Jaerboeken van het souvereine gilde der kolveniers, busschieters en kanonniers gezegd hoofdgilde van Sint Antone, te Gent . Deel 3

1646.
Aengaende t'exempteren vier mannen vande borgherlicke wacht.

An myne edele heeren Hoochbailliu ende Schepenen vander Keure.

Supplierende vertooghen ootmoedelick, Conynck, Heuverdeken, Deken ende Proviseerders, metgaders de ghemeene supposten vanden Gulde van S^t Anthonis binnen deser Stede, hoe dat zylieden, in ghetalle van neghen hondert ofte daer ontrent, hemlieden van over veel jaeren thaerlieder Hoven hebben gheexerceert int schieten metten doelstocke, vierroers ende snaphaene, daer deure dat de borghers, frequenterende de wachten deser Stede, in het exercitie vande musquetterye volcommelick gheinstrueert worden, ende alsoo sy supplianten, tot meerder bewaernisse ende defensie der selver Stede, van intentie syn haerlieder supposten van ghelycken te doen oeffenen inde handelynghe ende aflaeten van grof canon, ende daer toe te verwillighen tot vier canoniers tot dienste vanden selven Gulde ende deser Stede, metsgaders tot dien eynde thaerliederen particulieren coste te doen ghieten een stuck canon, om haerlieder daermede

[p. 111]

te exerceren, ende dat zylieden, tot beter directie ende onderhoudt vande selve wapenen, allessins gheraeden hebben ghevonden, ter interventie van uwe edele heeren voorsaeten, het huys vanden selven Gulde, twelcke teenemael te ruyne ghecommen ende onwoonbaer was, van nieuws op te rechten, soo ist dat begroet hebbende uwe edele heeren voorsaeten tot het legghen vanden eersten steen, als protecteurs ende uppervoochden vanden selven Gulde, de welcke daertoe ghedient syn gheweest te committeren jonckeren Niclays Sersanders ende van Royen metten Secretaris Overwaele, ter wiens interventie, aggreatie ende geluckich aenlegghen, den selven steen gheleyt ende werck begonnen is gheweest, alles inghevolghe vande modelle by uwe edele heeren voorsaeten gheconcipiert ende gheapprobeert, welck werck eyndelynghe soo verre ghebracht is dat het teenemael, tot groot cieraet deser Stede, volcommen is gheweest, nemaer alsoo boven de goede jonsten ende liberaelheyt vande supposten den selven bauw noch ten achteren is staende ter somme van vyfthien hondert neghen ponden dry schellynghen thien grooten, zoo blyckt by de respective rekenynghe dien angaende ter interventie van uwe edele heeren ghecommitteerde ghesloten ende ghearresteert, ende alsoo het voornomde huus by eenighe cooplieden ende wercklieden de materialen daertoe noodich ghecrediteert hebbende, by maniere van pandynghe als andersins, wort ghepraempt tot verhael van haerlieder pretensien, waerdoore dat het selve Gulde ende exercitie vande wapenen allesins noodich ter defensie deser Stede, in dese ieghenwoordighe troublen ende conjoincture des tyts teenemael in gronde soude gheseylt worden, soo ist, omme daerinne te voorsiene, dat sy haerlieder toevlucht syn nemende an uw edele.

Biddende oodmoedelick ten fyne dat de selve ghedient sullen worden ande supplianten te consenteren, dat sy sullen

[p. 112]

vermoghen te kiesen tot vier mannen uut elcke respective compaignien deser Stede, ende de selve alleendelick haer leven lanck gheduerende t'exempteren vande borgherlicke wacht, behoudens nochtans, dat sylieden sullen trecken persoonen die luttel ieghenwoordelick de wacht syn doende ofte contributie betalende, ende met expresse conditie, dat sy, supplianten, sullen besorghen de voornomde kanoniers ende doen gieten een stuck canon, metghaders haerlieder supposten texerceren in het handelen ende afbranden van het canon deser Stede, daerinne luttel ofte gheene ieghenwoordelick gheexerceert en syn, sulx dat daerdeure de Stadt grootelix ghebenificieert ende bewaert sal worden, jae ooc sonder interest vande wachten ende contributien deser Stede, regard nemende dat dusdanighe noodighe publicque wercken syn gheschiedende ten coste vande Stede ende blyven inder eeuwicheyt ten dienste der selver, uutterlick te verleenen commissarissen omme dies angaende in communicatie te commen, twelck doende, enz. De supplianten in persoone.

Appostillen staende in marge vande voornomde requeste.

Zy ghetoocht myn edele heere den Hoochbailliu. Actum den ix april 1646. (Onderteeckent), Ghyselins.

Myn heere den Hoochbailliu ende Schepenen vander Keure, ghelet hebbende up den inhouden van desen, ende omme de redenen hierby gheallegiert ende andere hemlieden moverende, metghaeders accepterende de presentatie hierby ooc ghedreghen, van dat die van het Gulden van S^te Anthonis te vreden syn ende presenteren vier canoniers, uut het voorseide Gulde, tot dienste deser Stede, omme die, ten coste van het selve Gulde, temployeren in het aflaeten van grof canon, metghaders ten particulieren coste van het voorseide Gulde te doen ghieten een stuck canon, omme

[p. 113]

tselve gheemployeert te worden ten dienste deser Stede, twelcke ooc blyven sal in proprieteyte an de voornomde Stede, consenteren dat die vanden voornomden Gulde, omme daermede te volstrynghen ende betalen de vyfthien hondert neghen ponden dry schellinghen thien grooten, die sy by slote van rekenynghe ten achteren bevonden worden, sullen vermoghen te kiesen tot vier mannen uut elcke respective compaignie deser Stede, die alleendelick haer leven lanck gheduerende exempt sullen wesen van personnele borgherlicke wacht ende contributie van diere, met conditie nochtans dat gheene vande selve vier persoonen by hemlieden te trecken uutte voorseide compaignien, ieghenwoordich en syn wakende ofte contributie betalende, wanof sy schuldich sullen wesen, alvooren over te brynghen pertinente lyste, by gheschrifte, inhoudende de naemen ende toenaemen vandiere, omme die byde voornomde Scepenen gheapprobeert ende gheaggreert te worden, sonder dat eenighe vande selve mannen sullen vermoghen haerlieder vrydom te vercoopen ofte vertransporteren an eenen anderen, ofte dat die van het voorseide Gulde yemant anders sullen vermoghen te surrogeren in haerlieder plaetse naer haerlieder overlyden, nemaer sullen die moeten uutsterven; ooc met conditie ende andersins niet, dat de voorseide vrye persoonen schuldich ende verobligiert sullen wesen te waeken ende doen de personele borgherlicke wacht, zoo wanneer ende telcken den noodt deser Stede sulx verheerschende, daer toe van weghen Scepenen voornomt vermaendt sullen wesen, ende voorts, dat zy telckerwerf naer yemants aflivicheyt sullen d'advertentie doen ande voornomde Schepenen, omme danof notitie ghehouden te worden. Actum int Collegie den xiii^en april 1646. (Onderteeckent), Overwaele⁽¹⁾.

(1) Stads archiven: Reg. WW, f^o 40 v^o.