Den Bybel met groter neersticheyt ghecorrigeert (Liesveltbijbel 1542)

Vanden doodtoffere der iongher calueren, Ende hoe vanden asschen een water der reyninghen ende ontsondingen soude ghemaect worden.

Dat .xix. Capittel.

1

⁺ENde die HERE sprack met Mose ende Aaron seggende. Dese sede sal een wet sijn dat die HERE geboden heeft ende gheseyt,

+ A vers 1

2

Segt den kinderen van Israel dat si tot v brengen een roode koe sonder smette, die geen gebrec en heuet, ende daer noch geen iock op en heeft gheweest,

3

ende geeftse den priester Eleazar, die salse wtleyden voor den leger, ende aldaer voor hem laten staen.

4

Ende Eleazar die priester, sal van haren bloede met sinen vinger nemen, ende sprengent seuenmael tegen die tente des getuychnis,

5

⁺ende die koe voor hen laten verbernen, beyde haer vel ende haer vleesche, oock haer bloet met haren meste.

+ B vers 5

6

Ende die priester sal Cederen hout ende Ysope, ende roset roode wolle nemen, ende op die barnende koe worpen,

7

ende hi sal sijn cleederen wasscen, ende sijn lijf in water baden, ende daer na inden leger gaen, ende onreyn sijn totten auont.

8

Ende diese verbrant heeft sal oock sijne cleederen met water wasschen, ende sijn lijf int water baden, ende onreyn sijn totten auont.

9

Ende een suyuer man sal dye asschen vander koe op rapen, ende schuddense buyten den leegher, in een suyuer plaetse dat si aldaer bewaert worde, voor die gemeynte der kinderen van Israhel tot een bespreng water, want het is een sondoffer,

10

Ende die ghene die die asschen vander koe opgeraept heeft sal sijn cleederen wasschen ende onreyn sijn totten auont Dat sal een eewich recht sijn den kinderen van Israel, ende den vreemdelingen die onder v woonen.

11

⁺So wie eenen dooden mensche raect, die sal seuen dagen onreyn sijn,

+ C vers 11

12

die sal hem met desen water ontsondigen, ten derden dage, ende ten seuenden dage so sal hi suyuer sijn. Ende en ontsondicht hi hem niet ten derden dage, ende ten seuenden daghe, soo en sal hi niet suyuer worden.

13

Als yemant eenigen dooden mensch geraect ende hem niet ontsondighen en wilt, die ontreynicht die wooninghe des HEREN, ende alsulcken siele sal wtgheroeyt worden wt Israhel, om dat ouer haer dat sprenghe water niet gheworpen en is, daerom is si onreyn also lange als si haer daer af niet en laet reinigen

14

Dit is de wet als een mensche in die tente sterft Wie dat in die tente gaet, ende al wat in die tente is, sal seuen dagen onreyn sijn,

15

Ende alle open vat dat geen decsel noch scheel en heeft, is onreyn,

16

ooc wie dat inden velde eenen verslagenen metten swaerde raect oft eenen dooden, oft eens menschen been, ofte graft die is seuen dagen onreyn.

17

So sullen si dan nemen voor den onreynen, asschen van desen verbranden sondoffer, ende doen daer leuende water op in een vat,

18

ende een suuer man sal ysope nemen, ende int water doppen, ende die tente besprengen, ende alle die gereetschap, ende alle die sielen die daer in sijn, Also ooc den genen die des dooden oft verslaghens been oft dooden, oft graf geraect heeft,

19

Ende dye suyuere sal den onsuyueren ten derden, ende ten seuenden dage besprengen, ende hem ten seuenden dage ontsondigen Ende hi sal sijn cleederen wasschen, ende hem int water baden, so wort hi des auonts reyn

20

⁺So wie onreyn sijn sal, ende hem niet ontsondigen en wilt, dies siele sal wtgeroeyt worden wter ghemeynten, Want hi heeft dat heylichdom des HEREN ontreynicht, ende en is metten bespreng water niet besprengt, daerom is hi onsuyuer.

+ D vers 20

21

Ende dit sal hen een eewich recht sijn. Ende dese die metten bespreng water besprent heeft, sal sine cleederen ooc wasschen

22

Ende wie dat besprengwater raect, sal onsuyuer sijn totten auont, Ende al dat hi raet, sal onsuyuer worden, Ende so wat siele dat hi raken sal, sal onreyn sijn totten auont.