Den Bybel met groter neersticheyt ghecorrigeert (Liesveltbijbel 1542)

¶ Gibeon wordt vanden Heydenen beleghert, maer Iosua met sinen volcke coemt haer te hulpe, ende hy wint eenen grooten slach. Die vijf coninghen die int hol gheuloden waren, dye worden voor Iosua ghebrocht ende ghehanghen, ende daer nae nemet Iosua alle die ander steden inne.

Dat .x. Capittel.

1

⁺DOen Adonizedech die coninck van Ierusalem hoorde, dat Iosua Ai gewonnen, ende dye verbannet hadde, ende Ai met haren Coninck ghedaen hadde, ghelijck hy Iericho ende haren Coninck ghedaen hadde, ende dat die van Gibeon vrede ghemaect hadden met Israhel, ende onder hem comen waren,

+ A vers 1

2

soo vreesden si seere, Want Gibeon

[afbeelding]

was een grote stadt, als der rijcker steden een, ende groter dan Ai, ende alle haer borghers strijdtbaer,

3

soo sondt hi tot Hohan, den coninck van Hebron, ende tot Piream, den coninc tot Iarmuth, ende tot Iaphia, den Coninck tot Lachis, ende tot Debir, den coninck tot Eglon, ende dede hen segghen,

4

Comt opwaerts tot my, ende helpt my dat wi Gibeon slaen Want si heeft met Iosua, ende den kinderen Israel vrede ghemaect.

5

⁺Doen vergaderden ende trocken op die vijf Coninghen der Amoriten, die coninck tot Iherusalem die Coninc tot Hebron, die coninc tot Iarmuth, die Coninck tot Lachis, die coninck tot Eglon, met alle haer heyrleghers, ende beleyden Gibeon, ende streden daer teghen,

+ B vers 5

6

Maer die van Gibeon sonden tot Iosua tot Gilgal, ende deden hem seggen, En trect uwe hant niet af van uwen knechten, comt haestelijc opwaerts tot ons, verlost ende helpt ons, wandt alle die coninghen der Amoriten, dye opt gheberchte woonen, hebben hen teghen ons te samen vergadert.

7

Iosua reysde opwaerts van Gilgal, ende al dat oor-loochs volck met hem, ende alle strijtbaer mannen,

8

Ende die HERE sprac tot Iosua. ⁺ En vreeset voor hen niet, want ic hebse in uwen handen ghegeuen, Nyemant van hen en sal voor v staen moghen,

+ C vers 8

9

Alsoo quam Iosua bottelick ouer hen, want al den nacht tooch hi op van Gilgal,

10

Ende die HERE veruaerdese voor Israel, alsoo datse eenen grooten slach sloeghen tot Gibeon, ende iaechden hen na den wech op tot BethHoron, ende sloegense tot Aseka ende Makeda toe,

11

Ende doen si voor Israhel vluchten, den wech nederwaerts tot BethHoron, soo liet dye HERE eenen grooten hagel vanden hemel op hen vallen, tot Aseka toe, dat si storuen, ende haerder storuer veel meer vanden haghel, dan die kinderen Israel metten sweerde doodeden.

12

Doen sprac Iosua metten HERE, inden dage doe die HERE die Amoriten ouer ghaf, voor dye kinderen Israel, ende sprack voor den teghenwoordighen Israel, Sonne houdt stille tot Gibeon, ende Mane inden dal Aialon.

13

Doen hielt die Sonne stille, ende die Mane stondt, tot dat hem dat volck aen sijn vianden wreecte. En is dit nyet ghescreuen inden rechtboeck? Aldus stont die Sonne midden aenden hemel, ende vertrack onder te gaen bi na eenen heelen dach.

14

Ende daer en was gheenen dach desen dach ghelijc, noch voren noch daer nae, doen die HERE der stemmen eens mans ghehoorsaem was, want dye HERE strijdt voor Israel.

15

⁺Iosua trock weder inden legher tot Gilgal,

+ D vers 15

16

ende alle Israhel met hem, maer die vijf Coninghen waren gheulucht, ende verstaken hen in die holen tot Makeda,

17

ende het wert Iosua te kennen ghegheuen, wi hebben die vijf Coninghen gheuonden verborghen inden hole tot Makeda,

18

Iosua sprac, Soo wentelet groote steenen voor dat gadt des hools, oft der speluncken, ende stellet daer mannen voor dyese bewaren,

19

en staet ghy niet stille, maer iaghet uwen vianden nae, ende houdt daer van achter op, ende en laetse in haer steden niet comen, want die HEERE uwe God, heeftse in uwen handen ghegheuen.

20

Ende doe Iosua ende die kinderen Israel voleyndt hadden den seer grooten slach aen hen, also dattet met hen gedaen was, wat ouerbleef van hen lieden, dat quam in die vaste steden.

