Leysen-boeck der catholycken daerinne vergadert zyn wt verscheyden boecken veelderhande leysenen himni ende geestelycke liedekens
(1605)–Anoniem Leysen-boeck der catholijcken–
AuteursrechtvrijOp de wijse: doe Iesus ghebooren wert.Het is heden een dach van vrolijckheyt
Al in des Conincx hove,
Want aldaer ontfanghen heeft
Een Maecht van grooten love,
Een kindt ghebooren wonderlijck,
Ende altemael ghenoechlijck
Nae der menschelijckhede,
Boven al seer vriendelijck
Sterf hy voor zonden ootmoedelijck,
Want hy Godt is, ende mensche mede.
Die Moeder is dochter wonderlijck
Haers Soons, want hy is haer vader,
Waer hoorde oyt man dies ghelijck,
Hy is Godt ende mensche te gader:
Hy is een knecht ende heer,
Hy is over al, dat is meer,
Onbegrijpelijck te vinden,
Teghenwoordich ende veer,
Waer hoorde oyt man dies wonder meer,
Ten can gheen man versinnen.
Hy wert ghebooren inder nacht,
Der sonnen verlichtere,
| |
[pagina 19]
| |
Ende hy wert inde stal gheleyt,
Aller werelt stichtere:
Men vant hem met den wendel lanck,
In Bethlehem by der Engelen sanck:
Hy was gehoorsaem, Godt, Vader ende Moeder
Hy hevet al geschapen als ons behoeder
Wilt hem loven en dancken in alle stonden
Want hy ons bemint wt s’herten gronden.
Ghelijck dat niet en quetst het Glas,
Daer die Sonne schijnt doore,
Geloove ick dat Marta was,
Nae reyne Maghet ende vooren
Die Moeder is gebenedijt,
In wiens lichaem besloten leyt
Die Gods soon wert mensch ghebooren
Weet dat die borsten heylich waren
Die Godt in zijn ionghe Iaren
Te suyghen hadde vercoren.
Godt den Herderkens ontboot
Des nachts by haren beesten
Met den Enghelen blijschap groot
Al van des Conincx feesten
Die ghewonnen heeft een Maecht,
Ende inder Cribben was gelaecht
In doeckelkens ghewonden:
Hy is aller werelt Heer,
Ende van ghedaenten schoonder meer
Dan yemant is ghevonden.
Doemen de werelt al beschreef,
Ginck een Maghet met kinde
Te Bethlehem, daer zy doe bleef,
Ende voldroecht Kint ten eynde,
Daermen af schrijft inden hove,
Ende glorie singht met grooten love,
| |
[pagina 20]
| |
Van grooter weerdichede,
Godt hier boven van Hemelrijck
Verleent ons menschen op Aertrijck
Van goeden wille vrede.
|
|