Den Bybel met groter neersticheyt ghecorrigeert (Liesveltbijbel 1542)

Eenen yegelijcken tijt wort haren offer bestelt.

Dat .xxviij. Capittel.

1

⁺ENde die HERE sprac met Mose, seggende, Gebiet den kinderen van Israel, ende segt tot hen.

+ A vers 1

2

Den offer mijns broots, dat welcke mijn offer is des sueten ruecks suldy houden tsijnder tijt, dat ghijt my offert, ende segt hen.

3

Dit sijn die offerhanden die ghi den HERE offeren sult, iarige lammeren, die sonder smette sijn, dagelicx twee totten dagelijcken brantoffer,

4

dat een lam des morghens, dat ander aenden auont.

5

Ende ooc een thiendendeel van Epha bloemen meels, totten spijsoffer, met olye gemengt, die gestooten is, een vierendeel van Hin,

6

dat is een dagelicx brantoffer, dat ghy offerde aenden berch Sinai, tot eenen sueten ruec des offers den HERE,

7

Ende ooc sinen drancoffer, tot eenen lamme, een vierendeel van een Hin,

8

ende dat sal int heilichdom gegoten worden, tot een ghifte den HERE Dat ander lam suldi omtrent den auont bereyden, gelijc dat spijsoffer den morgens, ende sijn dranckoffer des sueten ruecx den HEERE

9

⁺Ende opten sabbath dach suldi offeren twee iarighe lammeren onbesmet, ende twee tiendendeel bloemen meels tot eenen spijsoffer, met olye gemengt, ende sijn drancoffer.

+ B vers 9

10

Dat sal sijn dat brantoffer, van elcken sabbath bouen dat dagelicx brantoffer met sinen drancoffer

11

Ende inden eersten daghe, van uwen maenden, suldy den HERE een brantoffer offeren, twee ionge verren, eenen ram, seuen lammeren van eenen iare sonder smette,

12

ende ooc drie tiendendeel bloemen meels tot eenen spijsoffer met olie gemengt tot eenen verre,

13

ende twee tiendendeel bloemen vanden meele, tot een spijsoffer, met olye ghemengt, tot eenen ramme, ende ooc een tiendendeel bloemen vanden meele totten spijsoffer, met olie ghemengt, tot eenen lamme Dit is dat drancoffer des sueten ruecx, een offer den HERE,

14

ende haer drancoffer sal zijn een half Hin wijns, tot eenen verre een derdendeel Hin, tot den ramme, een vierendeel Hin, tot den lam. Dit is dat brantoffer van elcker maent des iaers,

15

Ende men sal ooc eenen boc offeren tot een sondoffer, ende den HERE bereyden tot eenen dagelijcscen brantoffer, ⁺ ende sinen drancoffer

+ C vers 15

16

Ende inden veerthiensten dage der eerster maent, ist den paesscen des HEREN,

17

ende inden .xv. daghe der seluer maent is die feeste. Seuen dagen salmen ongeheeft broot eten. ⁺

+ Exo. x.a.

18

Den eersten dach heet heylich, geen dienstwerc en suldi daer inne doen,

19

Ende sult den HERE brantoffer offeren, twee ionge verren, eenen ram, seuen lammeren van eenen iare sonder smette, met haren spijsoffer,

20

Drie thiendendeel bloemen vanden meele met olie gemengt, op eenen verre, ende twee thiendendeelen opten ram,

21

ende een thiendendeel op een lam

22

ende also ouer alle die seuen lammeren, ende eenen boc tot een sondoffer datmen v versoene.

23

Ende also suldy tsmorgens doen sonder dat brantoffere, dat een dagelicx brantoffer is,

24

Also suldi alle dage, die seuen dagen lanc dat broot offeren, tot een offer des sueten ruecx den HERE, ⁺ totten daghelicschen brantoffer, ende ooc sijn drancoffer.

+ D vers 24

25

Ende den seuenden dach sal bi v lieden heylich heeten, geen dienstwerc en suldy daer in doen

26

Ende den dach der eerstelinghen inden welcken ghi den HERE dat spijsoffer des maents offert in uwen weken, die sal v heylich heeten, gheen dienstwerc en suldy daer inne doen,

27

Ende ghi sult den HERE brantoffer offeren, tot eenen sueten ruec, Twee ionghe verren, eenen ram, seuen iarige lammeren,

28

met haren spijsofferen drie tiendendeel bloemen meels, met olie ghemengt, op eenen verre, twee tiendendeel totten ram.

[p. *]

29

een thiendendeel op een lam, ende also op die seuen lammeren,

30

ende eenen boc om v te versoenen. Dit suldy doen, behaluen dat dagelicx brantoffer, met sinen spijsoffere sonder smette sullen si sijn, Ende haer drancoffer oock.