Jaerboeken van het souvereine gilde der kolveniers, busschieters en kanonniers gezegd hoofdgilde van Sint Antone, te Gent . Deel 3

1610.
Acte daerby alle guldebroeders ghelast zyn telcken gaeydaeghe in persoone te commen, upde boete van vyf schellynghen grooten.

Myne edele heeren Hoochbailliu ende Schepenen vander Keure deser Stede van Ghendt, up tvertooch hemlieden by supplicatie ghedaen van weghen Conynck, Hooftman,

[p. 81]

Deken ende Proviseerders vanden souverainen Gulde van myn heere S^te Anthuenis, onderhouden byde coleuvreniers ofte busschieters ende canonniers binnen der selver Stede, van dat zy by octroye hemlieden ghejont inden jaere xv^e xv, by wylent van hoogher ghedachten den hooghgheboorne Caerle, alsdoen prince van Spaignen, etc., grave van Vlaenderen, zouden vermoghen te maecken, stellen ende statueren alderande ordonnantien, statuuten ende keuren, als zylieden ten meesten proffyte ende voorderynghen vanden selven souverainen Gulde, up t'adveu, aggreatie ende confirmatie van hemlieden Hoochbailliu ende Schepenen, souden bevinden te behooren. Ende alsoo zy tselve haerlieder goedt vermoghen employerende uut crachte vandien, by haerlieder ghemeenen voyse resolutie ende accorde, tot meerderen voordeele, dienste ende chirate vanden voornoemden Gulde, gheprocedeert hadden tot t'maecken ende statueren vande ordonnantie hier naervolghende: Conynck, Hooftman, Deken ende Proviseerders vanden souverainen Gulde van myn heere S^te Anthuenis, onderhouden binnen deser Stede van Ghendt, ordonneren by desen, dat alle de guldebroeders vanden selven Gulde ghehouden worden, voortaen alle jaere telcken gaeydaeghe, twelck wesen zal den tweeden Syncxendach, hemlieden te vinden in persoone binnen den Hove van S^t Anthuenis, ten twaelf hueren precys, voorsien met behoorlick gheweere, omme den Conynck te accompaigneren ende vereeren, ghereserveert den Eedt, edele ende ouderlynghen vanden Gulde, die sullen vermoghen te commen te peerde totter plaetse daermen den papegaey schieten sal. Ende van daer wederomme tot up het Stadthuus ofte daer het bancquet gheschieden sal, ende van ghelycken oock te doene in alle andere generaele ende solemnele vergaederynghen ende convocatien vanden Gulde, in sulcker voughen als hemlieden by resolutie vanden Eedt, telcker reyse

[p. 82]

gheboden ofte gheinsinueert sal worden, up peyne van byde deffaillanten telcken te verbeuren, tot proffyte vanden Gulde, tot vyf schellynghen grooten, ende de Proviseerders dobbele, dit alles ten zy hebbende legittime excuse, als van ongheaffecteerde absentie ofte ziecte, diemen sal moeten te kennen gheven anden Bailliu ofte Cnape die hemlieden dachvaerden zal, ende oock anderssins verriffieren in handen vanden Deken, dies versocht synde. Actum ter camere vanden Hove den xvi^en meye xvi^e thiene, my toorconden, inde absentie vanden Clercq, onderteeckent Claissone. Versouckende bydien volghende den laste ende bevele vanden selven octroye, dat zylieden Hoochbailliu ende Schepenen de selve goede ende noodighe ordonnantie souden hebben te approberen ende confirmeren, ende alsoo te authoriseren den eersten officier, daertoe versocht, omme de selve, tot laste vande deffaillanten, ter executie te legghen, tot recouvre vande boeten ende peynen daerby verclaerst, hebben, om tselve Gulde, wesende het aldernoodichste in alle occurentie van oorloghe, in dese onseker conjoincture van tyde, te stellen ende restitueren in synen eersten ouden goeden staet, de selve supplianten het voorschreven haerlieder zoo goedt ende noodich versouck gheconsenteert, zoo zy doen by desen, alsoo bydien de selve gheconcipierde ende haerlieder gheresolveerde ordonnantie approberende ende by desen confirmerende, lastende ende bevelende, in ghevolghe van dien alle diet behoort, hemlieden respectivelick daernaer te reguleren, upde boeten, peynen ende correctien daerup ghestelt, tot executie vande welcke den eersten officier, daertoe versocht, by dese oock volghende haerlieder versouck gheautoriseert wordt. Aldus ghedaen den xxiiii^en meye xvi^e thiene. (Onderteeckent), J. Hebberecht⁽¹⁾.

(1) Reg. b, f^o xxv.