Den Bybel met groter neersticheyt ghecorrigeert (Liesveltbijbel 1542)

¶ Hoemen die valsche propheten kennen ende straffen sal.

Dat .xiij. Capittel

1

⁺ALs een propheet oft droomer onder v lieden op staen sal, ende gheuen v een teeken oft wonder,

+ A vers 1

2

ende dat teeken oft wonder volcht, daer hy af gheseyt heeft, ende seyt hy, laet ons ander goden nae volghen, die welcke ghy nyet en kent, ende hen dyenen

3

Soe en suldy dan alsulcken propheets, oft droomers woorden nyet hooren.

Want die HERE uwe God proeft v, om dat hem kennelic wesen soude, oft ghy hem van ghantser herten ende van gantser sielen lief hebt.

4

Den HERE uwen God suldy na volgen, ende hem vreesen, ende zijn geboden houden, ende zijn stemme hooren, ende hem dienen, ende hem aenhanghen.

5

Mer die propheet, oft droomer, salmen dooden om dat hy ghesproken heeft van af te keeren vanden HERE uwen God, ⁺ die v wt Egipten lant geleyt heeft, ende di vanden diensthuyse verlost heuet, ende om dat hy v wten wege stooten wilt dye v dye HERE uwe God geboden heeft dat ghi daerinne wandelen sout, op dat ghi dyen boosen van v lieden doot

+ B vers 5

6

Als uwe broeder ws vaders soon, oft uwer moeders soon, oft uwe soon, oft dochter, oft uwe wijf, dye in uwen armen leyt, oft uwe vrient dye met v is als uwe siele, v raden sal, heymelijc, ende seggen, Laet ons gaen, ende dienen andere goden dyen ghy nyedt en kent, noch v vader,

7

die onder v lieden zijn rontsom oft na bi v zijn, oft verre, van aen dat een eynde der werelt totten anderen,

8

⁺so en consenteert hem niet noch en verhoort hen niet, uwe ooge en sal hem niet sparen, noch en ontfermt hem nyedt, dat ghi hem bedect, Mer ghi sult hem dooden,

+ C vers 8

9

v handt sal die eerste op hem zijn, om hem te dooden, ende daer nae der ghemeynten handt,

10

men sal hem doot steenen. Want hi woude v trecken van den HERE uwen Godt die v wt Egipten landt, vanden diensthuyse geleydt heeft,

11

op dat alle Israel hoore ende vreese ende niet meer alsulcke quaet voor en neme onder v lieden.

12

Als ghi van eenighe stadt hoort, dye v dye HERE v God ghegeuen heeft om daer in te woonen datmen seyde.

13

Daer zijn. Belials kinderen wtghegaen onder v lieden, ende si hebben die borghers van haerder stadt verleydt, segghende Laet ons gaen ende dienen anderen goden, die ghy niet en kent,

14

dan suldy wel suecken ende verheysschen, ende vragen, ende also comen, ende beuinden die waerheyt, dat sekerlick also is

15

dat dese grouwelicheyt onder v lieden ghesciet is, dan suldi die borghers van dier seluer stadt slaen, ⁺ met die scherpte des sweerts,

+ D vers 15

16

ende ghi sultse te niet doen, met al dat daer in is, ende haer vee ooc met dye scerpte des sweerts. Ende al haren roof, suldy vergaderen midden op die strate, ende metten viere verbernen, beyde, dye stadt, ende alle haren roof, deen metten anderen den HERE uwen God, also datse eewelic op eenen hoop ligge, ende nemmermeer gesticht en worde,

17

Ende van dier vermaledijtheit en sal niet aen uwe hant hanghen, op dat die HERE vander gramschap sijns torens gekeert worde,

18

geuende v barmherticheit, ende dat hi uwer ontferme, ende dat hi v vermeerdere, also hi dat uwen vaderen ghesworen heeft, om dat ghy gehoort hebt des HEREN ws Gods stemme, houdende alle sijn gheboden, die ick v heden ghebiede, doende alle dat recht is, voor des HEREN ws Gods oogen.