Leysen-boeck der catholycken daerinne vergadert zyn wt verscheyden boecken veelderhande leysenen himni ende geestelycke liedekens


Een geestelijck Leyse.
Gaet op de wijse: Waer is die dochter van Had ick vlogelen als een Arent grijs Ick soude so hooge vliegen Daer boven in dat Paradijs, Tot mijnen soete lieve. Dan soude ick seggen: Vader mijn, Wanneer suldy my halen Wt deser ellenden van Aertrijck, In uwer hoogster salen. Waer is die dochter van Syon, Ick wildese vrolijck maken: Ick wil haer een bootschap doen Van also blijden saken. Die hoochste inder minnen, Dat is Iesus Marien Sone: Godt laet ons hem gewinnen, Hier boven inden throone. Dat Hemelrijck ende Aerdtrijck Noyt conste ontluycken Die sal een suyver Maget reyn
[pagina 80]
In haren lichaem besluyten. Die duysternisse is verclaert, Dat licht is ons gheresen Een Maghet heeft een kint ghebaert, Dat mach wel wonder wesen. Dat kint was teerder ende kranck, Een Maghet moestet voeden: T’is recht dat wijt hem weten danck Van sijner grooter ootmoeden. Heer Iesus kerst, wat hebdy ghemeent, Wy souden u soo gaerne vraghen Dat ghy dus leght en weent, Ghy zijt soo ionck van daghen. Dat dus viel ende was onghereet Dat moghen wy nu ghebruycken, Dat Adam inden Appel beet Dat dede den Hemel sluyten, O Moeder Gods van Hemelrijcke Des Conincx inden throone: Bidt voor ons allen innerlijcke Iesum uwen sone. Dat wy daer boven moeten Daer die Enghelen vrolijck singhen, V ende uwen kinde groeten Dat wil ons Godt ghehinghen. Amen.