Den Bybel met groter neersticheyt ghecorrigeert (Liesveltbijbel 1542)

¶ Moses ontschuldicht hem, ende weert hem, Die HERE leert ende sterct hem met teekenen, Ende rechte hem op met woorden, Moses neemt oorlof van sinen sweer, tot sinen volcke te trecken.

Dat .iiij. Capittel.

1

⁺MOse antwoorde ende sprac. Siet si en sullen mi niet geloouen, noch mijn stemme hooren, maer si sullen segghen. Die HERE en heeft v niet geopenbaert,

+ A vers 1

2

Die HERE sprac tot Mose. Wat ist dat ghi in v hant hebt? Hi sprac een roede.

3

Die HERE seyde. Worptse van v wech opter aerden. Mose werpse van hem,

4

siet, het wert tot eender slangen, ende Mose vloot van haer. Maer die HERE sprack tot Mose, Steect v hant wt, ende vaetse metten steerte, doen strecte Mose sijn hant wt, ende hieltse, ende si wert weder een roede in sijnder hant,

5

daerom sullen si geloouen dat v die HERE gheopenbaert heeft, die God haerder vaderen, die God Abraham, die God Isaac, die God Iacob

6

Ende die HERE sprac voort tot Mose. Steect v hant in dijnen boesem, ⁺ ende hi stackse in sinen boesem, ende tracse weder wt, siet, doen was sijn hant lazerich, ghelijc snee,

+ B vers 6

7

ende hi sprac. Doetse weder in uwen boezem, ende Mose dedese weder in sinen boesem, ende tracse weder wt. Siet, doen wertse weder gelijc sijn ander vleesch

8

Ende oft si v niet en geloouen, noch die stemme des eersten teekens niet en hooren, so sullen si doch gheloouen dye stemme des tweeden teekens.

9

Mer oft si desen twee teekenen niet en geloouen, noch uwe stemme niet en hooren so neemt dat water wter riuieren, ende ghietet op dat drooge lant, dan sal tselue water dat ghi wter riuieren ghenomen hebt, bloet worden opt drooge landt.

10

Mose sprac tot den HERE. Och mijn HERE ic ben een man die niet wel sprekende en is, ⁺ van gisteren ende eerstghisteren, ende van dier tijt dat ghi met uwen knecht ghesproken hebt, want ic heb een sware sprake, ende een sware tonge.

+ C vers 10

11

Die HERE sprack tot Mose Wie heeft den mensch den mont gheschapen? Oft wie heeft den stommen, oft doouen, oft sienden, oft blinden ghemaect? heb icx niet gedaen die HERE?

12

So gaet nv henen, ick wil met uwen monde sijn, ende leeren v wat ghi seggen sult

13

⁺Mose sprac, mijn HERE, seyndt den ghenen, den welcken ghi seynden wilt.

+ D vers 13

14

Doen wert die HERE seer toornich op Mose, ende sprac. Weet ic dan niet dat Aaron uwe broeder vanden geslachte Leui, wel sprekende is? Ende siet, hi sal wtgaen v te gemoet, ende als hi v siet, sal hi hem van herten verhueghen,

15

ghi sult tot hem spreken, ende mijn woorden in sinen mont leggen. Ende ic sal met uwen ende met sinen monde sijn, ende v leeren, wat ghi doen sult,

16

ende hi sal voor v totten volcke spreken, Hi sal uwen mont sijn, ende ghi sult hem als God sijn,

17

Ende neemt dese roede in v hant, daer ghi die teekenen mede doen sult.

Mose ghinc wech, ende quam weder tot Iethro sinen sweer, ende seyde tot hem,

18

laet mi doch gaen, ⁺ dat ic weder tot mijnen broederen come, die in Egypten sijn, ende besie, oft si noch leuen. Iethro sprac tot hem gaet in vreden.

+ E vers 18

19

Doen sprack die HERE tot Mose, int lant Midian. Gaet wech, ende trect weder in Egypten, want die lieden sijn doot, die na v leuen stonden.

20

Aldus nam Mose sijn wijf, ende sijn sonen, ende vuerdese op eenen ezel, ende trac weder in Egyptenlant, ende nam die roede Gods in sijn hant.

21

⁺Ende die HERE sprac tot Mose. Siet toe als ghi weder wt Egipten coemt, dat ghi alle dat wonder doet voor Pharao, dat ic onder uwe hant gegeuen hebbe Ic sal sijn herte verstocken, dat hi dat volc niet laten en sal,

+ F vers 21

22

ende ghi sult tot hem seggen, die HERE seyt aldus Israel is mijn eerste geboren soon,

23

Laet mijnen soon gaen, dat hi mi diene, ende ist dat ghi dat weygert, so sal ic uwen eersten gheboren soon dooden

24

Ende als Mose onder wegen in die herberge was quam hem die HERE te gemoet, ende wilde hem dooden.

25

Doen nam Ziphora eenen steen, ende besneet haren soon dat sloofken, ende raecte hem sijn voeten, ende seyde. Ghi sijt mi een bloet bruydegom.

26

Doen liet hi van Mose af, mer si sprac, bloet bruydegom om der besnidingen wille

27

⁺Ende die HERE sprac tot Aaron, gaet wech, Mosi uwen broeder te ghemoete in die woestijne, ende Aaron ghinc wech, ende ghemoetede Mosi, aenden berch Gods, ende hi custe hem,

+ G vers 27

28

ende Mose vertroc Aaron alle die woorden des HEREN die hem gesonden hadde, ende alle die teekenen, die hi hem beuolen hadde,

29

Ende si ghingen ende vergaderen alle die ouders vanden kinderen van Israel,

30

ende Aaron seyde alle die woorden die die HERE met Mose gesproken hadde, Ende Mose dede alle die teekenen voor den volcke, ende dat volc geloofde.

31

Ende als si hoorden dat die HEERE die kinderen van Israel besocht hadde, ende aengesien haer allende, So neychden si hen, ende aenbaden