Het keurboek der stad Diest

Van dien die dese vorgh. coeren breken, lxxiij.

1.	Die dese vors. coeren ende statuten breken, also menech werf alsijt doen, also meneghe mesdaet suelen si ghelden. Ende dies niet connen gheghelden, suelen uter stad sijn verbannen also menech iaer alsi menech pond verboeren, ocht alse hen menech pond ghebrect, na ghelanghe. Ende compt enech van hen binnen Dyste dien tijt dat hi es verbannen, so sal hi dobbel mesdaet ghelden alse dicke als hijt duet.
2.	Die oec dien mesdadeghen huist of hoeft, eten, drincken gheeft of vercoept, wetende sijns, of met sinen wille, saels ghelden, alse dicke alse hijt duet, v. lib.
3.	Hi en ontsculdeghe home met sinen eede, dat sonder sinen wetene sij.
4.	Die den ghenen huist of hoeft die eneghen coere brect of heeft ghebroken, sal selver ghelden dien coere.