Den Bybel met groter neersticheyt ghecorrigeert (Liesveltbijbel 1542)

Hier wort verboden datmen vanden afgod Molech niet geuen en sal, ende noch meer andere worden hier verboden.

Dat .xx. Capittel

1

⁺ENde die HERE sprack met Mosi seggende,

+ A vers 1

2

Segt den kinderen van Israel, Wie dat vanden kinderen van Israel, oft een vreemdelinck dye in Israel wonet, van sinen sade den Molech geeft,

[p. *]

die sal die doot steruen, dat volc des lants sal hem steenen,

3

ende ic sal mijn aensichte setten tegen alsulcken mensche, ende sal hem wt sinen volcke wtroeyen, om dat hy den Molech van sinen sade gegeuen heeft, ende mijn heylichdom ontreynicht, ende mijnen heyligen naem ontheylicht heeft.

4

Ende indien dat volc des lants door die vingheren sien sal, den mensche die van sinen sade den Molech ghegeuen heeft, dat si hem niet en doden,

5

⁺soo sal ick mijn aensicht tegen den seluen mensche setten, ende tegen sijn geslachte, ende sal hem, ende alle die mede ghehoereert hebben aenden Molech, wt haren volcke wtroeyen

+ B vers 5

6

Als een siele haer keert totten waerseggeren ende teekenbedieders, dat si hem na hoereren, so sal ic mijn aensicht tegen die selue siele setten, ende salse wt haren volcke wtrucken, ⁺

+ nu. xi.d ios. iij.b.

7

Daerom heilicht v, ende weset heylich, want ic ben heylich uwe God,

8

ende hout mijn settinghen, ende doetse, want ic ben die HERE, die v heylicht.

9

Wie dat sine vader oft moeder vloect, die sal die doot steruen, sijn bloet op hem, om dat hi sijn vader oft moeder gheuloect heeft.

10

Wie dat ouerspel doet met eens anders wijf, die sal die doot steruen, beyde die ouerspeelder, ende die ouerspeelster, om dat hi met sijns naesten wijf dat houwelijck ghebroken heeft.

11

Wie dat bi sijn stiefmoeder slaept, ⁺ dat hi sijns vaders schamelheyt ontdect heeft, die sullen beyde dye doot steruen, haer bloet si op hen.

+ Ie. xvi d exo. xi.c pro. xx c

12

Als yemant bi sijns soons wijf slaept, so sullen si beyde die doot steruen, wandt si hebben een schande ghedaen, haer bloet si op hen.

13

Als yemant bi een knechtken slaept, gelijc by eenen wijue, die hebben een grouwelicheyt ghedaen, ende sullen beyde die doot steruen, haer bloet si op hen.

14

Als yemant een wijf neemt ende hare moeder ooc daer toe, ⁺ die heeft eenen lachter ghewrocht, men sal hem met viere verbernen, ende haer ooc, datter geenen laster en blijue onder v.

+ deu xxij

15

Als yemant by eender beesten oft vee leyt, die sal die doot steruen, ende dat vee salmen dooden.

16

Als een wijf haer tot eenigen vee doet, daer si mede te doen heeft, die suldy dooden, ende dat vee oock, si sullen die doot steruen, haer bloet si op hen.

17

Als yemant sijn suster neemt, sijns vaders dochter, oft sijnder moeder dochter, ende haer schamelheit besiet, ende si weder sijn schamelheyt besiet, dat is een schande, Die sullen wtgeroeyt worden, voor die lieden haers volcx, ⁺ Want hi heeft sijnder suster schamelheit ontdect, hi sal sijn schult draghen.

+ C vers 17

18

Als een man bi eenen wijue slaept, ter tijt haerder crancheyt, ende ontdect haer scamelheit, ende ontdect hare fonteyne, ende si ontdect die fonteyne haers bloets, die sullen beyde van haren volcke wtgeroeyt worden.

19

Die scamelheit uwer moeder suster, ende ws vaders suster scamelheit en suldi niet ontdecken, want aldusdanige heuet sijn naeste bloetvriendinne ontdect, ende si sullen haer schult draghen.

20

Als yemant bi sijns vaders oft moeders broeders huysurouwe slaept, ende ontdect die scamelheyt sijns maechschaps, die sullen haer sonde draghen, sonder kinderen sullen si steruen.

21

Als yemant sijns broeders wijf neemt, dat is een onreyn dinck, si sullen sonder kinderen zijn, om dat hi sijns broeders schamelheyt ontdect heeft.

22

So hout nv dan alle mijn settingen, ende rechten, ende doetse, op dat v dat lant niet wt en spouwe,

23

daer ic v in leyde, dat ghi daer in wonen sout, ende en wandelt niet in de insettingen der heydenen, die ic voor v wtstoten sal Want dit hebben si alle gedaen, ende ic hebse veronwaert.

24

Mer v lieden segghe ic, ghi sult haer lant besitten ⁺ Want ic sal v gheuen een lant tot eender erffenissen, daer melck ende honich in vloeyt,

+ D vers 24

25

Ic ben dye HERE v God, die v afghescheyden heb vanden volcken, dat ghi ooc sult scheyden dat reyne vee, vanden onreynen ende onreyne voghelen, vanden reynen, ende uwe sielen niet en ontreynicht aenden vee, aenden vogelen, ende aen alle datter opter aerden cruypt, die ic afghesceyden heb dat het onreyn si,

26

daerom suldi mi heylich sijn, want ic ben heylich die HERE, die v afghescheyden heeft vanden volcken, dat ghi mijn sout sijn.

27

Als een man oft een wijf een waersegger, oft teekenbedieder sijn sal, die sal die doot steruen, men salse steenen, haer bloet si op hen.