ende dat si hen op maken, ende door tlant gaen, ende bescrijuent, na haren erfdeel, ende comen tot my.

5

Deelet dat lant in seuen deelen, Iudas sal blijuen op sine palen vander zuytsiden, ende dat huys Ioseph sal bliuen op sine palen van noorden her,

6

mer bescrijft ghi dat lant in seuen deelen, ende brengtse herwaerts, tot my, so wil ick v dat lot worpen voor den HERE onsen God,

7

Want die Leuiten en hebben gheen deel onder v. Mer die priesterscap des HEREN is haer erfdeel, mer Gad ende Ruben, ende den haluen stamme Manasse, ⁺ hebben haer deel ghenomen ouer geen side der Iordanen tegent oosten, dat hem Mose die knecht des HEREN ghegeuen hadde.

+ B vers 7

8

Doen maecten hen die mannen op, op dat si wech souden gaen. Ende Iosua gheboot hen, doen si wilden gaen om dat landt te bescrijuen, ende sprack, gaet henen ende doorwandelt dat lant, ende bescrijuet, ende coemt weder tot mi, dat ic v hier dat lot werpe voor den HERE tot Silo,

9

Also gingen dye mannen henen, ende doortrocken tlant, ende bescreuent op eenen brief, nae dye steden in seuen deelen, ende quamen tot Iosua inden leghere tot Silo,

10

Doen wierp Iosua tlodt ouer hen, tot Silo, voor den HERE, ende deelden aldaer tlant wt onder die kinderen Israel, eenen yegelijcken sijn deele.

11

Ende dat lot des stams der kinderen BenIamin, viel na haren gheslachten, ende den pale haers lots ghinc wt tusschen den kinderen Iuda, ende den kinderen Iosephs.

12

Ende haren pale was aenden hoecke teghent noorden, vander Iordanen aen, ende ghaet opwaerts aen dye side Iericho, van noortwaerts, ende coemt opt geberchte tegent westen waerts,

13

ende gaet wt der woestijnen BethAuen, ende gaet van daer tot Lus aen die side aen Lus, tegent zuytwaert, dat is, BethEl, ende coemt af tot AtharothAdar, aen den berghe, die van tzuyden leyt, aenden nederen BethHoron,

14

daer na neyget si haer ende crommet haer omme, totten hoecke des westens, tegent zuyden vanden berghen, die voor BethHoron zuytwaert leyt, ende gaet wt in KiriathBaal, dat is KiriathIearim, die stadt der kinderen Iuda, dat is den hoecke tegent westen.

15

⁺Mer den hoecke tegent zuyden, is van KiriathIearim aen, ende gaet wt teghent westen, ende gaet wt totten water fonteynen Nephthoah,

+ C vers 15

16

ende daelt neder aen des berchs eynde, die voor den dal des soons Hinnan leydt, welc inden nederen lande Raphim, teghent noorden leyt, ende daelt af doort dal Hinnan aender siden der Iebuseen aent zuyden, ende coemt neder totter fonteynen Rogel,

17

ende trect haer van noortwaert, ende coemt wt tot Ensenes, ende gaet wt totten hoopen die tegen Adumim opwaerts ligghen, ende coemt nederwaerts totten steen Bohem, des soons Ruben,

18

ende gaet ter siden henen neffens den blacken velde, dat tegent noorden leyt, ende coemt af op tblack veldt,

19

Ende gaet aender siden BethHagla, die teghent noorden leyt, ende sijn eynde is aender tonghen der souter zee, tegent noorden, aenden cante der Iordanen, tegent zuyden, dat is des zuydens pale.

20

⁺Mer die hoecken teghent oosten, sal dye Iordane eynden, dat is dat erfdeel der kinderen BenIamin, in haren palen rontomme onder haren gheslachten.

+ D vers 20

21

Die steden des stams der kinderen BenIamin onder haren gheslachte, zijn dese, Iericho, BethHagla, EmekKesin,

22

BethAraba, Semaraim, BethEl,

23

Auim, Haphar, Aphra, Capher, Amonai, Aphni, Gaba,

24

dat sijn twaelf steden ende haer dorpen,

25

Gibeon, Rama, Beeroth, Mizpe, Caphira, Moza, Rebem, Ierpeel, Tharaala,

26

Zela, Eleph, ende die Iebuseen,

27

dat is Hierusalem, Gibeath, Kiriath,

28

veerthien steden ende haer dorpen, dat is dat erfdeel der kinderen BenIamin in haren gheslachten.