Jaerboeken van het souvereine gilde der kolveniers, busschieters en kanonniers gezegd hoofdgilde van Sint Antone, te Gent . Deel 3

1529.
Diveersche ordonnantien vanden Gulde.

Allen den gonen die dese presente letteren zullen zien ofte hooren lesen, Schepenen ende Raedt vander Stede van

[p. 17]

Ghendt, saluut. Met kennissen der waerheden doen te wetene, dat wy ghesien hebbende de supplicatie ende tvertoogh van edelen ende weerden joncheer Anthuenis vander Vichte, schiltcnape, als Hooftman, midtsgaders Jan de Jaegher, als Deken, over hemlieden ende de ghemeene guldebroeders van mynen heere S^t Anthuenis onderhouden byden Coleuvreniers binnen deser Stede, by welcker supplicatie zy inde quaeliteijt alsboven, oock byden advyse vanden Conynck ende nieuwe ghecoorne Proviserers vanden selven Gulde, ons overgaven zekere poincten ende articlen noodtsaeckelick ende oorbuerlic, omme int selve gheselschip onderhouden te werdene, biddende hemlieden de selve by ons gheaccordeert ende gheconfirmeert te zyne, van welcken poincten ende articlen t'inhouden hiernaer volght van woorde te woorde. Inden eersten, want de Deken vanden voornoemden Gulde behoorelicken eedt ghedaen heeft, den Heere ende der Wet vander Stede van Ghendt, zoo zullen de nieuwe ghecoorene Proviserers eedt doen den Deken, volghende der ordonnantien van mynen voornoemden heeren hemlieden verleent ende bevolen. Item, soo zal eenyeghelic Proviserere ghehouden zyn te comene ter messen, tsondaechs metten abyte up zulcke boete als de confirmacie behelsende es. Item, zal eenyeghelick Proviserere ghehouden zyn te knielene ende offerene achtervolghende, alsoo hy ingheset zal zyn ter ehiege sonder clappen ofte luyde kumdghen te doene, binnen den dienste vander messen, up de boete van zes penninghen parisis. Item, werdt oock elc Proviserere ghehouden te gaene metten Conync ende den Deken ter plaetsen daermen de Camere oft schaepshoofden houden zal, als hy inde siege knielt, elc met zynen abyte, up boete ende eedt. Item, soo en zal niement vanden Proviserers vander Camere gaen, ten waere by consente vanden Deken, alsoo verre als daer recht oft wet

[p. 18]

te doene es byden Gulde, up boete ende eedt. Item, soo sal men oock onderhouden de schaepshoofden, ten minsten eens ter maent, dies zal Conync, Deken ende Proviserers metten ghemeenen gheselschepe gheven voor zyn ghebeurte van den schaepshoofde vier grooten, ende quyte hebben zyn ghelach. Item, de Deken zal ghehouden zyn den ghemeenen eedt te doen dach maeckene up boete ende eedt, metten Cnape, ten daeghen alsmen de schaepshoofden houden zal, ende alsdan te comparerene binnen der Stede, dies ghestaet zynde, telcken up boete ende eedt. Item, dat niement Conync, Deken, Proviserers, metten ghemeenen gheselschepe, hem vervoordere van dies ter Cameren ghesloten zal werden in zaecken der Gulde anclevende ende niet breedere, dat achter straete te draeghene, ofte tsecret vander Camere te revelerene, up de boete van twintich grooten. Item voort, dat de Hooftman, Keysere, Conync, Deken ende den gheheelen Eedt zouden moghen onghehouden zyn alsoo langhe als huerlieder dienst duerende es, te wetene vanden jaere dat zy ancommen zyn, ende soo langhe als zy volghen moeten, dats te wetene twee jaeren, van alle andere Gulden binnen Ghendt onghemolesteert zyn van dienste. Item, dat elc Proviserere zal betaelen zyn boeten aleer hy skeure gheven zal, alsoo wel boeten van ouden keerels, als vanden boeten vanden aultaere, behoudens datmen de zondachmesse van desen zelven boeten niet betaelen en zal, maer staen ter betaelynghe vanden ghemeenen Eedt. Item, dat elc Proviserere gheven zal zyn kuere eenen man suffissant ende nyet ontsleghen en zal werden van zynder keure, voor alder tydt dat die ghestelt zal werden, eedt zal hebben ghedaen alsvooren. Item, indien de zulcke die ghecoren waere niet suffissant en waere, ofte hem weeren wilde van dienste, dat alsdan die ghecoren sal hebben zulcken persoon dien persoon bedwyn-

[p. 19]

ghen zal te dienene zonder cost oft last vanden Gulde. Item, als een Proviserere ghecoren es ende behoorelicken eedt heeft ghedaen, in den ghevalle dat zulck een Proviserere gheraeckte te overlydene van deser weerelt, zoo sal den generaelen ofte ghemeenen Eedt kiesen eenen anderen Proviseerere, sonder hem, die den overledenen Proviserere ghecoren hadde, cost oft last te doene. Ende naerdien dat wy Schepenen ende Raedt voornoemt met ende ter presentie vanden heere deser Stede up de selve poincten ende articlen ghelet hebbende, hebben den voornoemden supplianten over hemlieden ende den ghemeenen guldebroeders vanden voornoemden Gulde, de voornoemden poincten ende articlen, ende elc bysondere, zoo die gheschreven staen, by dese gheaccordeert, ende gheconfirmeert, willende die by hemlieden alsoo ende inder voughen onderhouden te werdene, up de boeten daerinne verclaerst. Ghegeven in kennissen der waerheden, onder den zeghel van zaecken der voorseyde Stede van Ghendt, den 1^en dach van sporcle vyfthien hondert ende neghenentwintich, onderteeckent up den ploy, J. Vriendt, ende gheseghelt met eenen groenen wassen zeghel uuthanghende in dobbelen parchemynen steerte⁽¹⁾.

(1) Register b, f^o vij v^o.