Jaerboeken van het souvereine gilde der kolveniers, busschieters en kanonniers gezegd hoofdgilde van Sint Antone, te Gent . Deel 3

[p. 79]

1610.
Angaende de boete te verbeuren byde guldebroeders hemlieden absenterende int schieten vanden papegaey.

An myne edele heeren Schepenen vander Keure in Ghendt.

Supplierende vertooghen reverentelie den Conynck, Hooftman, Deken ende Proviseerders vanden souverainen Gulde van S^t Anthuenis, onderhouden binnen deser Stede, hoe dat zy volghende de confirmatie hemlieden verleent, by wylent hoochgheboren Kaerle, prince van Spaignen, inden jaere 1515, vermoghen by advyse van UL. Ed. te maeckene alderande statuuten ende ordonnantien den selven Gulde oorboorlick, dienvolghende hebben de supplianten, by ghemeenen advyse, ghemaeckt d'ordonnantie hiermede gaende, biddende dat UL. Ed. beliefve de selve te confirmeren, ende te authoriseren den eersten officier deser Stede, daertoe versocht, omme de selve ordonnantie upde diffaillanten ter executie te moghen legghen, tot innynghen vande boete daerby ghestatueert, ende sult wel doen.

Sy ghetoocht myn heere den Hoochbailliu ten eynde hier versocht. Actum int Collegie den xxi^en meye 1610. (Onderteeckent), J. Hebberecht.

Den Hoochbailliu deser Stede, soo verre alst hem angaet, consenteert int versouck vande supplianten alhier ghedaen. Actum den xxiii^en meye 1610. (Onderteeckent), Jac. de Langlée.

Myn heere den Hoochbailliu ende Schepenen vander Keure consenteren de supplianten dit huerlieder versouck, ende alsoo auctoriseren den eersten officier daertoe versocht, omme dese haerlieder gheconcipierde, nu alhier gheconfirmeerde nieuwe ordonnantie ter executie te legghen ten

[p. 80]

laste van diet behooren sal. Actum int Collegie den xxiiii^en meye 1610. (Onderteeckent), J. Hebberecht.

Conynck, Hooftman, Deken ende Proviseerders vanden souverainen Gulde van myn heere S^t Anthuenis, onderhouden binnen der Stede van Ghendt, ordonneren by desen dat allen de guldebroeders vanden selven Gulde ghehouden worden hemlieden te vinden binnen den Hove van S^t Anthuenis upden xxxi^e deser maent, wesende den tweeden Synxendach, ten xi hueren precis, voorzien met behoorlick gheweere, ghereserveert de edele, ouderlynghen ende notable vanden Gulde, die ontstaen zullen met een zygheweere alleenelick, omme den Conynck t'accompaigneren ende vereeren met huerlieder presentie, te voet ofte te peerde, tot de plaetse daermen den papegaey schieten sal, ende van daer wederomme tot up het Stadthuus, up peyne van by elc van hemlieden te verbeuren, tot hulpe vanden bancquette, twintich stuvers, ende de Proviseerders dobbele, dit alles ten zy hebbende legitime excuse, diemen sal moeten te kennen gheven anden Bailliu ofte Knape die hemlieden dachvaerden sal. Actum xvi^en meye 1610, my toorconden inde absentie vanden Clercq. (Ondert.), J. Claissone⁽¹⁾.

(1) Reg. b, f^o xix.