21

⁺Aldus quam allet volck weder inden leghere by Iosua tot Makeda met vrede, ende niemant en dorste hem voor den kinderen Israel met sijnder tonghen roeren of kicken.

+ E vers 21

22

Iosua sprac, Doet dat gadt des hools open, ende brengt die vijf coninghen hier tot my.

23

Sy deden also, ende brachten die vijf coninghen tot hem wt den hole, den coninc tot Iherusalem, den coninck tot Hebron, den coninck tot Iarmuth, den coninc tot Lachis, den coninck tot Eglon.

24

Doen dese vijf Coninghen tot hem daer wt ghebracht waren, so riep Iosua alle mannen van Israel ende sprac totten ouersten des oorloochs volcx die met hem trocken. Comt herwaerts, ende tert dese Coninghen met voeten op die halsen, ende si quamen toe, ende tradense met voeten op haer halsen,

25

Ende Iosua sprac tot hen. En vreest niet, ende en laet v nyet

[p. *]

grouwelen, sijt getroost ende vrymoedich. Want also sal die HEERE allen uwen vyanden doen, teghen die welcke ghi stridet.

26

Ende Iosua sloechse daer nae ende doodese, ende hinckse op vijf boomen, ⁺ ende si hingen aen die boomen tot sauonts toe.

+ da. xi.d.

27

Mer doen dye sonne onder gegaen was, geboot hy datmense vanden boomen souden nemen, ende worpense in dat hol, daer si hen in verborgen hadden, ende leyden groote steenen voor dat gadt, die sijn noch daer, op desen dach.

28

Opten seluen dach wan Iosua oock Makeda, ende sloechse metter scerpten des sweerts, daer toe haeren coninc, ende verbandese, ende alle sielen die daer in waren, ende en liet nyemanden, ouer bliuen, ende dede den coninc tot Makeda, ghelijck hy den coninc tot Iericho gedaen hadde.

29

Doen trock Iosua, ende alle Israhel met hem, van Makeda tot Libna, ende streedt teghen haer

30

⁺Ende die HERE ghaf die selue ooc inden handen Israel, met haren coninghen, ende hi sloechse metter scherpten des sweerts, ende alle sielen die daer inne waren, ende en lieter nyet eenen ouer inne bliuen. Ende dede haren coninck so hi den coninc tot Iericho gedaen hadde.

+ F vers 30

31

Daer na trock Iosua, ende alle Israhel met hem van Libna tot Lachis, ende beleydese ende bestormdese.

32

Ende dye HERE ghaf Lachis oock in die handen van Israhel, also dat sise tsanderdaechs wonnen, ende sloegense metter scerpten des sweerts, ende alle sielen die daer inne waren, in alle manieren soo hi Libna ghedaen hadde.

33

Inder seluer tijt trock Horam, dye Coninck tot Gezar opwaerts om Lachis te helpen, mer Iosua sloech hem, met allen sinen volcke, tot datter nyet een ouer en bleef.

34

Ende Iosua troc van Lachis, met allen Israhel tot Eglon, ende beleydese, ende bestormdese,

35

ende wonse inden seluen dage, ⁺ ende sloechse metter scherpten des sweerts ende verbande alle sielen die daer in waren, opten seluen dach, in alle manieren so hi Lachis gedaen hadde.

+ G vers 35

36

Daer na troc Iosua opwaerts met alle Israhel, van Eglon tot Hebron, ende bestormdese

37

ende wontse ende sloechse metter scherpten des sweerts, ende haren coninck met alle haer steden, ende alle sielen die daer in waren, ende en lieten nyet eenen ouerbliuen, in alder manieren, so hi Eglon gedaen hadde, ende verbandese, ende alle sielen die daer in waren.

38

Doen keerde Iosua wederomme met alle Israel tot Debir, ende bestormdese,

39

ende wantse met haren coningen, ende daer toe ooc alle hare steden ende sloegense metter scherpten des swaerts, ende verbanden alle sielen dye daer inne waren, ende en lieter nyet eenen ouerbliuen, ghelijc hy Hebron ghedaen hadde, soo dede hi Debir oock ende haren coninck, ende so hi Libna ende haren coninck gedaen hadde.

40

Also sloech Iosua alle dat lant opt geberchte ende tegent zuyden, ende inden nederen landen, ende aen dye beken, met allen haren Coninghen, ende en lieter niet eenen ouerbliuen, ende verbandese al wat adem hadde soo die HERE die God Israel geboden hadde,

41

ende sloechse van Cades Barnea aen, tot Gasa toe, ende alle dat landt Gosen, tot Gibeon toe,

42

ende wan alle dese coninghen met haren lande teenen male, Want die HERE dye God Israhel streedt voor Israhel,

43

Ende Iosua trock weder inden legher tot Gilgal, met alle Israel.