Den Bybel met groter neersticheyt ghecorrigeert (Liesveltbijbel 1542)

Hi scrijft haer weder voort die insettinghen des HEREN

Dat .xij. Capittel

1

⁺DIt sijn die seden ende rechten, dye ghy houden sult, also dat ghy daer na doet int lant dat die HEERE uwer vaderen God, v gegeuen heeft om te besitten, also langhe als ghi opter aerden leeft, ⁺

+ A vers 1

+ Ex. xx c

2

Worpt omme alle die plaetsen, daer dye Heydenen (die ghi besitten sult, haren goden ghedient hebben, het si op hooghe berghen, op houelkens, oft onder groene boomen,

3

ende breect haer outaren af, breect hare calomnen in stucken, ende verbrant met vier hare bosschen, ende doet af hare afgoden, ende verdrijft haer namen van dien plaetsen.

4

Ghy en sult den HEERE uwen God also nyet doen.

5

Mer in die plaetse die v die HEERE v God kiesen sal, wt allen uwen geslachten, dat hi sinen name aldaer sal laten woonen,

6

daer suldy na vraghen ende comen daer, ende uwen brantoffere, ende uwe ander offer, ende uwe thienden, ende uwer handen Heoffer ende v gheloften, ende v vrywilligen offeren, ende die eerst geboren van uwen runderen, ende schapen daer brengen,

7

ende ghi sullet aldaer voor den HEERE uwen God eten, ende vrolic sijn, van alle dat ghi ende v huysghesin voor handen hebt, daer v die HERE uwe God in ghebenedijt heeft.

8

☞ Ghi en sult niet doen dat wi heden hier doen, een yeghelijc dat hem goet dunct,

9

want ghi en sijt tot hier toe, noch niet totter rusten gecomen, noch totten erfdeele, dat v die HERE uwe God geuen sal

10

Ghi sult ouer dye Iordaen gaen, ende int lant woonen, dat v die HERE uwe God wt deylen sal, ende hi sal v laten rusten, van alle uwe omligghende vyanden, ⁺ ende ghi sult vrolic woonen.

+ B vers 10

11

Als die HERE uwe God, een plaetse kiesen sal dat sinen naem aldaer woonen sal, so suldi aldaer brengen dat ic v ghebiede, uwen brantoffer, uwe ander offer, uwe thienden, dat Heoffer van uwen handen ende alle uwe vry gelooften, die ghi den HERE gelouen sult,

12

ende ghy sult vrolic wesen voor den HEERE uwen God, ghi ende uwe sonen, ende v dochter, ende uwe knecht ende v ioncwijf,

13

ende die Leuiten, die daer binnen uwer poorten sijn. Want si en hebben geen erfdeele met v lieden.

14

Wacht v dat ghi niet en offert uwen brantoffer in alle plaetsen die ghi siet. Mer alleene in die plaetse die de HEERE verkiest, yewers onder uwen geslachten, aldaer suldy uwen brantoffer offeren, ende doen al dat ic v gebiede.

15

Nochtans moecht ghi vlees offeren, ende eten binnen alle uwe poorten, na uwer sielen lust, na dat die gebenedijnge is, die die HERE uwe God v gegeuen heeft,

16

beyde reyne ende onreyne mogent eten, als van een Hint, oft Hert, sonder dat bloet alleene, dat en suldi niet eten, maer ghy sullet opter aerden ghieten als water.

17

Mer ghi en moecht niet eten in uwer poorten, vanden thienden van uwen grane, ⁺ van uwen moste, noch van uwen olie, noch vanden eerstgeboren van uwen runderen, van uwe schapen, oft van eenige gheloofte dye ghi gelooft hebt, oft van uwen vrywilligen offer, of vanden Hefoffer uwer handen,

+ C vers 17

18

mer alleen voor den HERE uwen God, suldijt laten eten, in de plaetse die die HEERE uwe God verkiest, Ghi ende v soon ende dochter, v knecht v ioncwijf, ende die Leuijt die binnen uwer poorten is, ende ghi sult vrolijc sijn voor den HERE uwen God, van allen dat ghi voor handen neemt.

19

Ende wacht v, dat ghi die Leuiten niet en verlaet, also lange, als ghi opter aerden leeft.

20

Als die HERE uwe God v palen verbreyden sal so hi v gesproken heeft, ende ghi dan seggen sult. Ick wil vleesch eten, als uwe siele lust heeft om vleesch te eten, dan eet vleesch, na alle uwer sielen lust,

21

Maer is die stadt verre van v, die de HERE dijn God ghecosen heeft, om dat hi sinen naem aldaer laten soude, so offert van uwen runderen, oft schapen, die die HERE v gegeuen heeft so hi v geboden heeft, ende etet in uwer poorten na al uwer sielen lust,

22

alsomen een Hint oft hert eet, muechdijt eten, ⁺ beyde reyne oft onreyne mogent euen wel eten,

+ D vers 22

23

alleen onthout, dat ghi dat bloet niet en eet.

24

Want dat bloet is der sielen, Daeromme en suldi dye siele niet eten metten vleessce, mer ghi sullet opter aerden gieten, gelijc water,

25

ende ghi en sultet daerom niet eten op dat v wel geschie, ende uwen kinderen na v, als ghy gedaen hebt, dat recht is voor den HERE.

26

Ende als ghi yet heylicht dat v toebehoort, oft geloouet, so suldi dat nemen, ende brengen in die stede

[p. *]

die de HERE vercoren heeft,

27

ende uwen brantoffer metten vleesche ende tbloet opten outaer des HEREN ws Gods doen,

28

Dat bloet van uwen offer suldy gieten opten outaer des HEREN ws Gods, ende eten dat vleesch, Siet toe, ende hoort alle dese woorden, die ic v ghebiede, op dat v, ende uwen kinderen na v, wel gae, eewelijc, als ghy dat gedaen hebt, dat recht ende behagelic is, voor den HERE uwen God.

29

Als dye HERE uwe God, voor v wech verstroyt die Heydenen daer ghi toe gaet om te besitten ende als ghijse besidt, ende in haren lande woont, so wacht v dan, dat ghi niet inden stric en valt na hen, na dien dat si verdreuen zijn voor v,

30

ende dat ghi niet en vraget na hare goden, seggende, gelijc dat volc hare goden gedient heeft also wil ic ooc doen.

31

Ghi en sult uwen HERE uwen God desgelijcx niet doen, Want si hebben haren goden gedaen, dat welcke den HERE een grouwelicheyt is ende dat welcke hi haet. Want si hebben ooc hare sonen ende dochteren metten viere verbrant haren goden.

32

Al wat ic v gebiede, dat suldi alleen houden, ende daer na doen. ☞ Ghi en sult daer nyet toe doen, noch daer niet af doen.