Jaerboeken van het souvereine gilde der kolveniers, busschieters en kanonniers gezegd hoofdgilde van Sint Antone, te Gent . Deel 3

1606.
Restitutie soo van tHoff als vande privilegien vanden Gulde ende anderssins.

Allen den gonen die dese presente letteren sullen sien ofte hooren lesen, Schepenen ende Raedt der Stede van Ghendt, saluyt, doen te wetene alsoo dheer Gheeraert van Ydeghem, als Ontfangher vanden helighen Gheest van S^te Niclaus keercke, ende oock vande selve keercke, gheprocedeert hadde tot afwinnynghe van tHoff, huysynghen ende toebehoorten vanden Gulden van S^te Anthuenis binnen deser Stede, zoo tselve met alle zyne vryheden, aysementen,

[p. 50]

appendentien ende dependentien ghestaen ende gheleghen is inden ganck naer den Voghelensanghe, omme daeranne te recouvreren dachterstellen van zeker renten daerup bezet, den helighen Gheest ende keercke voorseyt toebehoorende, ende dat tvoorseyde Hoff, met tbernen vande leste keersse, bleven was up Gillis vander Venne, Deken gheweest vanden voorseyden Gulde, voor de somme van hondert guldenen eens, boven alle heerelicke, kerckelicke ende andere renten daeruute gaende, die hy tsynen laste nam, breeder byde letteren van decrete danof wesende ghespecifieert van daeten xiiii^en septembris xvi^e vyfve, soo eyst dat den voorseyden Gillis vander Venne alle zyn recht, cause ende actie hem ter causen van tvoorseyde decret an tvoorseyde Hof competerende, ons overghelaeten, ghecedeert ende ghetransporteert heeft, volghende den contracte danof zynde alhier verkent den viij^en novembris int voorseyde jaer xvi^e vyfve. Twelcke wy sonderlynghe ghedaen hebben dies instantelick versocht gheweest zynde van weghen den Hooftman, Conynck, Deken, Proviseerders, ende ghemeene guldebroeders vanden selven Gulde, ons te kennen ghevende, dat veele lieden van quaeliteyte ende met eeren, ter oorsaecke vande voorseyde lasten ende renten, metgaders de reparatien ter dier causen daeghelicx gheschiedende, hemlieden int selve Gulde lieten te begheven, ende metter busse int voorseyde Hof te exerceren, waerdeure tselve Gulde apparent was teenegaere tondergaene ende onderblyven. Biddende midtsdien, dat midts tvoorseyde overnemen, wy hemlieden souden willen consenteren int voorseyde Hof te moghen continueren naer oude costume, ende ten ghewoonelicken daeghen huerlieder voorseyde exercitie metter busse, ende tvoorseyde Hof te frequenteren met liber acces, thuerlieder ordinaire vergaederynghe inde doelen, schiethuusen ende der Gulde camere, zoo zy te vooren ghedaen

[p. 51]

hebben. Biddende oock om continuatie van zulcke prestatie uuter tresorie deser Stede, als zy van oudts ghewone zyn te profficteren, als van vier schellynghen grooten ter weke voor wynghelt, vier en twintich schellynghen grooten over twaelf kannen present wyns, telcken S^t Anthuenis avont, drye ponden grooten, telcken S^t Anthuenis daeghe, tot festieren van huerlieder Hooftman ende ander heeren, ende twintich schellynghen grooten voor papegaeyghelt, versouckende oock datmen den Conchierge ofte Cnape vanden selven Hove soude willen belasten, dat hy sonder recompense sal onderhouden de schyven ende eerde doelen vanden voornoemden Gulde, ende oock doen draeghen ende eerlick croonen de tortsen telcker processie generaele, die oock staen zal tot ghebode ende dienste vanden voorseyden Hooftman, Conynck, Deken, ende Proviseerders vanden voorseyden Gulde, ghelyck hy hier te vooren ghedaen heeft, midts dat den Eedt hem leveren sal de tortsen ende de keerssen ende oock betaelen tcelebreren vanden Goddelicken dienst, tot volstrynghen van welcke oncosten ende andere de selve guldebroeders thuerlieder proffyte houden souden de dootschulden verschenen tsydert den voorseyden achsten novembris xvi^e vyfve, ende de gone naermaels vallende, van welcke dootschulden elcken Deken anden Eedt jaerelicx soude rekenynghe doen, up dat d'ancommende Proviseerders ende guldebroeders in gheene voorgaende schulden noch lasten en vallen, versouckende oock dat wy omme de guldebroeders te subleveren vanden oncost, die zy frayeren van cruyt, loot ende anderssins tgheheele jaer schietende naer haerlieder sondachprysen, tot advanchemente vande selve weeckprysen zouden willen jonnen drye schellynghen vier grooten ter weke, die souden ghedistribueert worden, ende alle prysen besteedt volghende de reglementen die den Eedt adviseren soude, den welcken

