Den Bybel met groter neersticheyt ghecorrigeert (Liesveltbijbel 1542)

¶ Ioseph begraeft sinen vader int lant Canaan, Ende hy sterft ooc in Egypten, Hi beueelt sinen broederen dat si zijn ghebeente met haer wech vueren souden.

Dat .L. Capittel

1

⁺ENde Ioseph beual sinen knechten den medicijnen, dat si sinen vader saluen souden,

+ A vers 1

2

ende die medicijnen salfden Israel tot dat veertich dagen om waren, want so lange duerden die salfdagen, ende die van Egypten beweenden hem .lxx. daghen.

3

Als die roudagen wt waren, sprac Ioseph met Pharaos gesin, ende seyde, hebbe ic genade voor v vonden so spreect met Pharao ende segt,

4

Mijn vader heeft eenen eedt van mi genomen, ende seyde, siet, ic sterue, begraeft mi in mijnen grauen, dat ic mi int lant Canaan gegrauen hebbe, So sal ic optrecken, ende begrauen mijnen vader, ende weder comen.

5

Pharao sprac trect opwaerts, ende begraeft uwen vader, ⁺ also ghi hem ghesworen hebt.

+ B vers 5

6

Aldus tooch Ioseph opwaerts, om sinen vader te begrauen, ende het trocken met hem alle Pharaos knechten, die outste zijns ghesins, ende alle die outste vanden lande van Egypten,

7

ooc alle Iosephs gesin, ende zijn broederen, ende zijns vaders ghesin Alleene hare kinderen, schapen, ossen lieten si int lant Gosen,

8

ende nam oock met hem opwaerts, wagenen ende reysenaers, ende si waren een machtich groot heyr.

9

⁺Ende als si in die pleyne Acad quamen, die op gheen side der Iordanen leyt, Daer hielden si een seer groote ende bitter claghe, ende Ioseph droech ouer sinen vader rouwe seuen dagen.

+ C vers 9

10

Ende als die lieden des lants Canaan sagen dien rou dragen in die pleyne Acad, seyden si. Die Egyptenaers dragen daer grooten rou. Daer af heetmen die pleyne, der Egypten rou, welck leet op geen side der Iordanen.

11

Ende Iacobs kinderen deden so hy hen beuolen hadde,

12

ende vuerden hem int lant Canaan, ende begroeuen hem in die dubbele speloncke des ackers, die Abraham ghecocht hadde met den acker tot eender erfgrauenissen, van Ephron den Hethitere, tegen Mamre ouer

13

Aldus tooch Ioseph weder in Egypten met sinen broederen, ⁺ ende met allen die met hem opgetrocken waren om sinen vader te begrauen, als si hem begrauen hebben.

+ D vers 13

14

Ende Iosephs broederen vreesden, als haer vader gestoruen was, ende spraken, Ioseph mocht op ons gram zijn, ende betalen ons alle quaetheyt die wi hem gedaen hebben,

15

daerom lieten si hem seggen, uwe vader beual voor zijn doot, ende sprac.

16

Aldus suldy Ioseph seggen, wy bidden v vergeeft uwen broederen die misdaet, ende hare sonden

[p. *]

dat si so qualiken aen v gedaen hebben, vergheuet toch nv dese misdaet ons, den dienaren Gods ws vaders

17

Ende Ioseph weende als si dit met hem spraken

Ende sine broederen gingen henen, ende vielen voor hem neder, ende spraken Siet hier zijn wi uwe knechten.

18

Ioseph sprac tot hen, en vreest niet, want ic ben onder God, ghi lieden dachtet quaet ouer mi, maer God heuet tot goet ghekeert, dat hi dede, gelijct nv schijnt om veel volcx te behouden.

19

Daeromme en vreest niet, ic sal v besorgen, ende v kinderen,

20

ende hi troostese, ende sprack vriendelijck met hen.

21

Aldus woonde Ioseph in Egypten met sijns vaders huys, ende leefde hondert ende thien iaer, ⁺

+ Die stat van Corinthien wert gesticht als dye werelt ghestaen had .iij.M.ccccc ende .xliij. iaer. M vi.C. ende lv. iaer voor cristus gheboorte

22

ende sach Ephraims kinderen tot int derde let, des selfs gelijc die kinderen Machir. Manasses sonen voeden ooc kinderen op Iosephs schoot.

23

Ende Ioseph sprac tot sinen broederen, ic sterue, ende God sal v besoecken, ende wt desen lande vueren, in dat lant dat hi Abraham, Isaac ende Iacob gesworen heeft,

24

daerom nam hi eenen eedt vanden kinderen van Israel, ende sprac. Als v God besoecken sal, so vuert mijn gebeenten van hier. Alsoo sterf Ioseph, als hi was hondert ende thien iaer out, ende si salfden hem, ende leyden hem in een tombe in Egypten

Hier voleyndt dat eerste boeck Genesis