Den Bybel met groter neersticheyt ghecorrigeert (Liesveltbijbel 1542)

Den Leuiten wort haer deel beschict, Ooc die vry steden, dat die dootslagers daer henen vlieden moghen, van onderscheydt der dootslagen.

Dat .xxxv. Capittel.

1

⁺ENde die HERE sprack tot Mose, op der Moabiten velt, aen die Iordaen tegen Iericho, ende sprac. ⁺

+ A vers 1

+ ios. xxi a

2

Gebiet den kinderen van Israel, dat si den Leuiten steden geuen van haren erfgoeden dat si ooc woonen,

3

ende die voorsteden suldi ooc den Leuiten geuen dat si in den steden woonen, ende die voorsteden hare vee ende haue ende alderley dieren houden.

4

Dat begrijp der voorsteden, dat si den Leuiten geuen sullen, sal duysent ellen buyten der stadt mueren al om hebben.

5

Aldus suldyse meten, van buyten voor die stadt, aenden hoec tegent oosten, twee duysent ellen. Ende aenden anderen hoec tegent zuyden, twee duysent ellen. Ende aenden hoec, tegent westen, twee duysent ellen, Ende aenden hoec tegent noorden, twee duysent ellen, dat die stadt in die middelt si, Dat sullen hare voorsteden sijn.

6

Ende onder die steden, ⁺ die ghi den Leuiten gheuen sult, ⁺ suldi ses vristeden geuen, dat daer in vlie, die daer dootslaet. Bouen desen suldi noch .xlij. steden geuen,

+ iosu. x.a

+ B vers 6

7

dat al die steden die den Leuiten gegeuen zijn .xlviij. sijn sullen met haren voorsteden,

8

Ende dese steden diemen den Leuiten geuen sal, vanden kinderen van Israels erfdeele, salmen dmeeste nemen vanden genen die meest besitten, ende dminste van dien die minst besitten.

9

Een yegelic na zijn erfdele dat hem toegedeylt wort, sal den Leuiten steden geuen

10

Ende de HERE sprac met Mose seggende ⁺ Spreect metten kinderen van Israel, ende segt hen,

+ deu. xix.a

11

Als ghi ouer die Iordane coemt int lant Canaan, suldi steden verkiesen om vry steden te sine, dat daer in vliet die eenen dootslach onwetende doet,

12

ende alsulcke vrysteden sullen onder v lieden sijn voor den wreker des bloets dat hi niet steruen en moet, die eenen dootslach ghedaen heeft, tot dat hi voor dye gemeynte te rechte ghestaen heeft,

13

Ende van die steden dye ghi geuen sult, sullender ses vri steden sijn.

14

Drie suldy geuen op dese side van die Iordane, ende drie int lant Canaan, Dat sijn die ses vrysteden beyde den kinderen van Israel,

15

ende den vreemdelinghen ende den huysgenooten onder v dat ghi daer vliet, dye een siele gheslaghen heeft onwetende.

16

So wie yemanden met een yseren wapen slaet, dat hi sterft, die is een dootslager ende sal die doot steruen,

17

⁺Worpt hi hem met eenen steen (daer yemant mede ghedoot mach worden) dat hi sterft, soo is hy een dootslager ende sal die doot steruen,

+ C vers 17

18

Slaet hi hem met een houten hantwapen, daer yemant mede doot geslagen mach worden) dat hi sterft, so is hi een doodt-slager ende sal de doot steruen,

19

de wreker des bloets sal den dootslager ter doot brengen,

20

so hi geslagen heeft so salmen hem weder dooden. Stoot hi hem wt hate oft worpt wt list yet dat hi steruet,

21

oft slaet hem wt vyantscap met sijnder hant, dat hi sterft, so sal hi die doot steruen die hem geslagen heeft. Want hi is een dootslager die wreker des bloets sal hem ter doot brengen.

22

Ende als hi hem bi misual raect sonder viantschap, oft worpt hi eenige wapen op hem sonder list,

23

oft eenighen steen, daer af dat hi steruen mach, ende en heuet niet gesien, oft op hem worpet dat hi sterft, ende hi en is sijn vyant niet, noch hi en wilde hem ooc niet quaets,

24

soo sal die gemeynte rechten tusscen hem, ende dye hy geslagen heeft, ende tusscen den wreker des bloets in desen rechte

25

ende die gemeynte sal den dootslager verlossen van die hant des bloets wrekers, ende sal hem weder laten comen tot die vrystaet, daer hi in gheuloden was, ende hi sal aldaer dienen, tot dat die hooge priester sterft, dyemen metter heyligher olyen gesalft heeft.

26

Mer ist dat die dootslager buyten dye palen van sijnder vryer stadt gaet, daer hi in geuloden is,

27

⁺ende die bloetwreker vint hem buyten dye palen van sijnder vryer stadt, ende slaet hem doot, die en sal niet sculdich sijn des bloets,

+ D vers 27

28

want hi soude in sijn vrystadt blijuen tot dat die hooge priester doot ware, ende na des hoogen priesters doot, weder totten lande van sinen erfgoede comen,

29

Dat sal v een wet des rechts sijn, by uwe nacomelingen, in alle uwe wooninghen.

30

Den dootslager salmen dooden, na den mont van twee getuygen, Een getuyge en sal niet antwoorden ouer een siele totter doot.

31

Ende ghi en sult geen versoeninge nemen, ouer die siele des dootslagers, want hi is die doot schuldich, mer hi sal die doot steruen,

32

Ende ghi en sult van dien dye wt sijnder vrystadt gheuloden is gheen versoeninge nemen, dat hi weder int lant come, eer die priester sterft.

33

Ende en sceyndet dat lant niet, daer ghi in woont want wie des bloets schuldich is, die scheyndet dat lant, ende dat lant en can nyet vanden bloede versoent worden, dat daer in gestort is, sonder alleen door dat bloet vanden genen die dat gestort heeft,

34

En ontsuuert dat lant niet daer ghi inne woont, daer ic ooc in woone. Want ic ben dye HERE, die onder dye kinderen van Israel woont.