Den Bybel met groter neersticheyt ghecorrigeert (Liesveltbijbel 1542)

¶ Vanden silueren trompetten, hoe datmen die ghebruycken sal. Hoe die kinderen Israels op braken, ende met Hobab Moses swagher wech toghen.

Dat .x. Capittel

[afbeelding]

1

⁺ENde die HERE sprack tot Mose segghende,

+ A vers 1

2

Maect twe trompetten van geslagen siluer, dat ghise gebruyct om die gemeynte daer mede tsamen te roepen, ende als dat heyr op trecken sal,

3

So wanneer datmen met beide den trompetten slechtelic blaest so sal haer die geheele gemeynte vergaderen tot v voor die duere der tenten des getuygenis,

4

Ende wanneer datmen alleen met eender slechtelic blaest, so sullen tot v vergaderen die hooftlieden, die ouerste ouer duysenden in Israel.

5

Als ghi tromt so sullen die legeren op breken die tegent Oosten liggen.

6

Ende als ghy ten tweeden male trompt, so sullen die legheren op breken die tegen tzuytwaert ligghen, want als si reysen sullen so suldy trompen.

7

Als de gemeynte te vergaderen is suldi blasen, ende niet trompen.

8

Aarons des priesters sonen, sullen aldus metten trompetten blasen, Ende tsal v recht sijn eewelijc, bi uwen nacomelingen.

9

⁺Als ghi in eenen strijt trect, in v lant, tegen uwe vyanden die v quellen, so suldi trompen metten trompetten, op dat uwer ghedacht worde voor den HERE, ende verlost wert van dijnre vyanden handen,

+ B vers 9

10

des selfs gelijcken, als ghi vrolic sijt, ende in uwen feesten, ende in uwe nyeuwe maenden, so suldy met den trompetten blasen, ouer uwe brantoffer ende dootoffer, dattet v si tot een ghedachtenis, voor uwen God, Ic ben die HERE uwe God.

11

Inden twintichsten daghe, in die tweede maent des tweeden iaers verhief haer die wolcke op vanden tabernakel des getuygenis,

12

ende die kinderen van Israel trocken bi haren scharen wt der woestinen Sinai ende die wolcke bleef in die woestijne Paran.

13

Die eerste braken op na den woorde des HEEREN, door Mose,

14

te weten de banier des legers der kinderen van Iuda, trock ten eersten met haren heyr, ende ouer haer heyr was Nahesson, Aminadab soon,

15

Ende ouer dat heyr des geslachts der kinderen Isaschar, was Nathaneel Zuar soon,

16

Ende ouer theyr des gheslachts der kinderen Sebulon, was Eliab Helon soon,

17

ende men dede den tabernakel af, ende doen trocken Gersons kinderen ende Merari, ende droegen den tabernakel

18

Daer na trock die baniere des leeghers Ruben met haren heyre, ende ouer dat heyr, was EliZur, Sedeur soon,

19

Ende ouer dat heyr des geslachts der kinderen Simeons, was Selumiel Zuri Sadai soon

20

Ende Eliasaph Reguel soon, ouer dat heyr des gheslachts der kinderen Gad,

21

Doen trocken ooc dye Kathathiten, ende droegen dat heylichdom, ende rechten den tabernakel op, ⁺ op dat si binnen quamen.

+ C vers 21

22

Daer na trock die baniere des leeghers der kinderen Ephraim, met haren heyre, ende ouer dat heyr was Elisama, Amihud sone.

23

Ende Gamaliel Peda-

[p. *]

Zur soon, ouer dat heyr des geslachts der kinderen Manasse,

24

ende Abidan Gideons sone. Ouer dat heyr des geslachts der kinderen BenIamin.

25

Daer na trock die baniere des leeghers der kinderen Dan, met haren heyr, ende so waren die leegers alle op, Ende AhiEser AmmiSadai soon, was ouer haer heyr,

26

ende Pagiel Achran soon, was ouer dat heyr des geslachts der kinderen Asser,

27

Ende Ahira Enan soon, was ouer dat heyr des geslachts der kinderen Naphthali,

28

Also trocken die kinderen van Israel met haren heyren.

29

Ende Mose sprack tot sinen swagher Hobab, Reguels soon van Midian, Wi trecken derwaerts na die stede daer die HERE af geseyt heeft, ic wilse v geuen, so coemt nv met ons, so willen wi dat beste met v doen, Want die HERE heeft Israel goet toe geseyt,

30

Mer hi antwoorde, Ic en wil met v niet, mer ic wil in mijn lant tot mijnen maechscap trecken,

31

ende Mose sprac. En verlaet ons doch niet, want ghi weet waer wi in dese woestijne onsen leeger sullen stellen, ende sult onse ooge sijn,

32

ende als ghi met ons trect wat die HERE ons goets doet, dat willen wi aen v doen.

33

Also trocken si vanden berghe des HEREN drie dachreysen, ende die arcke des verbonts des HEEREN, trock voor hen, die drie dachreysen om hen te wijsen waer si rusten souden.

34

Ende de wolcke des HEREN was des daechs ouer hen, als si wt den leeger trocken.

35

Ende als die arcke troc, so sprac Mose, HERE, staet op, laet v vyanden verstroeyt, ende die v haten vluchtich worden voor v,

36

ende als si ruste, so sprack hi, coemt weder HERE, totter menichten der dusenden van Israel.