Leysen-boeck der catholycken daerinne vergadert zyn wt verscheyden boecken veelderhande leysenen himni ende geestelycke liedekens



[Folio *7v]
Himnis van den Advent, Conditor Alme Siderum op duyts.
En gaet op die selfde wijse. O Schepper alder sterren claer Een licht der geloviger schaer Christe onse verlosser goet Hoort dat wy bidden met ootmoet Ghy waert bedroeft dat door den doodt Die werelt was in grooten noodt En cranck die ghy maeckten gesont Die door sonden waren gewont Doen swerelts avont-stont verscheen quaemt ghy als een bruydegom natreen Van moeders lijf tot ons confoort Die maget bleef naer u geboort Voor u gewelt en starcke cracht Moet hem buygen alle gheslacht In Hemel en int aertsche dal Die u zijn onder danich al Den son sijn ondergang bewaert Die maen haer schijnsel niet en spaert Der sterren licht helder en fijn Neempt sijn loop waer tallen termijn Heylige heer gebenedyt Rechter van toecomende tyt Wy bidden u doet ons bystant Tegen t’gewelt van den vyant Lof eere cracht en glorie schoon Sy God den vader met zijn soon Die metten heyligeest divijn Eewich eenich drievuldich sijn, Amen.