Den Bybel met groter neersticheyt ghecorrigeert (Liesveltbijbel 1542)

¶ Wat gheoffert sal worden voor valsch sweren voor een dwalinghe oft voor een onwetentheyt.

Dat .v. Capittel

[p. *]

1

⁺SOndicht een siele hoorende eenen vloec ende hi des getuyge is, oft heeft hijt ghesien oft gheweten, ende en heuet niet te kennen gegeuen, die is eender misdaet sculdich.

+ A vers 1

2

Oft als een siele yet onreyns raect, het si een aes van eenen onreynen diere, oft van eender beesten, oft van eenich gewormte, ende en wist niet, die is onreyn, ende heeft haer sculdich ghemaect,

3

Oft als hi een onreyn mensche raect, in wat onreynicheit eenich mensche ontsuuert mach worden, ende vergetet, ende hi wordet daer na bekennende die wort sculdich.

4

Oft als een siele sweert, dattet haer wten monde gaet quaet oft goet te doene, hoe datmen sweren mach, ende verghetet, ende wordet daer na bekennende, die heeft haer aen die versuymtheyt schuldich ghemaect.

5

⁺Alst nv coemt dat hi haerder versuymtheyt schuldich ghemaect heeft, ende wordet bekennende dat hy ghesondicht heeft,

+ B vers 5

6

so sal hi voor dese sine sonde die hi ghedaen heeft, den HERE brengen vander cudden een schaep oft gheyte die ghedragen hebben, tot eenen sondoffere, so sal hem die priester der sonden versoenen,

7

Ende en vermach hi geen scaep, so brenge hi den HERE voor zijn schult die hi gedaen heeft, twee tortelduyuen oft twee ionghe duyuen, eene tot eenen sondoffer, die ander tot eenen brantoffer, ende brengtse den priester,

8

die sal deerste bereyden tot eenen sondoffer, ende haer daer vore den hals afsteken, ende den hals niet afbreken,

9

ende sprengen metten bloede aenden want vanden outaer, ende laten dat bloet datter ouerblijft, aenden bodem des outaers bloeyen, dat is dat sondoffer.

10

Die andere sal hi tot een brantoffer bereyden nae sinen rechte. Ende also sal hem die priester zijn sonde versoenen die hi ghedaen heeft, ⁺ so wordet hem vergheuen.

+ C vers 10

11

Mer en vermach hi niet twee tortelduyuen, oft twee ionge duyuen, so sal hi brenghen voor zijn offer, om dat hi ghesondicht heeft, een thienden deel Ephi bloemen vanden meele tot eenen sondoffer. Hy en sal daer gheen olye op ghieten, noch wieroock daer op doen, want het is een sondoffer,

12

Ende salt tot den priester brengen, ende die priester sal daer een handtvol af nemen tot een ghedachtenis, ende ontstekent opten outaer tot eenen offer den HERE, dat is een sondoffer

13

Ende die priester sal hem also die sonde die hi ghedaen heeft versoenen, so wordet hem vergheuen. Ende het sal den priester behooren als een spijsoffer.

14

Ende die HERE sprac met Mose seggende,

15

Wanneer een siele haer vergrijpt, dat si met onwetentheyt haer besondicht, aen dat ghene dat den HERE ghewijt is, so sal hi haer scultoffer den HERE brenghen, eenen ram sonder smette vander cudden, dye twee Sikel siluers weert is, na den Sikel des heylichdoms tot eenen scultoffer,

16

daer toe sal hi weder gheuen dat ghene daer hi hem aen besondicht heeft, ende dat vijfste deel daer bouen meer gheuen, ende salt den priester geuen, ⁺ die sal hem versoenen met den ramme des schultoffers, so wordet hem vergheuen.

+ D vers 16

17

Als een siele sondicht ende doet tegen eenich gebot des HEREN, dat si niet doen en soude, ende wordet bekennende, die heeft haer besculdicht, ende is der misdaet sculdich,

18

ende sal brengen eenen ram vander cudden, sonder smette, die een scultoffer weert is, totten priester, die sal hem zijn onwetentheyt versoenen, die hi gedaen heeft, ende en bekende hijt niet, so wordet hem vergheuen,

19

dat is zijn schultoffer, om dat hi den HERE gheuallen is.

20

Ende die HERE sprac met Mose, seggende.

21

Een siele die sondicht, ende haer aenden HERE begrijpt, also dat hi sinen naesten loochent, dat hi hem beuolen hadde oft dat hem ter trouwer hant ghedaen is, oft dat hi met ghewelt ghenomen heeft, oft met onrecht vercreghen,

22

oft dat verloren is, gheuonden heeft, ende dat met eenen valschen eedt loochent, Oft eenichsins anders daer in ghedaen heeft, daer een mensche sinen naesten inne veronghelijken mach.

23

Alst nv gebuert dat hi also sondicht, ende hem seluen beschuldicht, so sal hi weder gheuen, dat hi met ghewelt ghenomen heeft oft met onrecht vercreghen heeft, oft dat hem betrout was

24

oft dat hi vonden heeft oft tghene daer hy den valschen eedt ghedaen heeft, dat sal hy al heel weder gheuen, daer toe ooc noch dat vijfste deel meer, den ghenen die dat toebehoort heeft, in dien dage als hy sijn schultoffer gheeft.

25

Maer voor sijn sonde sal hi den HERE eenen onbesmetten ram vander cudden den priester brengen, welcken ram weert is een scultoffer

26

So sal hem die priester versoenen voor den HERE, so wordet hem vergheuen al daer hi in ghesondicht heeft.