Den Bybel met groter neersticheyt ghecorrigeert (Liesveltbijbel 1542)

Moses gheeft hier den volcke eenen goeden wensch, ende een seegheninghe, als voor sijn laetste Adieu.

Dat .xxxiij. Capittel

1

⁺DIt is die gebenedidinge daer mede dat Mose die man Gods die kinderen van Israel voor sijn doot gebenedide, seggende,

+ A vers 1

2

Die HERE is hem van Sinai gecomen, ende hi is hen opgegaen van Seir, Hi is voortgecomen vanden berge Paran, met veel duysent heyligen, tot sijnder rechter hant, is een vierige wet bi hem,

3

Hoe heeft hi die lieden so lief. Alle sijn heyligen sijn in sijnder hant, Si sullen tot uwen voeten comen, ende si sullen van uwen woorden nemen.

4

Moses heeft ons die wet gheboden, die eruen der ghemeynten Iacob,

5

Ende hy was in die volheyt des Conincx, ende hi hielt te hoope die ouerste des volcx, metten gheslachten van Israhel

6

Ruben leeft ende en sterft niet, ende hi si cleyn van volcke.

7

Dit is die benedictie van Iuda, ende hi sprac, HERE verhoort die stemme Iude, ende brengt hem tot sinen volcke, Laet sijn handen haer vermeerderen, ende hem helpen wt sinen vianden

8

Ende tot Leui sprac hi, Vwe Volheyt ende uwe licht si na den man van uwer bermherticehydt, den welcken ghi tempteerde tot Massa, daer ghi twist hadt aen dat kijfwater,

9

Die tot sinen vader ende tot sijnre moeder spreect, Ic en sie hem niet, ende tot sinen broedere, Ic en kenne hem niet, Ende tot sinen soon, Ic en weet hem niet, die hebben uwe redenen gehouden, ende uwe verbont verwaert,

10

Die sullen Iacob uwe rechten leeren, ende Israel uwe wet, die sullen ruecwerc voor uwen nuese leggen, ende geheel offer op uwen outaer,

11

HERE gebenedijt sijn vermogentheyt, ende laet v genoeghen die wercken sijnder handen. Slaet den rugghe der geenre die teghen hem oprijsen, ⁺ ende der gheenre die hem haten, dat si haer niet op en rechten

+ B vers 11

12

Ende tot BenIamin sprac hi Die lieflicke des HEREN sal woonen in die toeuersienicheit op hem. Alle den geheelen dach sal hi ouer hem houden, ende hi sal tusschen sijn schouderen woonen

13

Ende tot Ioseph sprac hi, Sijn lant leyt in die gebenedijnge des HEREN, daer sijn edele vruchten vanden hemel, ende vanden dauwe, ende vanden afgront, die daer onder leyt,

14

Daer sijn edele rijpe vruchten vanden incomen der sonnen, ende edele rijpe vruchten der manen

15

ende vanden toppen der bergen vereyscht, ende vanden hueuelen altijt,

16

ende vander aerden, ende haer volheyt, Den goeden wille vanden genen die inden bossche woont, moet op Iosephs hooft comen, ende opten scheel des Nazareus onder sinen broederen,

17

Sijn heerlicheyt is als eenen eerstgeborenen osse, ende sijn hoornen sijn ghelijck eens eenhorens hoornen, metten seluen sal hi die volcken stooten te hoop, tot aen des werelts eynde. Dat sijn die dusenden van Ephraim, ende die duysenden Manasses

18

⁺Ende tot Zebulon sprack hi, Zebulon verhuecht v van uwen wtganc, Ende tot Isaschar, verblijt v van uwen tenten,

+ C vers 18

19

si sullen die volcken opten berch roepen ende aldaer offer offeren des gerechticheyts, Want si sullen die menichte des zees suyghen, ende versoncken schatten inden sande

20

Ende tot Gad sprac hi, Gad si gebenedijt die ruym makere, Hi woont als een leeu, ende hi rooft den arm ende den scheel.

21

Ende hi sach zijn beghin, dat aldaer der leeraren hoopen verborgen lagen, ende hi quam metten ouersten des volcx, ende hi dede die gerechticheyt des HEREN, ende sijn rechte hant aen Israel.

22

Ende tot Dan sprac hi, Dan een ionghe leeu, Hi sal vloeyen van Basan

23

Ende tot Naphtali sprac hi, Naphtali sal genoech hebben al wat hem belieft, ende hi sal vol gebenedijngen des HEREN sijn, tegent westen ende suyden sal sijn besittinge sijn

24

Ende tot Asser sprac hi, Asser si ghebenedijt met sonen, Hi si aengenaem sinen broederen, ⁺ ende doope sinen voet in olie,

+ D vers 24

25

Iser ende metael si aen sinen scoenen, V ouderdom si als uwe iuecht

26

Daer en is geen God als die God des gerechticheyts, Die opten hemel vaert die si uwe pulpe, Ende sijn heerlicheyt is in die wolcken,

27

dat is die woninge Gods vanden beginne, ende onder is hi den ram opter werelt, Ende hi sal voor v uwe vianden verdriuen, ende seggen, Weest verdoruen, Israel sal alleen sekerlijc woonen,

28

Iacobs ooge sal sijn opten lande daer coren ende most is, Ooc sal sinen hemel van dauwe druypen,

29

Wel v Israel, wie is ws gelijc? O volc dat door den HERE salich wort, die v hulpe, uwen scilt, ende dat sweert uwer glorien is, V vianden sullen versmachten, mer ghi sult op haer hoochste henen gaen