Den Bybel met groter neersticheyt ghecorrigeert (Liesveltbijbel 1542)

MirIam sterft in Cades, Tvolc twist met Mose ende Aaron, van ghebreck des waters. Die HEERE die geeft haer water wter steenrootsen, Moses begeert aen Edom, datet volc mach door trecken, Aaron sterft opten berch.

Dat .xx. Capittel.

1

⁺ENde die kinderen van Israel quamen met alle die gemeynte inde woestine Zin in die eerste maent, ende dat volc bleef te Kades, Ende MirIam sterf aldaer, ende si werdt aldaer begrauen.

+ A vers 1

2

Ende dye gemeynte en had geen water, ende si vergaderden hen tegen Mose ende Aaron.

3

† Ende dat volc hadde twist teghen Mose ende sprac, Och hadden wi vergaen doen onse broeders verginghen voor den HERE,

4

Waerom hebdy dye ghemeynte des HEEREN in dese woestijne ghebracht, dat wi hier steruen souden met onsen vee?

5

ende waerom hebdy ons wt Egypten geleyt in desen quaden hoeck, daermen niet saeyen en can, daer noch vigen noch wijnstoc, noch granaet appelen en sijn, ooc en isser gheen water te drincken.

6

Mose ende Aaron, ghinghen vander ghemeynten totter duere der tenten des ghetuychnis, ende vielen op haer aensicht, Ende die heerlicheit des HEREN openbaerde hem, ⁺

+ ex. xvi b

7

Ende die HERE sprac met Mose seggende.

8

Neemt een roede ende verghadert die ghemeynte, ghi ende v broeder Aaron, ende spreect totten steen, voor hare oogen, die steen sal sijn water gheuen Also suldi hen water wt den steen doen comen, ende die ghemeynte te drincken geuen, ende hare vee

9

Doen nam Mose die roede die voor den HEERE was, so hi hem geboden hadde,

10

ende Mose ende Aaron vergaderden die ghemeynte voor den steen ende sprac tot hen lieden. Hoort ghi wederspannighen

11

Sullen wi v ooc water slaen wt den steen, Mose hief sijn hant op, ende sloech den steen metten stocke tweemael, doen quam daer veel waters wt, dat die ghemeynte dranc, ende haer vee

12

Ende die HERE sprac tot Mose ende Aaron, om

[p. *]

dat ghi aen mi niet ghelooft en hebt, dat ghi mi heylichdet voor den kinderen van Israhel, en suldy dese ghemeynte niet brenghen in dat lant, dat ic hen gheuen sal.

13

Dit is dat kijfwater, daer die kinderen van Israel twist hadden tegen den HERE, ende hi wert gheheylicht aen haer lieden. *

14

⁺Ende Mose sant boden wt Kades, tot den coninck der Edomiten, Also laet v, uwe broeder Israel seggen.

+ C vers 14

15

Ghi weet alle die moeyte die ons beuaen heeft, hoe dat onse vaders neder ghingen in Egypten, ende wi lange tijt in Egypten gewoont hebben, ende die Egiptenaren hanteerden ons, ende onse vaders qualijc

16

Ende wi riepen totten HERE, die verhoorde onse stemme, ende sant sinen Engel, ende leyde ons wt Egipten,. Ende siet, Wi sijn te Kades in die stede aen uwe palen,

17

laet ons door v lant trecken, Wi en sullen noch door ackers noch door wijngaerden gaen, noch geen water drincken van uwen putten, Wy sullen door dye Heyrstrate reysen, noch ter rechter, noch ter slincker wijcken, tot dat wi door uwe palen comen

18

⁺Die Edomiten antwoorden hen, ghi en sult niet door mi trecken, oft ic sal v metten sweerde tegen comen.

+ D vers 18

19

Die kinderen van Israel spraken tot hem. Wy sullen op die ghebaende strate trecken, ende drincken wi v water, wi ende onse vee, so sullent wi betalen, wi en willen niet dan te voet door trecken, Ende hi antwoorde. Ghi en sulter niet door trecken.

20

Ende die Edomiten trocken wt, hen te ghemoete, met machtighen volcke, ende stercke hant.

21

Alsoo weygerden die Edomiten Israel, ende misgunden door sijn palen te trecken Ende Israel weec van hem

22

Als die kinderen van Israel opbraken van Kades, ende quamen met al die gemeynte te Hor, aent geberchte.

23

Ende die HERE sprac met Mose ende Aaron te Hor aent geberchte, aen die palen vanden lande der Edomiten, ende sprac.

24

Laet Aaron vergadert worden tot sinen volcke Want hi en sal niet in dat lant comen, dat ic den kinderen van Israel gegeuen hebbe ⁺ om dat ghi wederspannich geweest sijt mijnen monde byden Kijfwatere.

+ Deu. x. xiij.g

25

Neemt Aaron ende sinen sone Eleazar, ende leytse opten berch Hor,

26

ende trect Aaron sijn cleederen wt, ende trecktse Eleazar sinen sone aen, ende Aaron sal daer vergadert worden, ende steruen

27

Ende Mose dedet so hem die HERE gheboden hadde, ende clommen op te Hor, int gheberchte, voor alle die ghemeynte.

28

Ende Mose troc Aaron sine cleederen wt, ende trocse Eleasar sinen soon aen, Ende Aaron sterf aldaer bouen opt gheberchte.

29

Ende Mose ende Eleasar quamen neder vanden berghe Ende als alle die gemeynte sach dat Aaron wech was, beweenden si hem .xxx. dagen, alle dat huys van Israel.