Den Bybel met groter neersticheyt ghecorrigeert (Liesveltbijbel 1542)

¶ Van brantofferen ende ander offeren, Oock wat die priester offeren sal inden daghe sijnder saluinghe.

Dat .vi. Capittel.

1

⁺ENde die HERE sprac met Mose, seggende,

+ A vers 1

2

Gebiet Aaron ende sinen sonen ende segt. Dit is die wet des brantoffers. Den brantoffer sal bernen opten outaer alle den nacht, tot aenden morgen. Ende des outaers vier sal alleen daer op bernen.

3

Ende dye priester sal sinen lijnen rock aen doen, ende die lijnen broecke aen zijn vleesch doen. Ende hy sal die asschen af nemen, die dat vier des brantoffers opten outaer ghemaect heeft, ende salse neffens den outaer schudden.

4

Ende sal zijn cleederen daer na wt doen, ende andere cleederen aen doen, ende die asschen wt draghen buyten den leghere, in een reyn stede.

5

⁺Dat vier sal altijt bernen opten outaer, ende nemmermeer verblusschen, ende die priester sal alle morgen hout daer op stoken.

+ B vers 5

6

Ende sal den brantoffer daer op leggen, ende dat vet des dootoffers verbranden. Ende dat vier sal altijt opten outaer bernen, ende nemmermeer ghebreken.

7

Ende dit is die wet des spijsoffers, dat Aarons sonen offeren sullen voor den HERE opten outaer

8

Ende die priester sal heffen een hantvol bloemen, vanden meele vanden spijsoffer ende vander olyen, ende alle den wieroock die op dat spijsoffer leyt, ende salt ontsteken opten outaer tot eenen sueten ruecke in ghedachtenisse den HERE.

9

Ende al dat daer ouerblijuet, sullen Aaron ende zijn sonen eten, ende si sullen dat ongheheeft eten, in die heylighe stede, inden voorhof der tenten des getuychnis.

10

Si en sullen haer deel dat ic hen gegeuen hebbe van mijnen offer, niet backen met geheefden deech, want het sal hem dat alderheylicste zijn gelijc als dat sondoffer ende schultoffer

11

Allen dat van mans gheslachte is onder die kinderen Aaron, sullent eten, dat sal een eewich recht zijn uwen nacomelinghen, vanden offer des HEREN Nyemant en salt aentasten hi en si ghewijt.

12

Ende die HERE sprac met Mose, seggende.

13

⁺Dat sal Aarons ende zijnder sonen offer sijn dat si den HERE offeren sullen inden daghe haerder saluinghen. Dat thiende deel Ephi van bloemen vanden meele tot eenen spijsoffer daghelicx, die een helft des morgens ende die ander helft des auonts,

+ C vers 13

14

ende ghi sullet met olye beslaen, ende in eender panne backen, ende

[p. *]

gebroken aldaer brengen. Ende dye priester die van sinen sonen in zijns vaders plaetse gesalft wort, die sal dit doen ende offerent den HERE tot eenen sueten rueck.

15

Dat is een eewich rechte den HERE het sal al verberent worden.

16

Want alle spijsoffer des priesters, sal metten viere verteert worden, ende niet gheten worden.

17

Ende die HERE sprac met Mose, seggende.

18

Segt Aaron ende zijne sonen, ende spreect Dit is die wet des sondoffers. Ghi sult dat sondoffer slaen inder selfder plaetsen, ⁺ daer ghi den HERE den brantoffer slaet dat is dat alderheylichste

+ D vers 18

19

Die priester die dat sondoffer offer, salt eten in die heylige plaetse, inden voorhof der tenten des getuyghenis.

20

Nyemant en sal dat vleesch aentasten, hi en si geheylicht. Ende so wiens cleet vanden bloede besprengt wort, dat cleet sal ghewasschen worden in die heylige plaetse.

21

Ende den aerden pot daert in gekooct is salmen breken. Mer ist eenen metalen pot, so salmen den pot schueren, ende met water spoelen.

22

Ende wat manlic is vanden gheslachte der priesteren, sullen daer af eten. Want het is dat alderheylichste.

23

Mer alle dat sondoffer daer dat bloet af ghebrocht wort in dye tente des ghetuychnis, om daer mede te versoenen, en salmen niet eten, maer metten viere verbranden.