Publications de la Société Historique et Archéologique dans le duché de Limbourg. Deel 10

Anno 1564.

In desen jaere syn burgermeisters geweest Johan Buegel, Jacob van Holtzwyler.

In dit jaer is bouen maeten eenen wonderlicken fellen winter geweest, soe dat men zedert den XIIII. Nouembris totten XVIII. February volgents ouer de Schelde voir Antwerpen heeft mit waegens ende geladene kharren ende peerden vryelyck gevhaeren.

Ende naer datmen in dese Nederlanden langh hadde geconsulteert wegen der religioens, der justicie ende der kynderen institutie, is ten lesten der graue van Egmondt mit instructie van alle de staeten in Belgio ende in naeme der seluer naer Hispanien affgeverdicht.

In Aprili heeft Co. Ma^t den cardinael Granuelle naer Spaengnien reuoceert.

[p. 100]

Johannes Caluinus, in Junio, naer dat hy seuen jaeren continuelicken mit verscheydene sieckten affligeert was, nae dat hy synen adem nyet en konde erhaelen, is te Geneuen, daer hy 23 jaeren als opperminister valschelyck geleert hadde, seer miserabelyck maer nyet beclaechlick gestoruen, synes alderdombs 56 jaeren, mit negen diuersche sieckten besmedt synde geweest, als Theodorus Besa, synen discipel, seluer scryft, te weten cholica, calculo, articulari morbo, hemoroidibus, febripthisica, asmate, hemicrania, catharro continuo et vomitu sanguinis.