Leysen-boeck der catholycken daerinne vergadert zyn wt verscheyden boecken veelderhande leysenen himni ende geestelycke liedekens
(1605)–Anoniem Leysen-boeck der catholijcken–
Auteursrechtvrijop de wijse: Pange lingua gloriosi.Vvilt ontspringhen/lof sanck singhen
Onsen Heer ghebenedijt
Want hy doet ons groote dinghen
Hier of looft hem met iolijt
En wilt v van quaet bedwinghen
Zijn weldaet ghedachtich zijt
Ghy ingheseten wildy weten
Wat den heer ons heeft ghedaen
Door sijn goetheyt ongemeten/
Gheeft hy ons zijn lichaem zaen/
Voor een spyse om te eeten
Wilt hem waerdelijck ontfaen.
Proeft v sinnen wel van binnen
Eer dat ghy ontfanghen sult/
Desen groten schadt der minnen/
Die hemel en aert vervult
Eer dat ghy dit sult beghinnen
Spreeckt ootmoedich v schult.
Groot en cleyne// maeckt v reyne/
En treckt aen het bruylofts cleyt/
Comt ter tafelen Gods ghemeyne/
Aensiet wat daer is bereyt
Gods lichaem en bloet certeyne/
Ghelijck hy ons selve seyt.
Wat cost hy ons meerder geven
Dan dit heylich Testament/
Dit levende broot verheven
Vanden Hemel neer ghesent/
| |
[pagina 118]
| |
Dat wy eeuwich souden leven
Gheeft ons dese spijse ient.
Dese spijse, groot van prijse,
Liefde in ons Siele straelt,
Wt des Hemels Paradijse,
Is voor ons hier neer ghedaelt,
Looft hem metter Engelen wijse
Van dese spijse ongefaelt.
Glorie lof hoocheyt en eere
Sy die heylige triniteyt,
Die ons arme kinderen teere
Dees spijse heeft bereyt,
V loven wy onsen heere // nu en inder eewicheyt.
|
|