[p. 52]

oock soude moghen stellen alle goede ordonnantien diemen int schieten ende camere observeren sal, interpreterende de oude ende die veranderende naer tbevindt, oock sonder interventie vande guldebroeders inden Eedt niet wesende, blyvende nyet min de selve guldebroeders in huerlieder gheheele, om hemlieden te beclaeghen an tmagistraet, indien hem yemandt gheinteresseert vonde. Ten regarde van welcke beneficien, den voornoemden Hooftman, Conynck, Deken ende Proviseerders, Ouderlynghen, notable ende ghemeene guldebroeders hemlieden verobligieren, boven alle andere guldebroeders van ander Hoven ende poorters ofte insetenen deser Stede, met alle vlieticheyt, hemlieden te begheven, de eerste ende bereedtste, met huerlieden wapenen ende doelstocken, om Heere ende Wet by te staene, dies int heymelick ofte openbaerlick vermaent zynde, volghende den eedt, den welcken elc ghehouden sal syn te doene naer costume, observerende d'oude solempniteyten inder manieren naerschreven. Ick zweere te wesen vanden Gulde van myn heere Sint Anthuenis busschieter deser Stede van Ghendt, de heylighe catholicque religie vooren te staene, den grave ende gravinne van Vlaenderen ghetrauwe te syne, Heere ende Wet deser Stede bystantich te wesen ende te ghevalle te commen tallen tyden alst van noode werdt, ende voorts al te doene dat een goedt ende ghetrauwe guldebroeder van S^t Anthuenis schuldich is van doene, zoo moet my Godt helpen ende al zyn heylighen. In welck voorseyde Gulde nyemant en zal anveerdt worden, dan de gone wesende van goeden, eerlicken ende catholicquen levene, versouckende oock den selven Hooftman, Deken ende Proviseerders om de guldebroeders te animeren van hemlieden te voorsiene van doelstocken, ende hemlieden daermede texerceren ten fyne voorschreven, dat wy oock jaerlicx tvoorseyde Gulde souden willen schyncken ende jonnen

[p. 53]

drye selveren prysen, die voortaen gheschoten zullen worden int selve Hof ende Gulde, ghelyck in andere Hoven, byden Eedt ende guldebroeders voorsien wesende van huerlieder eyghen doelstocken, ende gheene andere, ten waere dat eenighe heeren naer deselve prysen begheerden te schieten, de welcke van ander guldebroeders van doelstocken zullen moghen gheaccommodeert ende ghereeckt worden, volghende zeker gheschrifte by hemlieden ons overghegeven. Soo eyst dat wy Schepenen voornoemt, omme de redenen voorschreven, ende sonderlynghe om tvoorseyde Gulde wederomme te brynghen in zynen ouden fleur, den voornoemden, Hooftman, Conynck, Deken, Proviseerders ende ghemeene guldebroeders gheconsenteert hebben ende consenteren, by desen, tghebruyck vanden voorseyden Hove, doelen, schiethuusen ende Gulde camers, naer oude costume, verclaerende voorts dat wy tselve Gulde verstaen te continueren de toelegghen ende beneficien hiervooren, ende ander diemen van oudts tyden hemlieden ghedaen heeft, ende ghelyck wy ander Gulden deser Stede zyn tracterende, alles tonser discretie, sonder ons ofte onse naercommers in officie hiermede breeder te verbinden ofte verobligieren, dan wy tot noch toe gheweest hebben. Blyvende nyetmin in vigeure alle de oude privilegien, preeminentien ende confirmatien tvoorseyde Gulde gheaccordeert ende gheiont, van ouden ende immemorialen tyden, byde Graefven ende Graefneden van Vlaenderen, hoochlovelicker ghedachten, metgaeders onse voorsaeten in wette, willende ende begheerende dat dinhouden van desen sal volcommen wesen, ende effect sorteren sonder zwaricheyt ende contradictie. Ghegeven in kennesen der waerheden, onder den zeghel van zaecken der voorseyde Stede van Ghendt, den lesten van ougste, int jaer zesthien hondert ende zesse, int schependom van mher Anthuenis Triest, ruddere, heere

[p. 54]

van Meerelbeke, etc., mher Loys de Blasere, ruddere, heere van Idewalle ende huerlieder medeghesellen. Onderteeckent up den ploy, M. de Vriendt, ende gheseghelt met eenen groenen zeghel⁽¹⁾.

(1) Stads arch Reg. 1606 f^o 29. - Reg. b, f^o xiiij v^o.