Leysen-boeck der catholycken daerinne vergadert zyn wt verscheyden boecken veelderhande leysenen himni ende geestelycke liedekens
(1605)–Anoniem Leysen-boeck der catholijcken–
Auteursrechtvrij
[pagina 35]
| |
Hoe daer een Maghet vruchtbare
Die werelt heeft verblijt,
Ghelovet moet zijn dat soete kindekijn,
Gheeert moet zijn dat soete maechdekijn
Nu eeuwelijck ende in aller tijt.
Hoe wel was haer te moede,
Doe zy in vleesch ende bloede
Aensach haren hertsen hoede
Den Heere der werelt wijt. Gelovet.
Sy baerde sonder pijne,
Ende bleef een Maget fijne,
Den Sondaers medecijne,
Des hebben de Ioden nijt. Gelovet.
Die Engelen songen schoone
Glorie inden Throone,
Ter eeren ende ten love
Dat kindekijn ghebenedijt. Gelovet.
Als acht daghen waren gheleden
Doe wert Iesus besneden
Al nae der Iootscher zeden
D’welck ons van zonden vrijt Gelovet.
Wt Orienten Lande
quamen ten offerhande
Drie Coningen onbekande,
Gode ghebenedijt. Gelovet.
Des derthienden daechs zijt vroeder
Vonden zy hem by zijn Moeder,
Ioseph was haer behoeder,
Soo ons die Schriftuere belijt. Ghelovet.
Als die ses weken omme quamen,
Zoo ginck zy naer t’betamen
Onbevleckt van aller blamen,
D’welck was om ons profijt. Ghelovet.
Aldus ginck die Maget simpel
| |
[pagina 36]
| |
Ende droech haer Kint ten Tempel
Alle Vrouwen tot een exempel
Des haer niet en verwijt. Ghelovet.
|
|