Den Bybel met groter neersticheyt ghecorrigeert (Liesveltbijbel 1542)

Die heydensche coninghen verghaderen teghen Israhel te strijden, mer si crijghen die nederlagen ende haer steden worden ingenomen.

Dat .xi. Capittel.

1

⁺DOen Iabin dye coninck tot Hazor dat hoorde, seynde hi tot Iobab den coninc tot Madon, ende totten coninc tot Semron, ende totten coninc tot Achsaph,

+ A vers 1

2

ende totten coninghen die noortwaerts opt gheberchte, ende inden pleynen lande, zuydtwaerts Cineroth, ende inden nederen lande, ende die in dye heerschappien tot Dor, aen dye zee woonden,

3

Den Cananiten tegent oosten ende westen, Die Amoriten ende die Hethiten, ende die Pheresiten, ende die Iebusiten opt geberchte, Dair tot dye Heuiten, onder aenden berch Hermon, inden lande Mizpa,

4

dese trocken wt met alle haren heyr, een groot volck, so vele als des zants aen die zee, ende zeer vele paerden ende waghens,

5

Alle dese coninghen verghaderden hen, ende quamen ende maecten haren legher bi malcanderen aen dat water Merom, om te strijden tegen Israel.

6

Ende die HERE sprack tot Iosua, en vreestse niet, ⁺ want morghen ontrent dese tijt wil ickse al verslaghen gheuen voor die kinderen Israel, haer peerden suldi verlemen, ende haer wagenen met vier verbernen.

+ B vers 6

7

Ende Iosua quam bottelijc ouer hen, ende alle oorloochs volck met hem aent water Merom, ende oueruielense,

8

Ende die HERE gafse in die handen Israel, ende sloegense, ende ioegense tot groot Zidon toe, ende tot dye werme wateren, ende tot aen die breede tot Mizpe tegent oosten, ende sloegense tot datter niet een ouer en bleef.

9

Doen dede hen Iosua soo hem dye HEERE gheseydt hadde, ende verleemde haere paerden, ende verbernde haer waghenen,

10

ende keerde omme ter seluer tijdt, ⁺ ende wan Hazor, ende sloech haeren Coninck metten swaerde, Wandt Hazor was te voren dye hooftstadt, alle deser Conincrijcken,

+ C vers 10

11

ende sloegen alle sielen die daer inne waren, metter scherpten des sweerdts, ende verbandese, ende en liet nyedt dat den adem hadde, ende verbernde Hazor met vier.

12

Daer toe alle die steden deser coningen wan Iosua met haren Coninghen, ende sloechse metter scherpten des sweerts, ende verbandese, soo Mose dye knecht des HEREN geboden hadde.

13

Sonder dat die kinderen Israel gheene steden die op houelen stonden met vuer en verbranden, Mer Herazor alleene verbrande Iosua,

14

⁺Ende alleen den roof deser steden, ende dat vee deelden die kinderen Israel onder hen, maer si sloeghen alle dye menschen metter scherpten des sweerts, tot dat sise vernielden, ende en lieten daer niet ouer blijuen, dat adem had,

+ D vers 14

15

so die HERE Mose sinen knechte, ende Mose Iosua geboden hadde,

16

so dede Iosua, also datter niet en faelgeerde, aen alle dat die HERE Mose gheboden hadde,

Aldus nam Iosua al dit lant op dat gheberchte, ende al dat tegent zuyden leyt, ende alle tlant Gosen, ende die nedere landen ende blacke velden, ende dat gheberchte Israel met sinen gronden,

17

vanden geberchte aen dat het lant opwaerts tot Seir scheydet, tot BaalGad, inder breyden des berchs Libanon, onder aenden berch Hermon, Alle hare coninghen gewan hi, ende sloechse ende doodese,

18

maer hy voerde langen tijt teghen dese coninghen strijdt.

19

Mer ten was geen stadt die haer met vreden op gaf den kinderen Israel, wtgenomen die Heuiten, dye tot Gibeon woonden, mer si wonnense alle met stride,

20

Ende dat gheschiede alsoe vanden HEERE, op dat hare herten verhardt souden worden, ⁺ den kinderen van Israhel met strijden teghen te ghaen, op dat si verbandt souden worden, ende dat hen geen ghenade

+ Sap. xv

[p. *]

en soude geschien, met vernielt worden, so die HERE gheboden hadde.

21

In die tijt quam Iosua, ende roeyde wt die Enakim vanden geberchte van Hebron, van Debir, van Anab, van allen gheberchten Iuda, ende van alle gheberchte Israel, ende verbrandese met haren steden,

22

Ende en liet gheenen Enakim ouerblijuen, inden lande der kinderen Israel, sonder tot Gasa, tot Gath, tot Asdod, daer bleuender ouer.

23

Also nam Iosua allet lant in, In alle manieren, soo die HERE tot Mosen ghesproken hadde, ende ghafse Israel tot een erue, elcken stamme sijn deel, ende dat lant hielt op te oorloghen.