Den Bybel met groter neersticheyt ghecorrigeert (Liesveltbijbel 1542)

Moses ende Aaron gaen totten Coninc na dat beuel des HEREN, maer die coninck wort toornich, ende hi benaut ende belastet tvolc noch meer

Dat .v. Capiirtel

[afbeelding]

1

⁺DAer na gingen, Mosi ende Aaron binnen ende spraken tot Pharao. Dit seit die HERE die God van Israel. Latet mijn volc dattet mi viere, in die woestijne.

+ A vers 1

2

Pharao antwoorde. Wie is die HERE, wiens stemme ic hooren moet, ende Israel laten gaen, Ic en weet van dien HERE niet, Ic en wil Israel ooc niet laten gaen

3

Si spraken, der Hebreeuscher God heeft ons gheroepen, so laet ons drie dachreysen wech gaen in die woestijne, ende den HERE onsen God offeren, op dat ons noch pestilencie, noch swaert toe en come,

4

doen sprac die coninc van Egipten tot hen. Waerom doet ghy lieden, ghi Mose ende Aaron, dat dat volc sijn werck laet staen, ghaet henen tot uwen laste,

5

voort sprack Pharao. ⁺ Siet dat volc is te veel inden lande, ende ghi wiltse doen vieren van haren lasten.

+ B vers 5

6

Daerom beual Pharao inden seluen dage den prouoosten des volcx, ende den officiers, ende sprac

7

Ghi en sult den volcke niet meer stroos vergaderen, ende geuen, dat si tijchelen bernen, gelijc gisteren ende eerghisteren, laetse seluer henen gaen, ende stroo vergaderen,

8

ende dat getal der tijchelen dat si ghisteren ende eergisteren gemaect hebben, dat suldi

[p. *]

hen euen wel opleggen, ende niet verminderen, want si gaen leech, daerom roepen si ende seggen. Wi willen gaen ende offeren onsen Gode.

9

Men ouerualle die lieden met arbeyde, dien si te besorgen hebben, ende hen niet en keeren aen die valsche woorden

10

⁺Doen ghinc die prouoost des volcx, ende haer officiers wt, ende spraken totten volcke. Aldus seyt Pharao. Men sal v geen stroo gheuen,

+ C vers 10

11

gaet seluer ende haelt stroo, daer ghijt vint, mer van uwen arbeyde en sal v niet vermindert werden.

12

Doen wert dat volck verspreyt in alle dat lant van Egipten, dattet stoppelen vergaderde, daer si stroo mede hadden

13

Ende die prouoosten dreuense, ende seyden, voldoet v dachwerc ghelijc als ghi dedet, doen ghi stroo hadt.

14

Ende die officiers der kinderen van Israel, die die Prouoosten van Pharao ouer hen geset hadden, werden gheslagen, ende tot hen wert geseyt. Waerom en hebdy noch heden noch ghisteren v gesette dachwerc nyet gedaen, alsoo als ghi ghisteren ende eergisteren dedet

15

Doen gingen die officiers der kinderen van Israel, ende riepen tot Pharao seggende. Waerom doedy aldus met uwen knechten?

16

Men en geeft uwen knechten geen stroo, ende wi souden die tijchelen maken die ons geset sijn, ende siet, v knechten werden geslagen, ende men doet sonde aen uwen volcke.

17

Pharao sprac, Ghi lieden sijt ledich, ledich sidy, daerom segdi, Wi willen gaen ende offeren den HERE,

18

Daerom gaet, ende werct, men en sal v geen stroo gheuen, ende v getal der tijchelen suldy voldoen.

19

Doen sagen die officiers vanden kinderen van Israhel dattet niet en beterde, want men seyde hen. Ghi en sult niet verminderen vanden dachwerc der tijchelen.

20

Ende als Mose ende Aaron van Pharao gingen, quamen si hen te gemoete, ende si seyden tot Mose ende Aaron.

21

Die HERE sie op v, ende rechte dat ghi lieden onsen ruec hebt doen stincken voor Pharao ende sinen knechten, ende hebt hen dat sweert inden handen gegeuen om ons te dooden

22

Mose quam weder totten HERE, ende sprac, HERE waerom doedi so qualijcken met desen volcke. Waerom hebdi mi hier gesonden?

23

want sint dat ic in ben gegaen tot Pharao, ende met hem gesproken heb, in uwen name so heeft hi qualiken met desen volcke geleeft, ende ghy en hebt v volc niet verlost

24

Die HERE sprac tot Mose. Nv suldi sien, wat ic Pharao doen sal. Want door een stercke hant, moet hijse laten, hi moetse noch door een stercke hant, wt sinen lande van hem drijuen