Capitulum III.
Soo came syr launcelot and fonde the hors bounden tyl a tree, and a spere lenyng ageynst a tree, and a swerd teyed to the sadel bowe, and thenne sir launcelot lepte in to the sadel and gat that spere in his hand, and thenne he rode after the bore, and thenne syre launcelot was ware where the bore set his ars to a tree fast by an hermytage. Thenne sir launcelot ranne atte the bore with his spere, and ther with the bore torned hym nemly, and rafe out the longes and the hert of the hors so that launcelot felle to the erhte, and or ever sire launcelot myzt gete from the hors, the bore rafe hym on the brawne of the thyz up to the hough bone, and thenne sir launcelot was wrothe; and up he gat upon his feet, and drewe his swerd, and he smote of the bores hede at one stroke, and there with all came the heremyte, and sawe hym have suche a wound, thenne the heremyte came to sir launcelot and bemoned him, and wold have had hym home unto his hermytage, but whan syr launcelot herd hym speke, he was so wroth with his wound that he ranne upon the heremyte to have slayne hym, and the heremyte ranne awey, and whan sir launcelot myght not over gete hym, he threwe his swerd after hym, for syr launcelot myght tho no ferther for bledyng, thenne the heremyte torned ageyn, and asked sir launcelot how he was hurte. Felawe said sir launcelot this bore hath beten me sore. Thenne come with me said the heremyte and I shalle hele yow. Goo thy wey said sir launcelot and dele noth with me. Thenne the heremyte ranne his way, and there he mette with a good knyghte with many men. Sir said the heremyte, here is fast by my place the goodlyest man that ever I sawe, and he is sore wounded with a bore, and yet he hath slayne the bore. But wel I wote sayd the heremyte and he be not holpen that goodly man shall dye of that wounde, and that were grete pyte. Thenne that knyghte atte desyre of the heremyte gat a carte, and in that carte that knyghte putte the bore and sir launcelot, for sir launcelot was soo feble that they myghte ryght easyly deale wyth hym, and soo syr launcelot was broughte unto the heremytage and there the heremyte heled hym of his wound. But the heremyte myghte not fynde syr launcelots sustenaunce, and so he enpayred and waxed feble bothe of his body and of his wyt for the defaute of his sustenaunce, he waxed more wooder than he was afore hand. And thenne upon a day syr launcelot ran his waye in to the forest, and by adventure he came to the cyte of Corbyn where dame Elayne was that bare Galahalt syr Launcelots sone, and soo whan he was entryd in to the toun he ranne thurgh te towne to the castel, and thenne alle the yonge men of that cyte ranne after sir Launcelot, and there they threwe turves at hym, and gaf hym many sadde strokes. And ever as syre launcelot myghte over retche ony of them, he threwe them soo that they wold never come in his handes
Auteursrechtvrij