Den Bybel met groter neersticheyt ghecorrigeert (Liesveltbijbel 1542)

Hier beghint dat boeck des wtgancx datmen int Latijn noemt Exodus int Hebreeusche Hellesmoth

Der kinderen van Israel werden vele, ende vermeerderden crachtelic. Die coninc heet haer dooden ende verdrincken

Dat .I. Capittel

[afbeelding]

1

⁺DIe namen der kinderen van Israel, die met Iacob in Egypten quamen, ende een yegelijck quam daer in met sinen huyse

+ A vers 1

2

Ruben, Simeon, Leui, Iuda,

3

Isaschar, Sebulon, BenIamin,

4

Dan, Naphtali, Gad, Aser.

5

Ende alle die sielen die wt Iacobs lendenen gecomen waren, waren .lxx. Mer Ioseph was te voren in Egipten,

6

ende als Ioseph gestoruen was, ende al zijn broederen, ende alle die tot dier tijt toe geleeft hadden,

7

wiessen die kinderen van Israel, ende groeyende werden si vermenichfuldicht, ende werden seer machtich, ende dat lant wert van haer vol

8

⁺Ende doen quam een nyeu coninc ouer Egypten dye niet en wiste van Ioseph,

+ B vers 8

9

ende sprac tot sijn volc. Siet, dat volc der kinderen Israel is veel, ende machtiger dan wi

10

coemt laet ons wijsselic met hen omgaen, dat haerder niet so veel en werden, ende waert datter ooc een crijch tegen ons opstont, so mochten si ooc tot onsen vianden slaen, ende ons verwinnen, ende ten lande wt trecken

11

Ende Pharao stelde ouer haer prouoosten ende wercmeesters, diese met laste benauden, want men maecte Pharao die steden Pithon, ende Raemses tot Scathuysen.

12

Maer hoe si dat volck meer benauden, soo veel te meer werdet meerder ende vermenichfuldicht daerom hateden die van Egypten die kinderen van Israel.

13

Ende die Egyptenaren dwongen die kinderen van Israel te dienen sonder bermherticheyt,

14

ende maecten hen tleuen suer met swaren arbeyt, aen lijm ende tijchelen, ende met dienste opten velde, ende met alderley arbeyde die si hen opleyden sonder barmherticheyt

15

Ende die coninc van Egipten sprac totten vroeyurouwen der Hebreeuscer wijuen, ⁺ die een hiet Siphera, ende die ander Pua,

+ C vers 15

16

wanneer dat ghi lieden den Hebreeuscen wijuen helpt inden arbeyt ende siet, dat een soon is, soo doodet hem, mer ist een dochter, so laetse leuen

17

Mer die vroeyurouwen vreesden God, ende si en dedent niet so die Coninc van Egypten hen gheseyt hadde, mer lieten die kinderen leuen

18

Doen riep die coninc van Egipten die vroyurouwen ende sprac tot hen, ⁺ waerom doedy dat, dat ghi lieden die kinderen laet leuen?

+ D vers 18

19

Die vroeyurouwen antwoorden Pharao.

20

Die Hebreeusche wijuen en zijn niet gelijc die vrouwen van Egipten, want het zijn herde wijuen, eer die vroei vrouwe tot hen coemt, hebben si gebaert.

21

Daerom dede God den vroeyurouwen goet. Ende dat volck vermeerderde hem, ende werdt seer machtich. Ende om dat dye vroeyurouwen God ontsagen, ^a maecte hi hen huysen.

a huysen maecken dat is wassen ende meerder met gheslachte ende kinderen. psal. l.

22

Doen gheboot Pharao alle sinen volcke, ende sprack. Alle sonen die gheboren worden, werpt int water, ende alle dochteren laet leuen.