Den Bybel met groter neersticheyt ghecorrigeert (Liesveltbijbel 1542)

Moses climt opten berch, ende sterft aldaer, Ende hi wort vanden kinderen Israels beweent

Dat .xxxiiij. Capittel

1

⁺ENde Mose clam vanden velden der Moabiten opten berch Nebo, opten top vanden berch Pisga, teghen Iericho ouer, ende die HERE toonde hem alle dat lant Gilead, tot Dan toe, ⁺

+ A vers 1

+ ij.mach. ij.a

2

ende geheel Naphtali, ende dat lant Ephraim ende Manasse, ende alle dat lant Iuda, tot aen die achterste zee, ende tegent zuyden,

3

ende die lantscappen van dat breet velt van Iericho der palmen stadt, tot Zoar toe.

4

Ende die HERE sprack tot hem, Dit is dat lant dat ic Abraham, Isaack ende Iacob gesworen hebbe, seggende, ick salt uwen sade geuen, ghi hebbet aengesien met uwen oogen, maer ghi en sult daer niet ouer gaen.

5

Aldus storf Mose aldaer die knecht des HEEREN, inder Moabiten lant, na den woorde des HEREN,

6

⁺ende hi begroef hem in dat dal inder Moabiten lant, ⁺ tegen dat huys Peor, ende niemant en heeft zijn graf vernomen, tot opten dach van heden.

+ B vers 6

+ gen. xij.b. xv.d.

7

Ende Mose was hondert ende twintich iaer out doen hi sterf, sijn ooghen en waren niet doncker geworden, ende sijn wanghen en waren niet veruallen.

8

Ende die kinderen van Israel beweenden Mose inder Moabiten velden. Dertich dagen, ⁺ ende die dagen des weenens ende beclagens werden voldaen ouer Mose

+ C vers 8

9

Ende Iosua Nuns soon was veruult metten geeste der wijsheyt, Want Mose hadde sijn handen op hem geleyt, Ende die kinderen van Israel die hoorden hem, ende deden so die HERE Mose gheboden hadde,

10

Ende daer en stont voort meer gheen alsulcken Propheet in Israel op als Mose, ⁺ den welcken die HERE bekende van aengesichte tot aengesichte,

+ D vers 10

11

in alle teekenen, ende wonderen, daer hem die HERE toe sandt dat hijse doen soude in Egipten lant aen Pharao, ende aen alle sine knechten, ende aen alle sijn lant,

12

ende tot alle dese machtighe hant, ende grote visioenen, die Mose dede voor die ooghen van alle Israel.

Hier na volcht dat boeck van Iosua