Den Bybel met groter neersticheyt ghecorrigeert (Liesveltbijbel 1542)

Dat erfdeel der stammen en sal niet gemengt noch verandert worden.

Dat .xxxvj. Capittel.

1

⁺ENde die ouerste vaderen vanden geslachte der kinderen Gilead, Machiers sonen, die Manasses sone was vanden geslachte der kinderen Iosephs, die quamen ende spraken voor Mose, ende voor die hooftlieden vanden ouersten vaderen der kinderen van Israel, ende spraken.

+ A vers 1

2

Mijn Heere, die HERE heeft geboden, dat ghi dat lant tot een erfdeel geuen sult, metten lote den kinderen van Israel. Ende ghy mijn Heere hebt geboden door den HERE, datmen Zelaphehad ons broeders erfdeel, geuen sal sinen dochteren,

3

ist datse yemant wt den geslachte van Israel tot eenen wijue neemt, so sal ons vaders erfdeel minder worden, ⁺ ende al dat si hebben, sal totten erfdeel van dien geslachte comen, daer si toe gecomen sijn Ende aldus wort onse erfdeel gemindert,

+ B vers 3

4

Als nv dat gulden iaer der kinderen van Israel coemt, so sal haer erfdeel totten erfdeele des gheslachts comen, daer si sijn, also wert onser vaderen erfdeel vermindert al wat si hebben.

[p. *]

5

Mose geboot den kinderen van Israel na den beuele des HEREN, ende sprac. ⁺ Dat geslachte van Iosephs kinderen heeft recht gesproken,

+ C vers 5

6

Dit ist dat die HERE gebiet Zelaphehads dochteren ende spreect, Laetse ten houwelic nemen soot hen belieft, alleen laetse houwen onder die geslachten van haren vaderen geslachten, ⁺

+ co. vij.b.

7

op dat dye erfdeelen der kinderen van Israel niet en vallen vanden eenen geslachte op dander Want een yegelijc vanden kinderen van Israel, sal bi zijnder eruen, van sijns vaders geslachte bliuen,

8

ende alle die dochteren die welcke eerfdeelen besitten onder dye gheslachten vanden kinderen van Israel, sullen te houwelijck nemen, eenen van haerder vaderen geslachte, op dat een yegelijck vanden kindeeren van Israel zijns vaders erue behoude,

9

ende dat eenich eerfdeel niet en valle vanden eenen geslachte op dat ander, mer een yegelijck blijue bi zijnder erue, onder die gheslachten der kinderen van Israel.

10

Zelaphehads dochteren, Mahela, Thirsza,

11

Hagla, Milena, ende Noa, deden so die HERE Mosi geboden hadde, ende namen te houwelijc haers vaders broeders sonen,

12

⁺vanden geslachte der kinderen Manasse, Iosephs sonen. Also bleef haer erfdeel aen dat geslachte haerder vaderen.

+ D vers 12

13

Dit sijn die geboden ende rechten die de HERE door Mose geboot den kinderen van Israel, op der Moabiten velt, aen die Iordane tegen Iericho.

Hier eyndet dat vierde boeck Mosi, Numerus.