Den Bybel met groter neersticheyt ghecorrigeert (Liesveltbijbel 1542)

Van die graden der swagherschap, ende maechschap, Ende hoe dattet betame den manne metten wijuen te vereenighen inden houwelick, ende hoe niet.

Dat .xviij. Capittel

1

⁺ENde die HERE sprac met Mosi, seggende,

+ A vers 1

2

spreect metten kinderen van Israel ende segt tot hen, Ic ben die HERE uwe God,

3

ghi en sult niet doen, na den wercken des Egiptschen lants, daer ghi inne gewoont hebt. Ooc niet nae die wercken des lants Canaan, daer ic v brenghen sal,

4

Ghi en sult ooc nae haren rechte niet houden, mer alleen na mijnen rechte suldy doen, ende mijn insettinghe suldy houden, dat ghi daer in wandelt, Want ic ben die HERE v God

5

daerom suldi mijn insettingen houden, ende mijn rechten, Want die mensche die die selue doet, die sal daer door leuen, want ick ben die HERE.

6

⁺Nyemant en sal hem tot sijnder naester bloet vriendinne doen, om haer scamelheyt te ontdecken, want ic ben die HERE.

+ B vers 6

7

Ghi en sult ws vaders ende ws moeders schamelheit niet ontdecken. Het is uwe moeder, daerom en suldi haer scamelheit niet ontdecken,

8

Ghi en sult ws vaders wijfs schamelheit niet ontdecken want het is ws vader schamelheyt.

9

Ghi en sult ws susters scamelheit, dye ws vaders ofte ws moeders dochter is, die thuys oft buyten geboren is, niet ontdecken,

10

Ghi en sult ws soons ofte uwer dochters dochter scamelheyt niet ontdecken, want het is uwe schamelheit,

11

Ghi en sult ws vaders wijfs dochter die si uwen vader ghebaert heeft, ende v suster is, haer schamelheit niet ontdecken.

12

Ghi en sult ws vaders suster scamelheit niet ontdecken, want het is ws vaders naeste bloet vriendinne.

13

Ghi en sult ws moeders susters scamelheyt niet ontdecken, want tis ws moeders naeste bloet vriendinne

14

⁺Ghi en sult ws vaders broeders scamelheit niet ontdecken, dat ghi sijn wijf neemt, want si is v maechschap geworden.

+ C vers 14

15

Ghi en sult niet ontdecken uwer behouder dochteren scamelheit, want het is ws soons wijf, daerom en suldi haer scamelheit niet ontdecken

16

Ghi en sult ws broeders wijfs scamelheyt niet ontdecken, want het is ws broeders schamelheyt.

17

Ghi en sullet ws wijfs met haerder dochter scamelheit niet ontdecken, noch haers soons dochter, oft dochter dochter nemen, om haer scamelheit te ontdecken, want het is haer naeste bloet vriendinne, ende het is eenen lachtere.

18

⁺Ghi en sult ooc geen wijf nemen met haerder suster, haer scamelheit te ontdecken, al die wijle si noch leeft,

+ D vers 18

19

Ghi en sult nyet totten wijue gaen die wijle dat si haer crancheit heuet, in haer onreynicheit, om haer schamelheyt te ontdecken.

20

Ghi en zult niet by ws naesten wijf liggen, om met haer te doen te hebben, daer mede dat ghy v aen haer ontreynicht.

21

Ghi en zult ooc uwe zaet niet gheuen dattet den Molech verbrant worde, ⁺ dat ghi niedt en ontheylicht den naem ws Gods want ic ben die HERE

+ Molech was een afgod die haer eygen kinderen tot dienst verbranden ghelijck Manasses dede die coninc van iuda, si meynden God daer mede te dienen ghelijc Abraham dede doen hy sinen sone Isaac offerde, door Godes beuel.

[p. *]

22

Ghi en sult niet bi een knechtken liggen, ghelijc bi een wijf, want het is een grouwelicheyt,

23

Ghy en sult ooc bi geen beeste ligghen, dat ghi met haer veronreynt wort, Ende geen wijf en sal met een beeste te doene hebben, Want het is een grouwelicheyt.

24

Ghi en sult v in gheenen van desen veronreynighen, Want in allen desen hebben haer die heydenen veronreynicht, die ic voor v wech sal wtstooten,

25

ende dat lant is daer door ontreynicht, ende ic sal haer misdaet aen haer versoecken, dat dat landt sijn inwoonders wtspouwe,

26

Daerom hout mijn settingen ende rechten, ende en doet niet een van desen grouwelicheden noch die ingeboren, noch ooc vreemdelinc die onder v is,

27

want alle alsulcken grouwelicheden hebben die lieden van desen lande ghedaen, die voor v waren, ende hebben dat lant ontreynicht,

28

op dat v oock dat lant niet wt en spouwe als ghijt ontreynicht, ghelijct die heydenen heeft wtgespogen die voor v waren,

29

Want so wie dese grouwelicheit doen, dier sielen sullen wtgheroeyt werden van haren volcke,

30

Daeromme hout mijne insettinghen, dat ghi niet en doet nae die grouwelike seden, der gheenre die voor v waren, dat ghy daer mede niet ontreynicht en wort, want ic ben die HERE uwe God.