Den Bybel met groter neersticheyt ghecorrigeert (Liesveltbijbel 1542)

Hoe Abraham dat lant deelde met sinen broeder Lot, ende hoe hi die belofte ontfinc van God dat hi ende sijn zaet dat landt souden ontfanghen, ende besitten inder eewicheyt

Dat .xiij. Capittel.

1

⁺ALso troc Abram opwaert wt Egipten, met sinen wijue, ende met alle dat hi hadde, ende Lot ooc met hem, ten suyden waert,

+ A vers 1

2

Mer Abram was wel geladen met vee siluer, ende gout,

3

ende troc voort aen, van tzuyden tot BethEl, aen die stede daer eerstwerf sijn wooninge was tusscen BethEl, ende Ai,

4

in dye selue plaetse, daer hi te voren den outaer ghemaect had,

[p. *]

Ende hi aenriep daer den name des HEREN

5

Lot die met Abram troc, die had ooc schapen ende runderen, ende tenten.

6

Ende dat lant en mochts niet verdragen, dat si beyde bi malcanderen woonden, want hare haue was so vele, datse met malcanderen niet en consten wonen,

7

ende daerom wasser altoos twist tusschen den herderen des vees van Abram, ende tusscen den herderen van Lots vee, ende tot dien tijden woonden int lant ooc Cananiten ende Pheresiten.

8

⁺Doen seyde Abram tot Lot, En laet geenen twist wesen tusscen mi ende v, ende tusschen mijnen ende uwen Herderen, ⁺ want wi sijn gebroeders,

+ B vers 8

+ Ie. xlvi

9

en staet v niet alle tlant open?

10

Scheyt van mi, Wildi ter slincker, soo wil ick ter rechter, oft wildi ter rechter, soo wil ick ter slincker. Doen hief Lot sijn oogen op, ende omsach alle die palen vander Iordanen, Want eer dat God Sodoma ende Gomorra verderf, ⁺ waren si rijc van water, tot datmen te Zaor coemt, ghelijc Gods paradijs, ende ghelijc als Egypten lant

+ C vers 10

11

Also koos Lot al die palen aen die Iordane, ende tooch tegen dat oosten. Alsoo sceyde hem die een broeder vanden anderen,

12

dat Abram woonde int lant Canaan, ende Lot inden steden vanden seluen deelen, ende stelde zijn wooninge te Sodoma,

13

Maer die lieden van Sodoma waren erch, ende sondichden seer teghen den HERE.

14

Als hem nv Lot van Abram ghescheyden had, sprack die HERE tot Abram, Heft v oogen op, ende siet van deser steden aen daer ghi woont, nootwaert, zuydtwaert, oostwaert, ende westwaert,

15

want al dat lant, dat ghi siet, sal ic v gheuen, ende uwen zade ^a eewelijc,

a eewelijc dat is hier, eenen besetten sekeren langhen tijt. Exo. xij c.

16

ende sal uwe saet maken ghelijc den stof der aerden. Can een mensche stof der aerden ghetellen? die sal v zaet ooc tellen,

17

daerom staet op, ende trect door dat landt, in die lengde ende breyde, want ic wilt v gheuen

18

Dus hief Abram sijn tente op, ende quam woonen int dal Mamre, dat te ^b Hebron is, ende timmerde daer den HERE eenen outaer.

b Hebron, is die plaetse daer Adam, Abraham, Isaac begrauen sijn