Leven van Sinte Clara

¶ Van haer menigerande siecten ende wonderlijcke lijsamheit. Dat XLIII capittel

Dertich jaer lanc hadde sij gelopen inden weder loep der hoechster armoeden, ende als sij overmits menigherande siecten ten laesten quam totten eynde des oversten roepens der ewiger salicheit - want die cracht des lichaems

[fol. 29rb]

was in haer vander strengicheit der penitenciën seer ongevallich geworden - soe becommerden haer die siecke inder lester tijt haers levens, op dat sij als sij ghesont was, rijckelijc was begaeft metten verdienten der wercken dat sij - doen sij siec was - worde rijckelijc begaeft naden verdienten des lijdens. Want die doecht wort volmaect inder siecten.

¶ Hoe danich haer wonderlijcke doecht wort volmaect inder crancheit, dat wort hier in meest geopenbaert. Soe dat in harer siecten die sij hadde XXVIII jaer lanc geen murmureringhe oft clagingen en ginc uut der herten. Mer uut hare monde ginc altoes godlijcke sprake ende dancbaerheit. Ende nochtans metten last der siecten dus beswaert soe scheen sij te haesten totten eynde.

¶ Het was Gode behaechlijc haren doot te vertrecken tot dier tijt toe in welcker sij met waerdiger eeren vander Roemscher Kercken daer sij een toecomende dochter of was, ja een geestelijcke dochter, verhoecht soude worden.

¶ Want als

[fol. 29va]

die paus een wile tijts toefde tot Luchdunen met sijn cardinalen ende als die siecte Claram stercker ende meer begonste te dwinghen, soe worden die herten der susteren metten sweerde der droefheit doerwont. Rechte voert soe worde eenre devoter suster Sinte-Pauwels van Sinte-Benedict orden aldusdanighen visioen vertoent, haer dochte dat sij met haer susteren tot Sinte-Damiaens stont bider heiliger abdissen Sinte Claren die zeer siec was ende dat sij lach in een costelijc bedde. Ende als sij al screyende ende met uutstortten der tranen verbeyden dat eynde van Sinte Clara, soe openbaerde daer totten hoefden eynde vanden bedde een suverlijcke schoen vrouwe ende sprac totten susteren die daer screyden:

- "O, dochteren, en wilt niet bescreyen die genen die noch leven sal, want sij en sal niet sterven thent die Heere Jhesus tot haer comt met Sijnen discipulen."

Siet, na corter tijt, soe quam dat hof van Roomen te Parusiën. Ende als die bisscop van Oestiënsen vernam dat dat haer

[fol. 29vb]

siecte altoes vermeerderde, soe haeste hij hem van Perusiën om die bruyt Christi te sien, welcker hij inder officiën een vader was, ende inder besorginge een voeder, ende inder puerrer minne een devoet vrient.

¶ Hij voede haer metten Heiligen Sacrament, ende die ander susteren spijsde hij metter vermaninge der heiliger leeren. Ende Clara badt den heiligen vader dat hij haer ziele ende der zielen der susteren besorghen ende bedencken soude voerden Heere. Ende boven alle dinc badt sij hem dat hij die previlegiën der armoeden die sij verworven hadde, vanden paus souden bidden conformeert te worden ende vanden cardinalen. Welc die hulper der geestelijcheit, als hijt haer loefde metten worden, soe vervuldet hijt metten wercken.

¶ Als een jaer geleden was, soe quam die paus met sijn cardinalen van Parusiën tot Assisiën opdat dat voergaende visioen vanden

[fol. 30ra]

sterfdach van Sinte Claren vervult soude werden. Want als dese paus die boven den menschen was ende neven God wesende, wijsde die persoen Ons Heeren tot welcken inden tempel der vechtender kercken, soe hadden hem die cardinalen als discipulen.