Het keurboek der stad Diest

[p. 31]

Van den harinck te vercopene.

54.	Item, harinc, rijn vesch ende bolc zal men vercopen in corve, ende niet op karren, op eene pene van v.s.; en waren vreemde liede.
55.	Item, soe wie yemanne vee, vesch ocht vleesch vercoept, daer hi gheselle ane es ocht blijft, hij en seght denghenen dies dat goet es, dien hijt vercoept., zaels ghelden c. s., ende een jaer zijn ambacht verliesen.
56.	Item, men zal engheenrehanden vesch vueren noch doen vueren buten der stad vore den onderen, opte pene van x. s.
57.	Item, nieman en zal harinc van den heilighen lande vercopen dan beneden Emonts oversten hornoc, noch stermijn, noch buxhoren daeraf ghemaect, noch ouden harinc, opte pene van xx. s. Ende nieman en zal den voers. harinc vercopen gheweict, dan ter voers. stede, opte zelve pene.
58.	Item, scoenschen harinc zal men vercopen daer men wilt. Ende wat gherst es, eest gheweict ocht ongheweict, daer zal men een banire bi steken op eenen stec twee ellen lanc. Ende des ghelijx, bi alle vesch daer die banire bi hoeret, opte pene van x. s. (Bijvoegsel, 16^e eeuw: uutgenomen gesoutenen vesch, welken men vercopen mach sonder baniere).

[p. 32]

59.	Item, die eneghen ghersten harinc menght onder anderen harinc, zaels ghelden x. s.
60.	Item, die eneghen harinc, die gheboden es te stane beneden den voers. hornoc, menght onder anderen harinc, zaels ghelden c. s. ende den harinc verliesen.
61.	Item, nieman en zal panharinc vercopen in tonnen ghesouten, opte pene van c. s., ende den harinc verloren; maer in corve, ocht in manden mach men vercopen, als men ghewoenleec heeft gheweest te doene.
62.	Van zamenspanningen. Item, soe wie zameninghe ocht conspiracie maect in de stat, sonder wille ons heren, der scepenen ende sraets van der stad, zaels ghelden x. lib.
63.	Van de stormklok te luiden. Item, die de stormclocke luydt sonder wille srichters ende der scepenen, en zij te node, zaels ghelden x. lib. Ende die dien mesdadeghen huyst ocht hoeft, zaels ghelden xl. s., duet hijt wetende ocht met zinen wille.
64.	Item, die de stormclocke luden wilt, al eest met wille srichters ende der scepenen, hij zal se verborghen ende daer gheven c. s., die clocke mede te houdene (Kantteekening: Borge te stellen voor het luyden van de groote clocke).