Publications de la Société Historique et Archéologique dans le duché de Limbourg. Deel 10

Anno 1598.

In desen jaere syn burgermeisters geweest Johan Goltstein, Gerardt Spee. Ende is Mathis van Lom als subsecretaris aengestalt worden.

Den 20 February is den heer ridder Cigoigne van Ruremunde naer Bruessel vertrocken, cranck synde ende soe hy tusschen wegen ende naementlick tot Luyck seer cranck wart, hebben die van syne familie, monsieur Ingelbert d'Oyenbrugge, den secretaris Johan van Ryckenroy ende meister Peeter der Kynderen, eene cahotte gehuyrt tot Naemen toe voir 40 gulden, dan dweil der ridder Cigoigne crancker ende crancker wert, heeft de voirscr. familie mit malcanderen raedt geslaegen, synde op eene vrhe nae tot Naemen gecomen, (vreesende, dat hy vuyten schepe gebracht synde, aenstondt daer mochte steruen) in deliberatie gelaght, off het nyet dienlicker en solde syn ende hondert mael gemackelicker, hem weder te waeter aff sonder stooringe op Ruremunde te brengen, dan voirts te vhaeren ende eyndtlick geresolueert nut-

[p. 302]

ter ende profitelicker te syn, weder naer Ruremunde te keeren ende hebben ouer sulcx nieuw accordt gemaeckt mitten schipper, om weder aff naer Ruremunde te vhaeren ende gecomen the Weset, hebben gecommuniceert mit eenen doctor aldaer ende van hem attestatie genomen (dweil capiteyn Alexandre Cigoigne hun twee Italiaenen tot controlleurs ofte spyen hadde bygevuecht), dat sy wel ende wyselick hadden gedaen, den voirscr. ridder Cigoigne te rugge te brengen ende is alsoe den 22 des seluen maendts noch leuendich bynnen Ruremunde gebracht worden ende is den 25 February voirscr. tusschen 2 ende 3 vrhen snaemiddachs inden heere verstoruen ende is den 2 Marty mit grooter eeren begraeuen inden Minrebrueren cloister.

Den 26 February heeft syne hoicheit den cardinael Albertus geordonniert bynnen Ruremunde te logeren alsulcke recreute, als den graeff van Biglie tot versterckunghe van syn regiment aldaer sol brengen.

Den 7 Juny is bynnen Ruremunde den peys gepubliceert tusschen den coninck van Spaengnien ende den coninck van Vranckryck.

Den 13 Septembris is gestoruen den coninck van Spaengnien, Philippus den 2^e van dyen naeme, ende in syne plaetse gesuccedeert synen sone Philippus 3^us.

Den 15 Septembris is ouerleden vande peste den vendrich jo. Willem Spierincx ende eerlick begraeuen inde moederkercke tho Ruremunde opden hooghen choor.

In dit jaer heeft de peste soe seer bynnen Ruremunde voirts gegaen, datter syn gestoruen ouer de 1400 menschen, onder de welcke seer nae byde hondert craemvrouwen ouerleden syn.

Den 24 Septembris is der durchluchter Albertus, hertoch van Oistenryck, mit eenen heerlicken staet naer Duyts-

[p. 303]

landt vertrocken, nemende syn reyse op Spaengnien tot syner bruydt, de serenissime infante van Hispanien.

Den 15 Octobris heeft het conincx volck mit appoinctement de stadt Rynberck ingenomen.

Den 17 Decembris heeft men alhier die vuytfhaert ofte begenckenisse Co. Mats. tho Hispanien, Philippi 2ⁱ, onsers allergenedichsten heeren hoichlofflicher memorien, gehalden.

Den 23 Decembris is den Tyber soe hoich ouergevloeyt bynnen Roomen, soe datter ouer 1400 menschen verdroncken.