Jaerboeken van het souvereine gilde der kolveniers, busschieters en kanonniers gezegd hoofdgilde van Sint Antone, te Gent . Deel 3

1609.
Toelegh van zes ponden grooten tsiaers, tot hulpe voor het schieten vanden papegaey.

Schepenen vander Keure der Stede van Ghendt, up tvertooch hemlieden by supplicatie ghedaen byden Hooftman,

[p. 67]

Deken, Proviseerders ende ghemeene guldebroeders ende schutters vanden souverainen Guldene van myn heere S^t Anthuenis, onderhouden byde busschieters der selve Stede, van dat zy nu, midts dese trefve naer de voorgaende lanckduerighe oorloghe, gheadviseert ende gheresolveert hadden te schieten den papegaey, zoo zy in allen ouden tyde van paeyse jaerlicx ghewoone waeren, omme daerby tselve eerlick ende noodelick exercitie in alle occurentien in vigeure te houden, daertoe zy alleenelick besuydene souden alle de groote excessive ende noodeloose oncosten, die hier te vooren de voghele afgheschoten hebbende, te dooghen ende draeghen stonden, ende alsoo hemlieden van Stedeweghe daertoe jaerlicx van inden jaere 1525, ende daer te vooren, soo alle etelicke ende drynckelicke zaecken van zeer cleenen pryse ende weerde waeren, ghejont ende bygheleyt wierdt, tot zes soo zeven ponden grooten, emmers die vanden Guldene van myn heere den Ed. ruddere S^t Jooris, zoomen byde oude rekenynghe bevinden soude, ende oock hemlieden te verleenen vrydom van alle sLandts ende Stedelasten upden wyn ende bier, die zy ten daeghe van tselve schieten in haerlieder ordinaire maeltydt slyten zullen. Ende bet voorts, omme de selve schutters te beter te encouraigieren, datmen den Conync, met al zyn menaige, soude consenteren vrydom van alle sLandts impost ende impositien, midtsgaders van alle assysen ende andere lasten deser Stede, voor den termyn van thien jaeren, ende daerup ghehoort t'advys van jo^r Cornelis d'Hertoghe, tresorier der selver Stede, besocht ende inde selve oude rekenynghen ghevisiteert hebbende, wat in voorledene tyden in ghelycke occurrentie ghedeghen ende ghepasseert soude moghen wesen, ende up alles rypelick ghelet, Schepenen voornomt, al ghesien ende ghehoort, hebben omme de noodighe conste vande supplianten te onderhouden ende

[p. 68]

vermeerderen, ende haerlieden voornomden Guldene te brynghen, in zynen eersten ouden goeden staet, jaerlicx ande supplianten ghejont ende toegheleyt tot zesse ponden grooten, tot hulpe van het schieten van haerlieder jaerlicxschen papegaey, ende verclaeren dat den gonen die den selven afschieten zal, vry ende exempt sal wesen van alle lasten ende assysen deser Stede, voor den tydt van twee jaeren, innegaende ter daete van tselve afschieten, te grooten ende stellen, by quote, naer de quaeliteyt, faculteyt ende menaige vanden selven affschietere, daertoe hy hem, by supplicatie, an hemlieden Schepenen sal addresseren, omme de selve grootynghe te doene, ende ten surpluuse, raeckende huerlieder voordere pretensie tot hulpe vande ordinaire maeltydt, diemen alsdan ghewoone is te houdene, zullen de supplianten, ten daeghe daertoe dienende, an hemlieden Schepenen andere requeste moghen overgheven, omme naer d'occurentie des tyts daerup te ordonneren, soo zy bevinden sullen te behooren, al behaudens tselve gaeyschieten ende de maeltydt van dien gheschieden sal binnen deser Stede ofte vrydomme van diere, lastende ende bevelende alle diet angaet hemlieden respectivelick daernaer te reguleren, ende bydien ordonneren jo^r Cornelis d'Hertoghe, als Tresorier, ende alle andere zyne naercommers int selve officie, hemlieden jaerlicx de selve gheaccordeerde zesse ponden grooten, tot wederroup te betaelen, ten huerlieden ordinairen papegaey daeghen, wesende telcken tweeden zondach naer Paesschen, ende nu voor desen jeghenwoordighen jaere extraordinairelick up den tweedden Syncxendach. Actum int Collegie den lesten april xvi^e neghene. (Onderteeckent), J. Hebberecht⁽¹⁾.

(1) Reg. b, f^o xx.