Den Bybel met groter neersticheyt ghecorrigeert (Liesveltbijbel 1542)

¶ Hier wordt vertelt wat si ghemaect hebben

Dat .xxxvi. Capittel

[p. *]

1

⁺DOen wrochten Bezaleel ende Ahaliab, ende al dye mannen, die wijs van herten waren, dien dye HEERE wijsheyt ende verstandt ghegheuen hadde, om te weten hoe si alderley werck maken souden, tot den dienst des Heylichdoms, na alle dat die HEERE geboden hadde.

+ A vers 1

2

Ende Mose riep Bezaleel ende Ahaliab, ende alle die wijse mannen van herten die dye HEERE wijsheydt ghegheuen hadde int herte, te weten, alle die hen ghewillichlijck gheboden waren, ende daer toe quamen om te arbeyden aent werck,

3

ende si namen met hen van Mose alle Hefofferen, die dye kinderen van Israel brachten tot den wercke des dienst des heylichdoms, op dattet ghemaeckt werde, want si brochten alle morghen haer ghewillighe ghonste tot hem.

4

⁺Ende doen quamen alle dye wijse dye aent werck des Heylichdoms wrochten, een yeghelijck van sinen wercke dat hi maecte,

+ B vers 4

5

ende spraken tot Mose. Dit volck brengt te vele, meer dan tot desen wercke des diensts van noode is, dat die HEERE geboden heeft te maecken.

6

Doen gheboodt Mose, datmen liete roepen, alomme door den leghere, Nyemandt en brenghe meer toe totten Hefoffer des Heylichdoms,

7

doen werdt den volcke verboden te brenghen, want alle dinck wasser ghenoech tot allen wercke datter te maken was, ende noch daer ouer.

8

Also maecten alle die wijse mannen van herten onder die aerbeyders aent twerck den Tabernakel, thien gardijnen van witter ghetweender siden, geelder siden, schaerlaken, roset root, Cherubim constelic.

9

Die lengte eender gardijnen was .xxviij. ellen, die breede vier ellen, ende waren al van eender maten,

10

ende hi hechtede vijf gardijnen te samen, deen aen die ander.

11

Ende hi maecte gheele knopkens aen den rant van elcker gardijnen,

12

daer mede die een aen die ander vattedde,

13

ende hi maeckte vijftich gulden ringhen, ende voechde die gardijnen met den ringskens die een aen die andere te samen, ⁺ dattet een Tabernakel wert.

+ C vers 13

14

Ende hy maecte elf gardijnen van gheyten hayre om te decken die tente des Tabernakels,

15

dertich ellen lanc, ende vier ellen breet, alle in eender maten,

16

ende hi voechdese haerder vijf tsamen op een side, ende ses tsamen op die ander side,

17

ende hi maecte vijftich knoopkens aen elcke gardijne aenden rant daer mede dat si tsamen ghehecht werden,

18

ende hi maeckte

[afbeelding]

vijftich metalen ringskens, daer mede dat die tente tsamen in een gheuoecht worde,

19

Ende hi maeckte een decksele ouer die tente van roode rams vellen, Ende daer ouer noch een decsel van hemels blau vellen.

20

Ende hi maeckte barderen totten Tabernakel van vueren houte, recht staende,

21

een yegelijc thien ellen lanc, ende anderhalf elle breet

22

ende aen yegelijcken twee haecxkens, daer mede dat die een aen die andere ghesedt werdt,

23

dat der seluer berderen twintich stonden Suydtweert,

24

ende maeckte veertich silueren voeten daer onder, onder elck bardt twee voeten aen sine twee hoecxkens.

25

Aldus ter ander seyden des Tabernakels teghent Noorden, maeckte hy oock twintich berderen,

26

met veertich silueren voeten, onder elck berdt twee voeten,

27

Maer achter aen den Tabernakele teghent Westen, maecte hi ses berderen,

28

ende twee ander op die hoecxkens des Tabernakels achter aen,

29

dat elck bardt met sinen hoecberde, van onder op voechde, Ende bouen aent hooft tsamen quamen met eender scroeuen,

30

datter acht barderen werden, ende sesthien silueren voeten, onder elcken barde twee voeten.

[p. *]

31

Ende hi maecte rijchels van vueren houte, vijf totten barderen opter eender siden des Tabernakels,

32

ende vijf opter ander siden, ⁺ ende vijf achter aen teghent Westen,

+ D vers 32

33

Ende hi maecte die rijchelen, dattet aen die barderen door wech ghestooten wert, vanden eenen eynde tot den anderen,

34

ende hy ouertooch die berderen met goude Maer haer ringhen maeckte hy van ghoude, tot den rijchelen, ende hy ouertooch die rijchelen met goude.

35

Ende hi maecte Cherubim op dat voorhanghende cleedt, constelijck van gheelder siden, schaerlaken, rooset root, ende ghetweernde witte side

36

Ende hi maecte daer toe vier calomnen van vueren houte, ende ouertrockse met goude, ende haer coppen van goude, ende daer toe goot hy vier silueren voeten,

37

ende hi maecte eenen doeck, in die duere der tenten van gheelder siden, van schaerlaken, roosetroot, ende getweernder witter siden, gestict,

38

ende vijf calomnen met haren hoofden ende ouertooch haer hoofden ende dat verheuen werck met goude, ende vijf metalen voeten daer aen.