Den Bybel met groter neersticheyt ghecorrigeert (Liesveltbijbel 1542)

¶ Hier worden sommighe insettinghe verhaelt, Ende den Coninc wat hy doen sal, wort hier bescreuen

Dat .xvij. Capittel

1

⁺GHy sult rechters ende officiers in alle uwe porten stellen, ⁺ die die HERE v God v gheuen sal onder uwe gheslachten, dat si dat volc rechten, met rechten vonnissen,

+ A vers 1

+ Exodi .xxiiij ende xxxiiij.

2

ghi en sult dat recht niet buyghen, ende ghy en sult ooc gheenen persoon kennen, noch ghiften nemen, Want dye giften verblinden die ooghen der wijsen, ende verleyden die rechte saken

3

Dat ghene dat recht is, dat suldy volghen, op dat ghi leuen ende besitten moecht, dat lant dat v die HERE v God gheuen sal.

4

Ghi en sult noch bosschen noch boomen planten byden outaere des HEREN ws Gods, den welcken ghi v maect.

5

Ghi en sult v gheen colommen oprechten, die welcke die HERE v God haet,

6

Ghy en sult den HERE uwen God gheen osse oft scapen offeren dat eenighe smette heeft, oft yet quaets aen hem heeft. Want het is grouwelijc den HERE uwen God.

7

Als onder v, in eenich vander poorten, die v dye HERE v God geuen sal, beuonden wort eenich man oft wijf, die daer quaet doet voor die ooghen des HEREN ws Gods ouertredende zijn verbont,

8

ende gaet ende dient anderen goden, ende aenbidtse, het si die sonne oft mane, oft eenich heyr des hemels dat ic niet gheboden en hebbe.

9

Ende wordet v ghebootscapt, ende hoordijt, so suldy wel daer na vragen, Ende als ghy sekerlijc beuint, dat het waer is, dat alsulcken grouwelijcheyt in Israel geschiet is,

10

dan suldy den seluen man, oft dat selue wijf wtleyden, die alsulcken quaet gedaen hebben, tot uwer poorten, ghi sultse doot steenen,

11

Inden mont van twee oft drie ghetuygen sal die steruen, die die doot waert is Maer in eens ghetuyghenis mont, en sal hi niet steruen,

12

Die hant der ghetuyghen sal die eerste sijn, ⁺ om hem te dooden, ende daer na, al des volcx hant dat ghi den quaden van v doet

+ B vers 12

13

Als een sake voor dat recht v te swaer zijn sal, ⁺ tusschen bloet ende bloet tusscen hantieringhe ende hantieringhe, tusschen plage ende plage ende so wat twistighe saken zijn binnen uwer poorten, so suldy dan opstaen, ende op trecken tot der stadt, die die HERE v God vercoren heeft,

+ macha. xvij.d. Io. viij c

14

ende comen ende vragen den priesteren, ende Leuiten, ende den rechtere, die tot dier tijt sijn sal, comen ende vragen, ende die sullen v dat vonnisse seggen,

15

ende ghi sult na dien doen dat si v seggen sullen in die stede, die de HERE vercoren heeft, ende ghi sultet houden ende doen nae alle dat si v leeren sullen, Na die wet die si v leeren,

16

ende nae dat rechte dat si v seggen, suldi v houden, noch ghy en sult daer niet af wijcken, noch ter rechter noch ter slincker.

17

Ende oft yemant vermetentlijck doet, niet willende onderdanich wesen den priester, dye aldaer aen des HEREN ws Gods ambacht staet, oft den rechtere, die sal steruen,

18

ende ghi sult den quaden wt Israel doen, dat al tvolck hoore, ende vreese, ende niet meer vermetentlic en si.

19

Als ghi in dat lant comen sult, dat die HERE v God, v gheuen sal, ende besittet ende bewoonet, ende segdi Ic wil eenen coninc ouer mi setten, ⁺ gelijc alle dat volc heeft, dat om mi leyt,

+ C vers 19

20

so suldy dan hem tot eenen coninc ouer v setten, den welcken die HERE v God verkiesen sal, Ghi sult eenen van uwen broederen tot eenen coninck ouer v setten, Ghi en moecht gheenen vreemden die v broeder niet en is, tot eenen coninc ouer v setten.

21

Hi en sal niet veel rossen houden, ende hi en sal dat volc niet weder in Egipten leyden, om die menichte der rossen wille, Want die HERE heeft v gheseyt, dat ghi voort niet weder in Egipten door den wech comen en sult,

22

Hi en sal ooc niet veel wijuen nemen, dat zijn hert niet af gekeert en worde, Ende hi en sal oock niet veel siluers noch gouts vergaderen.

23

⁺Ende als hi sitten sal opten stoel sijns conincrijcx, Dese tweede wet sal hi vanden priesteren den Leuiten nemen, ende in eenen boec laten scrijuen,

+ D vers 23

24

ende dat sal hi bi hem hebben, ende hi sal daer in lesen zijn leuen lanc, op dat hi mach leeren vreesen den HERE sinen God, ende houden alle dye woorden van deser wet, ende dese seden, dat hi daer nae doe,

25

Hi en sal sijn herte niet verheffen ouer sijn broeders, ende hi en sal niet wijcken vanden gheboden, noch ter rechter noch ter slincker, op dat sijn dagen lanck wesen moghen in sijn conincrijc, hi ende sijnder kinderen in Israel.