Jaerboeken van het souvereine gilde der kolveniers, busschieters en kanonniers gezegd hoofdgilde van Sint Antone, te Gent . Deel 3

1561.
Twee schellingen grooten worden gegeven alle zondagen aen het Gilde van S^t Antone door Schepenen vander Keure.

An myn heeren Scepenen vander Kuere in Ghendt. Supplieren oodtmoedelic uwe goetwilleghe dienaers ende ondersaten, Coninck, Hooftman, Dekin ende Proviserers vanden Gulde van mynen heere Sente Anthuenis die men denommeert de busschieters deser Stede, hoe dat tzelve College ende dexercitie vanden stock metten appendentien van dien, binnen deser Stede ende allomme elders, zeere nootzakelick bequame ende commodieulx es in tyden van orloghen, brande ende anderssins, omme daer duere quaet ende ongherief te belettene, zulcx dat ter sustentatie ende onderhoude van dien de Stede wel behoorde voorsien te zyne nyet alleene van Busmeesters, Diseniers, scutters ende harcquebusiers, maer oock mede van stocken, cruyde, loot ende andere instrumenten te dien nootzakelic ende gherequireert, maer want de ghesellen de welcke dat daghelicx

[p. 30]

den stock te hantieren pleghen, den zelven luttel gade slaen omme dieswille dat hemlieden den cost diere annecleeft te groot es, als verre excederende ende te boven gaende alle andere ghescutten als vanden cruysboghe ende handtboghe, ende ooc dat zylieden gheenderande secours en hebben omme eens de weke by een te moghen vergaderen ende naer huerlieder schieten blydelic ende gracelic te moghen versamen, zulc ende ghelyc als nochtans hebben de voornomde andere Gulden vanden boghe, die in andere Steden de minste zyn ende den stock de meeste, zo dat ghescepen wordt dit Gulden corts gheheel te vergane ter prejuditie vander Stede ende den insetenen van diere, ten zy dat in desen commodieuselic voorsien worde, so zyn de supplianten ghepreadviseert gheweest te imploreren tbenigne officie van mynen heeren, dat dit ghemeerct, hemlieden believe den supplianten over hemlieden ende huerlieder naercommers toe te legghene ende accorderene, ten coste van deser Stede, alle sondaghen vanden jaere twee schellinghen grooten eens, omme daermede den ghesellen scutters, Busmeesters ende Diseniers, naer tschieten, by een te blyvene ende alzo minnelic te moghen recreeren ende daer duere den stock te vermeerderen ghelyck ende zo men allomme elders doet, ende zult weldoen. Hier naer volght dappostille.

Scepenen vander Kuere, ghesien dese supplicatie ende omme de redenen hier inne begrepen, consenteren ende accorderen den supplianten ende huerlieder naercommers in officie, van nu voort an ten laste deser Stede allen sondaghen vanden jaere, telcken twee schellinghen grooten, ghelyc dat hebben de oude Guldens van S^t Jooris ende Sente Sebastiaen, ordonnerende den Tresorier deser Stede inder tyt zynde, den voornomden supplianten ende huerlieder naercommers dienende vanden Gulde van Sente An-

[p. 31]

thonis de voorseyde twee scellinghen grooten allen sondaghen jaerlicx te betalene.

Actum int Collegie den tweetsten dach van meye xv^e eenentzestich. (Onderteeckent), Hembyze⁽¹⁾.

(1) Reg. ord. politique beginnende 1559, MM, f^o 186 r^o.