Den Bybel met groter neersticheyt ghecorrigeert (Liesveltbijbel 1542)

Van die Paeschfeest, Pinxtfeest, ende Louertenten, Die rechters behooren rechtelick te vonncsien.

Dat .xvi. Capittel.

1

⁺HOudt die maent Abib, ⁺ op dat ghi Paesschen maken moecht met den HEERE uwen God, Want in die maent Abib heeft v dye HERE uwe God, wt Egipten geleyt inder nacht,

+ A vers 1

+ Abib is met ons den april

2

Ende ghy sult den HERE uwen God tot een Passah offeren runderen ende scapen, in die stede die dye HERE verkiesen sal, om dat sinen naem aldaer woone,

3

Ghi en sult geen geheeft broot eten op die feeste, seuen dagen suldi ongeheeft broot uwer armoeden eten, want met haesten sidy wt Egipten lant getrocken, op dat ghi gedachtich wesen moecht, alle v leuen lanc, des daechs ws wtgancx wt Egipten,

4

ende dat gheheefde en sal nyet gesien worden seuen dagen in alle uwe palen, ende ooc en sal vanden vleessche, dat tsauonts inden eersten dage geoffert is, ouer nacht niet blijuen, tot des morghens.

5

Ghi en moecht Passah niet offeren in eenige van uwen poorten, die die HERE v God v gegeuen heeft

6

sonder alleen in die stede, die de HERE v God v vercoren heeft dat sinen naem daer woonen soude, daer suldi dat Passah offeren, des auonts als die Sonne onder gegaen is, tot dier tijt als ghi wt Egipten troct,

7

ende ghi sultet coken ende eten in die stede, die die HERE v God vercoren heeft, ⁺ ende daer na keeren des morgens, ende gaen weder tot uwer tenten,

+ B vers 7

8

Ses dagen lanc suldy ongeheeft broot eten, ende inden seuenden daghe ist die vergaderinghe ende tsamenbrenginge des HEREN ws Gods, dan en suldy geen werck doen.

9

Seuen weken suldy tellen ende beghinnen te tellen alsmen begint metter sikelen in dat zaet,

10

ende ghi sult houden die feesten der weken den HEERE uwen Gode offerende een vrywillich offer van uwen handen, nae dien dat die HERE v God v ghebenedijt heeft,

11

ende ghi sult vrolijck sijn voor God uwen HERE, ghi ende v soon, ende v dochter, v knecht, v ioncwijf, ende die Leuijt die binnen uwer poorten is, die

[p. *]

vreemdelinc, die weesen ende weduwen, die onder v zijn in die stede die die HERE v God vercoren heeft, dat sinen naem daer wone,

12

Ende gedenct dat ghi een knecht in Egipten zijt geweest, ⁺ ende bout, ende doet na dese seden

+ C vers 12

13

Ghi sult die feeste der Loouertenten seuen dagen houden, als ghi vergadert hebt die vruchten dijns dorschvloers, ende der wijnperssen,

14

ende ghi sult vrolijc zijn op die feeste, ghi ende v soon, v dochter, v knecht, v ioncwijf, die Leuijt, die vreemdelinc, die weese, die weduwe, die binnen uwer poorten sijn.

15

Seuen dagen suldy den HERE uwen God die feeste houden in die stede, die die HERE vercoren heeft, want dye HERE v God sal v gebenedijen in alle dat ghene dat v incomende is, ende in alle wercken van uwen handen, Daerom suldy vrolijc zijn.

16

Driemael des iaers sal al dat manlijc is, onder v voor den HERE uwen God openbaeren, in die stede die hi vercoren heeft, op die feeste der ongeheefder brooden, op der weken feeste, ende op der loouertenten.

17

Ende nyemant en sal ydel voor den HERE openbaren, Een yegelic, na die gauen van zijnder hant, na der ghebenedijngen, die die HERE v God di gegeuen heeft