Jaerboeken van het souvereine gilde der kolveniers, busschieters en kanonniers gezegd hoofdgilde van Sint Antone, te Gent . Deel 3

1589.
Verkooping van het Hof van het Gilde van S^t Antone op den Vogelzang.

Allen den ghonen die dese presente zullen zien ofte hooren lesen, Schepenen ende Raedt der Stede van Ghendt saluut. Doen te wetene dat naer de wettelicke pandinghen eyghendom eerste keerckghebodt ende afwinnynghe vercreghen by Gheeraert van Ydeghem, Ontfanghere van Sinte Nicolaus keercke, up een huus ende stede toebehoorende het Gulden van myn heere Sinte Anthonis, ghenaemt de busschieters Hof, zo tzelve mette erfve, bogaert, lochtinck vanden huusen ende zulc alsser meer an dependeert, van vooren tot achtere, eertvast ende naghelvast, ghestaen ende gheleghen es ten voorhoofde over de Tinnen Potbrugghe up de Lieve, daer ment heedt te Voghelensanghe, streckende tzelve Hof neffens der erfve van........an dheen zyde ende de erfve van........an dandere, int gheheele belast, eerst met ii sch. ii gr. tsjaers erfvelick lantcheins in prouffycten vanden heilighen Gheest van Sinte Michiels keercke, tachtere met Jansmesse xv^e lxxxix^tich zes jaeren, vi gr.

[p. 40]

tsjaers in prouffycte van de keercke van Sinte Jans, tachtere zeven jaeren, iiii sch. gr. tsiaers erfvelicke sourente in prouffycte van desen vervolghere in zyne voornoemde qualiteyt, tachtere met Sint Jansmesse 1588, acht jaeren, daervooren dese procedueren gheschiedende zyn, noch v sch. grooten tsiaers ooc erfvelicke sourente in prouffycte van den heilighen Gheest van Sinte Nicolaus keercke voornomt, verachtert met Bamesse 1589 drie jaeren, vyf ponden grooten tsjaers, den penninck xvi^e, in prouffycte van Franchoys Molineus, Raedt, etc., met zyne medehoirs van Franchoys Toebast, tachtere metten x^en september 1589 vyf jaeren, ende ten lesten xvii sch. iiii gr. vier penninghen tsiaers, ooc den penninck xvi^e, in prouffycte van Lieven van Hulse, tachtere zes jaeren, zonder meer commers emmers ten lantboucke bevonden. Beloopende de voorseyde partien te samen in principaele ende croyse, mette wettelieke costen hieromme gheschiet ende noch te gheschiedene, ter tauxatien van Schepenen voornomt, ghereserveert tcapitael vanden onlosselicken renten, ter somme van hondert dertich ponden zeven scellinghen neghen grooten, behaudens in als juuste calculatie. Ende omme vanden zelven huuse ponden scellinghen ende penninghen ghemaect ende alzo metten bernen van twee keerssen vercocht ende ghedecreteert te werdene, zo was danof in Vierschaere van Schepenen voornomt ghebernt eene eerste keersse, xxviii^en july 1589 lestleden, doen Marcus Snoucq, procureur over de vervolghere, tzelve huus ende erfve innestelde in zynder voornoemde qualiteyt mette croysen van zyne rente ende teroys pendente lite verschenen, ende de ghone voor hem ten lantboucke bekent, ende de costen vanden vervolghe, beloopende tzelve instel ter somme van vyf ponden thien scellinghen, zes penninghen grooten. Al dwelcke alzo ghedaen ende overleden zynde, zo was danof in Vierschaere van Schepenen voornomt ghebernt

[p. 41]

eene tweede ende leste keersse up den dach van hedent date desere, doen Snoucq over Franchoys Molineus tzelve huus ende erfve noch verhoochde, met zyne rente van vyf ponden grooten tsiaers, in principaele ende croyse ende naer zekere continuatie, zonder breedere verhooghinghe, de voorseyde keersse uutghync, ende bleeft alzo tvoorseyde huus up den voornoemde vervolghere (midts de lossinghe te xiiij^en daghen) als leste verhooghere ende meest daernaer gheboden hebbende, so eyst dat Schepenen voornomt ghehoort trapport van Mathys Rogiers, huerliedere ghezworne bode, die relateerde de behoorlycke keerckgheboden, inthimatien ende plackinghen van briefven ghedaen zynde naer costume, in ghelycken gheuseert ter maninghe van huerlieder wettelicke Maenheere hebben ghewyst ende wysen by desen tvoorseyde huus, in handen vanden voornomden vervolghere, omme by hem ghebruuct ende ghepossesseert te werdene als zynen properen wel ghecochten ende ghedecreteerden goede, verzouckende dienvolghende aen elcken diet zal moghen angaen, den zelven te stellene inde reele ende actuele possessie van dien, zonder contradictie van yemande, midts doende zeker souffisant naer costume. Ghegheven in kennessen der waerheden, onder den zeghele van zaken der zelver Stede. Desen derden november xv^e neghenentachtentich⁽¹⁾.

(1) Los stuk. Onzer verzameling.