Den Bybel met groter neersticheyt ghecorrigeert (Liesveltbijbel 1542)

Iethro Moses swager, brengt hem sijn wijf, ende kinder, ende als hi hem veel te seer in recht ende vonnissen te gheuen belast siet, so gheeft hi hem raet den last te verlichten.

Dat .xviij. Capittel

1

⁺ENde als Iethro die priester in Madian Mose sweer hoorde, alle dat God gedaen hadde met Mose ende sinen volcke Israel, dat de HERE Israel wt Egipten geleyt had,

+ A vers 1

2

Nam hi Zipora Mose wijf, die hi wederom gesonden had

3

met sinen twee sonen, dien een hiet Gerson, want hi sprac, ic ben een gast gheworden in vreemde landen,

4

ende die ander Elieser want hi sprac mijns vaders God is mijn hulpe gheweest, ende heeft mi verlost van Pharaos sweert

5

Als Iethro Mose sweer ende sijn sonen ende sijn wijf tot Mose quamen, in dye woestijne aen den berch Gods daer hi die tenten op geslagen hadde,

6

liet hy Mose seggen, Ic Iethro v sweer ende v wijf, ende beyde v kinderen met haer, sijn tot v gecomen,

7

Doen ginc Mose hem te ghemoet buyten ende neech voor hem ende custe hem, ende als si malcanderen gegroet hadden, ⁺ gingen si in die tenten.

+ B vers 7

8

Daer vertelde Mose sinen sweer al dat die HERE Pharao ende den Egiptenaren gedaen had om Israels wil, ende al die moeyte die hen opten wege gesciet was ende datse die HERE verlost had,

9

Iethro werdt verblijt van alle dat goet dat die HERE Israel gedaen had, dat hijse verlost hadde vander Egyptenaren handt.

10

Ende Iethro sprac, gelooft si die HEERE dye v verlost heeft vanden Egyptenaren ende Pharaos hant die weet sijn volc van Egipten lant te verlossen,

11

Nv weet ic dat die HERE grooter is dan alle Goden om dat si vermeten geweest sijn aen hem,

12

Ende Iethro nam brantoffer ende offerde Gode, ⁺ Doen quam Aaron ende alle die ouders van Israel met Mose sweer, om dat broot teten voor Gode.

+ C vers 12

13

Des anderen daechs smorgens sadt Mose om dat volc te rechten, ende dat volc stont al om ende om Mose van smorgens tot den auont,

14

Mer als sijn sweer sach al dat hi metten volcke dede sprac hi, Wat is dit, dat ghi metten volcke doet? waerom sidt ghi alleen, ende al dit volc staet om v van smorghens totten auont?

15

Mose antwoorde hem, dat volc coemt tot my ende vragen God om raet,

16

want waer si wat te doen hebben, comen si tot mi dat icse rechte tusschen eenen yegelicken, ende sinen naesten ende thoone hen Gods gheboden, ende Gods wedt.

17

Sijn sweer sprac tot hem, het en is niet goet dat ghy doet,

18

ghi doet sottelijc, ghi ende dat volc dat met v is, dat werc is te swaer, ghi en moget alleen niet doen. ⁺

+ Deu. i.b

19

Mer hoort mijn stemme, ic sal v raet geuen, ende God sal met v sijn, hanteert metten volc voor God, ende brengt die saken voor Gode

20

ende vorsietse van wetten ende geboden dat ghi hen thoont den wech, dien si wandelen, ende die wercken die si doen sullen.

21

Ende siet wt, onder al den volcke na redelijcke mannen die God vreesen, warachtich, ende die der giericheyt vyant sijn, die set ouer hen, Somige ouer duysent, sommige ouer hondert, somige ouer vijftich, ende ouer thien, dat si dat volc rechten alle tijt, Mer waer een groote sake is, dat si die tot v brenghen, ende dat si alle lichte saken rechten,

22

so salt v lichter worden ende si sullen den last met v dragen,

23

⁺doedy dat, so condi bestaen wat v God ghebiet, ende alle dat volc can dan met vreden aen sijn stede ghecomen.

+ D vers 23

24

Mose verhoorde sijns sweers stemme, ende deet al dat hi geseyt hadde,

25

ende Mose vercoos redelike mannen wt alle Israel, ende hi maecte hooftlieden ouer dat volc van Israel, Sommige ouer duysent, sommige ouer hondert, sommighe ouer vijftich, ende sommige ouer thien,

26

op dat si dat volc tot allen tijden souden rechten, Maer wat herde saken dat daer waren, dat si die brengen souden tot Mose. Ende die cleyne saken souden die ghecoren mannen rechten,

27

Aldus liet Mose sinen sweer in sijn lant trecken.

[afbeelding]