Jaerboeken van het souvereine gilde der kolveniers, busschieters en kanonniers gezegd hoofdgilde van Sint Antone, te Gent . Deel 3

1607.
Copie vande ordonnantie staende upde requeste van Hooftman, Deken, ende Proviseerders vande dry Hooftgulden van S^t Jooris, S^t Sebastiaen ende S^t Anthuenis.

Schepenen vander Keure, omme de redenen alhier vertoocht ende andere hemlieden daertoe moverende, sonderlynghe omme dese dry Gulden wederomme te restitueren ende brynghen in huerlieden eersten ouden goeden staet, ende een yeghelick meer ende meer te verwecken omme daerinne te commen ende haerlieden respective eerlicke exercitien te exerceren, hebben, by provisie ende tot wederroup, uut pure jonste ende liberaelheyt, elc vande voorseyde dry aude groote Gulden, inde plaetse van tgone zy uute burse ende tresorye deser Stede ghewoone zyn te proffyteren, tot hulpe vanden incoop van haerlieden wekelicke zondachprysen, emmers eenighe van hemlieden elc bygheleyt tot vyftich guldens tsiaers, zonder dat zylieden de voorseyde extraordinaire somme elders sullen vermoghen te diverteren, up peyne van die te verliesen, daernaer dienvolghende den jeghenwoordighen Tresorier ende successivelick alle andere zyne successeurs int selve officie, hemlieden respectivelick tot tselve wederroup zullen hebben te reguleren, ende de supplianten van tselve beneficie laeten gauderen. Actum ix^en ougste xvi^e zevene. (Onderteeckent), J. Hebbrecht⁽²⁾.

(2) Reg. b, f^o xviij v^o.