Publications de la Société Historique et Archéologique dans le duché de Limbourg. Deel 10

Anno 1565.

In desen jaere syn burgermeisters geweest Lambert van Cruchten, Mathis Cremers.

Den graue van Egmondt wederom vuyt Spaengnien gecomen synde mit instructie van syne Ma^t in Spaensche tale, heeft op sekeren by de gouuernante gepresigeerden dach in haere presentie ende alle de heeren van dese Nederlanden syn rapport gedaen ende in naeme van syne Ma^t, soo vande leeringhe voir tvolck, de reformatie der geistelickheit, institutie der jonckheit ende d'excutie van Caroli V^ti ende syne M^ts edicten, item d'obserueren vande inquisitie relateert, sulcx dattet schene, dat die saecke (die religie aengaende) nyet gevuechlich sonder der prelaeten ende theologanten en solde kunnen getracteert worden. Weshaluen die gouuernante tegens sekeren dach in Maio heeft bouen die ordinarisse heeren ende rhaeden, oick doen conuoceren den heer Martinum Rithourum, bisschop van Yperen (den syne Ma^t villicht particulariter hadde genomineert), Anthonium d'Hauet, bisschop van Atrecht, d. Jodocum de Tileto, praepositum in Walcourt, d. Wilmarum Bernardj, primum Louany

[p. 101]

canonum lectorem ende andere raedtzheeren van verscheydene prouincien, om ouer Co. Ma^ts instructie byden graue van Egmondt ouerbracht, te consulteren. Ende onder anderen is gesloeten die straffe der ketteren, daer tegens die drye heeren, de prince van Orangnien ende de grauen van Egmondt ende van Horn, sich ierst byde hertoginne geopneert. De hertoginne heeft de resolutie van geistelickheit ende theologanten hun doen onderteeckenen, om naer syne Ma^t ouergesonden te werden, waer tegens die voirscr. drye heeren, dweil syne Ma^t hun sulcx nyet expresselyck en hadde beuolen, hebben gecontesteert.

Den 6 July is den graeff van Mansfelt, gouuerneur van Luxemborch mit syne huysvrouwe ende altsten sone Caerl van Bruessel op Zeelandt, om naer Portugael te schepe gefhaeren, vertrocken, om ouer te bringen de bruydt van Alexandro Farnesio, prince van Parmen ende Plaisancien.

Immidels antwordende Co. Mat. van Hispanien opde brieuen vande gouuernante, beueelt dat die ordtnungen ende edicten Caroli V^ti, wie oich de decreten Concily Tridentini ter executien gestelt te werden. De princen van Orangnien mitte grauen van Egmondt ende Horn gesien inden raedt der staeten de brieuen, die de gouuernante verthoende, protesteerden daer mit nyet wel te vreden te syn, waer naer gevolcht, dat onder de gemeynte de fame gespreyt ende oick aen sommighe magistraeten der Nederlanden persuadeert is worden, dat duer die edicten der voirscr. brieuen die Spaensche inquisitie inbrocht sol worden.

Daer en tusschen naer veele vuytgestandene peryckelen, tempeesten ende swaericheden is den graeff van Mansfeldt vuyt Portugael mitte bruydt vanden prince van

[p. 102]

Parmen, des gouuernantes sone, in Zeelandt aencomen ende den XI. Nouemb. bynnen Bruessel gearriueert, alwaer sy inde capelle opt hoff doir den heer Maximiliaen van Bergh, bisschop van Cameryck, ten houwelyck gegeven syn worden ende de bruylofft int hoff inden auondt mit groote magnificentie ende solemniteiten gehalden worden.

De gouuernante achteruolgende den beuel van syne Mat. seyndt de selue brieuen aen alle de bisschoppen ende andere geistelycke ouericheden ende magistraeten, om ouer al gepubliceert te werden.